Jisõs Ej Anij Ke?

ELÕÑ armij rej watõk Trinity einwõt “katak eo eaurõktata an kabuñ ko an dri Kristian ro.” Ekkar ñõn katak in, Jemen, Nejin, im jitõb kwojarjar rej jilu Anij ilo juõn. Juõn pris eutiej an kabuñ in Catholic etan John O’Connor ear ba kin Trinity: “Jejela bwe ej juõn katak ekanuij in mulõl me ebin ar melele kake.” Etke katak eo kin Trinity ekanuij in bin ñõn melele kake?

Juõn tikjinere kin Baibel eo ej kwalok juõn un. Ilo an Buk in konono kin katak eo kin Trinity, ej ba: “Ejjab juõn katak ej berber ion Baibel kinke ejelok jabrewõt kemelele kin men in jemaroñ loe ilo Baibel eo.” Kinke Trinity “ejjab juõn katak ej berber ion Baibel eo,” ro rej tõmak ilo katak eo kin Trinity rar kate ilo air bukot eon ko ilo Baibel eo im bareinwõt ukot meleleir ñõn rejetake katak eo air.

Eon in Ej Kwalok kin Trinity Ke?

Juõn wanjoñok kin juõn eon ilo Baibel me ekkã an bwir air kajerbale ej Jon 1:1. Eon in ej ba: “Ilo jinoin Nan eo, im Nan iben Anij [juõn ian nan in Grik eo, ho the·osʹ], im Nan Anij [the·osʹ].” Ilo eon in eor ruo nan ko ilo kajin Grik the·osʹ ak anij. Nan eo mokta ej ijjino kin juõn ian nan in Grik eo ho (eo), ñe ej eindrein inem nan eo ho the·osʹ ej jitõñlok ñõn Anij Laplap. Bõtab, ilo wãwen eo kein karuo, ejelok ho (eo) iturin nan eo the·osʹ. Rar ke likjõp in likit ho (eo) ilo ijin?

Kar je buk in Gospel eo an Jon ilo jeje in Grik eo etan Koine, me eor kakien ko kin kilen air kajerbal nan eo ho (eo). Juõn dri etale Baibel eo etan A. T. Robertson ej lo bwe elañe ej walok ho (eo) iturin men eo konono kake ak iturin nan ko rej kwalok kin men eo konono  kake, “rej juõn wõt, rej einwõt juõn, im juõn wõt meleleir.” Robertson ej lemnok kin juõn wanjoñok ilo Matu 13:38, UBS, me ej ba: “Melaj eo [kajin Grik, ho a grosʹ] ej lõl in [kajin Grik, ho koʹsmos].” Mokta jen nan eo ‘melaj’ (a grosʹ) im ‘lõl’ (koʹsmos) ej walok (ho) me ej bar melelen eo ak in. Kin men in, kakien ko kin kilen jeje ej kamaroñ kij ñõn melele bwe lõl in ej bareinwõt melaj eo.

Bõtab, ta elañe eor eo iturin men eo konono kake ak ejelok iturin nan eo ej kwalok kin men eo konono kake einwõt ilo Jon 1:1? Ilo an kwalok kin eon in einwõt juõn wanjoñok, dri meletlet eo Jemes Allen Hewett ej kwalok: “Ilo wãwen in men eo konono kake im nan eo ej kwalok kin men eo konono kake rejjab juõn wõt, rejjab joñõn wõt juõn, rejjab einwõt juõn, ak jabrewõt ian men kein.”

Ñõn wanjoñok, Hewett ej kajerbal eon eo ilo 1 Jon 1:5, me ej ba: “Anij maram.” Ilo kajin Grik, “Anij” ej ho theosʹ im kin men in eor ho (eo) iturin nan eo “Anij.” Bõtab ejelok ho (eo) iturin phos melelen “maram.” Hewett ej ba: “Aolep ien juõn emaroñ . . . ba kin Anij bwe ej maram; juõn ejjab maroñ aolep ien ba bwe maram ej Anij.” Ejja einlok wõt wanjoñok ko rej ber ilo Jon 4:​24, “Anij e jitõb,” im ilo 1 Jon 4:​16, “Anij yokwe.” Bareinwõt ilo kajin Grik, eor eo ilo eon kein jimor iturin nan eo Anij. Bõtab ejelok eo iturin “jitõb im yokwe,” inem rejjab juõn wõt meleleir. Eon kein rejjab maroñ ba bwe “jitõb ej Anij” ak “yokwe ej Anij.”

Ej ke Kalikar Wõn “Nan Eo”?

Elõñ ro me rejela kin kajin Grik eo etto im bareinwõt dri ukok in Baibel ro rej kile bwe Jon 1:1 ej kalikar kin karkarin “Nan eo,” jab kin wõn e. Dri ukok in Baibel eo etan William Barclay ej ba: “Kinke [dri jilik Jon] ear jab likit eo iturin theos inem men in ej erom juõn kemelele . . . Jon ejjab kwalok ilo ijin bwe Nan eo ej juõn wõt iben Anij. Ñõn ba ilo juõn wãwen ebiruru, ejjab ba bwe Jisõs ej Anij.” Dri meletlet eo Devid BeDuhn ej bareinwõt ba: “Ilo kajin Grik, elañe kwoj jolok eo jen iturin theos einwõt nan eo ilo jemlokõn eon eo ilo Jon 1:1, inem ro rej riit renaj lemnok bwe kwoj ba ‘juõn anij.’ . . . Kinke ejelok eo iturin theos, men in ej kõmõn bwe en oktõk jen ho theos, einwõt an oktõk ‘juõn anij’ jen ‘Anij’ ilo kajin belle.” BeDuhn ej kakobaba: “Ilo Jon 1:1, Nan eo ejjab Anij mõke, bõtab ej juõn anij, ak juõn jitõb einlok wõt Anij.” Ñõn likit ilo nan ko an Josep Henry Thayer, juõn dri meletlet me ear bõk kwonan ñõn kõmõne Baibel eo American Standard Version, ear ba: “Logos [ak Nan eo] ej juõn jitõb einlok wõt Anij, ejjab Anij mõke.”

Jela kin wõn Anij ej aikwij ke “juõn men ekanuij mulõl”? Ear jab eindrein iben Jisõs. Ilo jar eo an ñõn Jemen, Jisõs ear kalikar oktõk eo ikõtan e im Jemen ke ear ba: “Im men in mour in drio, bwe ren jela Kwe juõn wõt Anij emol, im Jisõs Kraist, eo Kw’ar jilkintok.” (Jon 17:3) Elañe jej tõmak Jisõs im melele kin katak eo ej alikar ilo Baibel eo, jenaj koutiej e einwõt jitõb eo ej einlok wõt Anij im ej nejin Anij. Jenaj bareinwõt kabuñ ñõn Jeova einwõt “juõn wõt Anij emol.”

[Naan ko ilo peij 27]

Etke katak eo kin Trinity ebin ñõn melele kake?

[Naan ko ilo peij 27]

Jisõs ear kalikar oktõk eo ikõtan e im Jemen

[Pija eo ilo peij 27]

Imõn jar eo ilo Tagnon, France