Rijjilõk Paul ear kwal̦o̦k kõn Jeova bwe ej “Anij in aenõm̦m̦an otemjej, Eo ej kaenõm̦m̦ane [kõj] ilo . . . jorrããn otemjej.” * (Lale kõmel̦el̦e eo itulal̦.) (2 Korint 1:3, 4) Baibõl̦ ej jipañ kõj ñan tõmak bwe ewõr an Anij maroñ ñan jipañ im kaenõm̦m̦an aolep armej jekdo̦o̦n wõn im jekdo̦o̦n ewi joñan an l̦ap apañ ko rej iiooni.

Bõtab, ewõr men jej aikuj kõm̦m̦ane ñe jekõn̦aan bwe Anij en kaenõm̦m̦an kõj. Ejjel̦o̦k oktak men in jãn ñe jej bõk jipañ jãn juon taktõ. Bwe jen maroñ bõk jipañ jãne, jej aikuj etal im taktõ. Rũkanaan Amos ear kajjitõk im ba: “Ruo armej remaroñ ke itoitak ippãn doon ñe rejjab karõk bwe ren iioon doon m̦okta?” (Amos 3:3, UBS) Eñin unin Baibõl̦ ej rõjañ kõj im ba: “Kom̦win ruwaakl̦o̦k ñan Anij, im Enaaj ruwaakwaj ñan kom̦.”​—Jemes 4:8.

Etke jej tõmak bwe Anij enaaj kaenõm̦m̦an kõj? Jej tõmak kõnke elõñ alen an ba bwe ekõn̦aan jipañ kõj. (Lale  bo̦o̦k eo ilo katak in.) Bareinwõt, elõñ rar kaalikkar bwe Anij ear jipañ im kaenõm̦m̦an er. Rein rekitibuj ro ilo iien ko etto im ilo raan kein ad.

Elõñ ilo raan kein rej kappok jipañ jãn Anij kõn apañ ko rej iiooni. Kiiñ Devid ear bar iioon apañ ko rel̦l̦ap im ear bar kappok jipañ jãn Anij. Juon iien ear akwel̦ap ñan Jeova im ba: “Kwõn roñjake eõ ñe ij . . . kũr bwe kwõn jipañ.” Anij ear ke uwaake? Aet. Devid ear wõnm̦aanl̦o̦k im ba: “Ear jipañ eõ, innem ij m̦õn̦õn̦õ.”​—Sam 28:2, 7, UBS.

Anij ear karõk bwe en bar wõr kun̦aan Jijej ñan kaenõm̦m̦an armej ro. Kar kanaan bwe Jijej enaaj “kaenõm̦m̦an ro erup bũrueer” im “ro otemjej rej bũrom̦õj.” Eñin ej juon iaan m̦õttan jerbal ko Anij ear lil̦o̦k ñane. (Aiseia 61:1, 2, UBS) Ear jejjet kũtien kanaan in kõnke Jijej ear kwal̦o̦k an kea kake ro rar eñtaan im ear jipañ er.​—Matu 11:28-30, UBS.

Jijej ear kaenõm̦m̦an armej ro ilo an lel̦o̦k ñan er naanin kakapilõk ko rem̦m̦an, kõm̦m̦an ñan er ilo jouj, im ear kõmour jet iaaer jãn nañinmej ko aer. Juon iien, juon eo ear nañinmej in lõba ear akwel̦ap ñan Jijej im ba: “El̦aññe Kokõn̦aan, Kwõj maroñ in karreo eõ.” Kõn an kar Jijej tũriam̦okake armej in im  kõn̦aan jipañe, ear uwaake im ba: “Ikõn̦aan; kwõn erreo.” (Mark 1:40, 41) Innem armej in ear mour jãn nañinmej eo an.

Meñe Jijej ejako kiiõ ilo lal̦ in ñan an kaenõm̦m̦an kõj, ak Jeova, Eo ej Jemãn Jijej im “Anij in aenõm̦m̦an otemjej,” ej wõnm̦aanl̦o̦k im jipañ armej ro rej bũrom̦õj im eñtaan. (2 Korint 1:3) Jen etale emãn wãween ko rel̦l̦ap Anij ej kaenõm̦m̦an armej ro.

• Baibõl̦. Baibõl̦ ej ba: “Jabdewõt men ko ar jeje m̦okta, ar jeje kein katakin kõj, bwe kõj kõn kijenmej, im kõn aenõm̦m̦an jãn Jeje ko, en wõr ad kõjatdikdik.”​—Rom 15:4.

• Jetõb Kwõjarjar. Ãlikin an kar Jijej mej, ro ilo eklejia eo an Kũrjin ro rar aikuj kaenõm̦m̦an. Baibõl̦ ej kwal̦o̦k bwe Anij ear kaenõm̦m̦an er ikijjeen jetõb kwõjarjar eo an. (Jerbal 9:31) Jetõb kwõjarjar ej kajoor eo an Anij. Anij emaroñ kõjerbale kajoor in an ñan kaenõm̦m̦an jabdewõt armej kõn jabdewõt apañ ko rej iiooni.

• Jar. Baibõl̦ ej rõjañ kõj bwe jen “jab inepata kõn jabdewõt.” Ej wõnm̦aanl̦o̦k im ba: “Kajjitõk ko ami ren wal̦o̦k ñan Anij. Im aenõm̦m̦an jãn Anij, eo ej el̦l̦ã jãn jel̦ã otemjej, enaaj kõjparok bũruomi im l̦õmn̦ak ko ami.”​—Pilippai 4:6, 7.

• Rũttõmak ro M̦õttad. Rein rej ro m̦õttad rem̦ool im remaroñ kaenõm̦m̦an kõj ilo iien ko jej bũrom̦õj im eñtaan. Rijjilõk Paul ear kwal̦o̦k kõn an rũttõmak ro m̦õttan “kaenõm̦m̦ane” ilo iien ko ear iioon “eñtaan im jorrããn.”​—Kolosse 4:11; 1 Tessalonika 3:7.

Bõlen kokõn̦aan jel̦ã ewi wãween an Anij kaenõm̦m̦an kõj ilo wãween kein emãn. Jen lale jet bwebwenato ko kõn jet armej ro rar iiooni apañ ko kar kwal̦o̦k kaki ilo katak eo m̦oktal̦o̦k. Ãinwõt rein, kwe bareinwõt kwõmaroñ kile bwe ñan kiiõ Anij ej kajejjet kũtien kallim̦ur in an ej ba: “Inaaj kaenõm̦m̦an kom̦ . . , ãinwõt an juon kõrã kaenõm̦m̦an ajri eo nejin.”​—Aiseia 66:13, UBS.