Jãn am̦ kar riiti katak ko ruo m̦oktal̦o̦k, kwõmaroñ kiiõ mel̦el̦e bwe elukkuun aorõk Aelõñ eo an Anij ippãn Ri Kõnnaan ro an Jeova. Im bõlen kwõj itoklimo kõn jeraam̦m̦an ko renaaj wal̦o̦k ium̦win tõl eo an Aelõñ in me kwaar riiti. Bõtab, bõlen kwõj bar pere ñe enaaj jejjet im m̦ool kallim̦ur kein.

Ejjab juon men enana ñe kwõjjab m̦õkaj im tõmak aolep men ko armej rej ba. (Jabõn Kõnnaan 14:15, UBS) Ilo m̦ool, kwõj ãinwõt RiBeria ro ilo iien ko etto. * (Lale kõmel̦el̦e eo itulal̦.) RiBeria ro rar tõmake ennaan eo kõn Aelõñ eo an Anij. Ak unin aer tõmak ejjab kõnke rar baj kõn̦aan tõmake. M̦okta jãn aer tõmake ennaan in, rar lukkuun etali eoon ko “bwe ren jel̦ã men kein rem̦ool ke jab ke.” (Jerbal 17:11) Ekkar ñan eoon in, RiBeria ro rar lale ñe naan ko kar kwal̦o̦k ñan er rej errã ilo naan ko ilo Baibõl̦. Kõn aer kar kõm̦m̦ane men in, jidik kõn jidik rar lukkuun tõmak bwe naan ko kar kwal̦o̦k ñan er rar pedped wõt ioon Naan in Anij.

Ri Kõnnaan ro an Jeova rej rõjañ eok ñan am̦ bar ãindein. Kõmij katak Baibõl̦ ippãn armej ro im ejjel̦o̦k on̦ãn. Ñe kwõj katak ippemmim, kwõnaaj jel̦ã ñe katak ko ammim kõn Aelõñ eo an Anij rej errã ilo naan ko ilo Baibõl̦.

Ebar wõr men ko jet kwõnaaj katak kaki ijello̦kun wõt Aelõñ eo an Anij. Ñan waanjoñak, ñe kwõj katak Baibõl̦, kwõnaaj lo uwaakin kajjitõk kein itulal̦ me enañin aolep armej rej kajjitõk kaki.

•   Jaar itok jãn ia?

• Taunin ad mour?

• Etke Anij ej kõtl̦o̦k bwe armej ren eñtaan?

• Ta eo enaaj wal̦o̦k ñan kõj ñe jemej?

• Lal̦ in enaaj ke jako?

• Ta eo juon baam̦le ej aikuj kõm̦m̦ane bwe en m̦õn̦õn̦õ?

Men eo em̦m̦antata enaaj wal̦o̦k kõn am̦ katak Baibõl̦ ej bwe kwõnaaj maroñ epaake Anij ak “ruwaakl̦o̦k” ñane. (Jemes 4:8) Innem, ñe kwõj epaakel̦o̦k Anij, enaaj l̦apl̦o̦k am̦ mel̦el̦e kõn Aelõñ eo an im wãween an Aelõñ in naaj jipañ eok kiiõ im ñan indeeo. Ke Jijej ear jar ñan Jemãn, ear ba: “Eñin mour indeeo, bwe armej ren jel̦ã kwe, juon wõt Anij em̦ool, im bwe ren jel̦ã Jijej Kũraij, eo kwaar jilkintok.”​—Jon 17:3, UBS.