Ta kar L̦õmn̦ak eo an Jijej kõn M̦akũtkũt ko an Kien?

RO RAR je bok in Matu, Mark, Luk, im Jon rar kwal̦o̦k kõn jet iien ko me Jijej ear iioon ijjiped ñan bõk kun̦aan ilo m̦akũtkũt im aituerõk ko an kien. Ñan waanjoñak, jejjo iien ãlikin an kar Jijej peptaij ke ear bõlen 30 an iiõ, Tepil̦ eo ear kajjioñ kapoiki ilo an ba bwe enaaj lel̦o̦k aelõñ ko an lal̦ ñan e bwe en irooj in lal̦. Tokãlik, ke ear kwal̦o̦k naan, juon jarlepju in armej rar kõn̦aan kõm̦m̦an bwe en aer kiiñ. Bar juon iien, armej ro rar kajjioñ iuuni bwe en erom juon eo ej bõk kun̦aan ilo aituerõk ko an kien. Ta eo Jijej ear kõm̦m̦ane? Jen lale ta ko rar wal̦o̦k.

Irooj in lal̦. Bok in Gospel ko rej ba bwe Tepil̦ eo ear kajjioñ kareel Jijej ñan erom juon irooj ilo an kar ba bwe enaaj lel̦o̦k ñane “aelõñ in lal̦ otemjej.” L̦õmn̦ak m̦õk kõn joñan an naaj kar ejjel̦o̦k eñtaan im apañ ñe Jijej ear irooj in lal̦ in! Juon armej eo ej itoklimo kõn kien im ekõn̦aan n̦amejal̦an apañ ko an armej ro eban kar m̦akoko in erom juon ri tõl ak irooj in lal̦ in. Bõtab, Jijej ear jab kõm̦m̦ane men in.​—Matu 4:8-11.

Kiiñ. Elõñ iaan armej ro rar mour ilo tõre ko an Jijej rar kõn̦aan bwe en wõr juon aer ri tõl me emaroñ lukkuun bõktok jeraam̦m̦an ko ñan er im n̦amejal̦an apañ ko me kien eo aer ear jelm̦aiki. Ke armej ro rar lo bwe ewõr an Jijej kapeel im maroñ ñan kõm̦m̦an jabdewõt, rar kõn̦aan bwe en kobal̦o̦k im jipañ kien eo aer. Ta eo Jijej ear kõm̦m̦ane? Jon ej ba: “Ke Jijej e jel̦ã, bwe rekõn̦aan itok im bõk E kõn kajoor, im kõm̦m̦an bwe En kiiñ, E bar make ilo̦k ñan tol̦.” (Jon 6:10-15) Innem, ealikkar bwe Jijej ear jab bõk kun̦aan ilo m̦akũtkũt ko an kien.

Juon eo ej bõk kun̦aan ilo aituerõk ko an kien. Jen lale ta ko rar wal̦o̦k ilo raan ko m̦oktal̦o̦k jãn an kar Jijej mej. Ilo tõre ko, Parisi ro rar kõn̦aan jenolo̦k jãn Kien eo an Rom. Mekarta, ear em̦m̦an ippãn ro doon Herõd kien eo an Rom. Juon iien, armej ro doon Parisi ro im ro doon Herõd rar koba ippãn doon im kepaak Jijej. Rar kõn̦aan iuuni Jijej bwe en bõk kun̦aan ilo aituerõk im iakwããlãl ko an kien. Rar kajjitõk ippãn el̦aññe Ri Ju ro rej aikuj kõl̦l̦ã owõj ñan Rom.

Mark ear je uwaak eo an Jijej: “‘Etke kom̦ij kapo Eõ? Bõktok ñan Eõ juon denariõs bwe In lo  e.’ Im rej bõktok. Im Ej ba ñan er, ‘Men in e im jeje in an wõn?’ Im re ba ñan E, ‘An Sizar.’ Im Jijej e uwaak im ba ñan er, ‘Kom̦win lel̦o̦k ñan Sizar men ko an Sizar, im ñan Anij men ko an Anij.’” (Mark 12:13-17) Juon bok ear kwal̦o̦k kõn unin an kar Jijej uwaak ilo wãween in. Ej ba bwe Jijej ear jab kõn̦aan kiiñ ñan er. Ak ear kõn̦aan wõt rejetake kien eo an Anij im jab kien ko an lal̦.

Ak ejjab mel̦el̦ein bwe Jijej ear jab kea kõn apañ ko an armej ro ãinwõt jeram̦õl, l̦ap nana, im ejjel̦o̦k ekajet jim̦we. Ilo m̦ool, Baibõl̦ eo ej kwal̦o̦k bwe ke Jijej ear lo an armej ro eñtaan ear lukkuun tũriam̦okake er. (Mark 6:33, 34) Bõtab, meñe Jijej ear bũrom̦õj kõn an armej ro eñtaan, ear jab em̦m̦akũt im kajju jol̦o̦k aolep apañ ko aer. Jet rar kajjioñ iuuni Jijej bwe en bõk kun̦aan ilo aituerõk im iakwããlãl ko an kien ilo raan ko an ak ear jab.

Ãinwõt ej alikkar ilo waanjoñak kein, Jijej ear jab bõk kun̦aan ilo m̦akũtkũt im aituerõk ko an kien. Ak ta kõn Kũrjin ro rainin? Ta eo rej aikuj kõm̦m̦ane?