Nō Ihowa, nō te Atua hari te rongo pai, e hiahia nei kia harikoa ai ngā whānau. (1 Tīmoti 1:11) Nāna te mārena i tīmata. He hira tonu ki te hari o te whānau te mārena ā-ture, nō te mea e homai ana he wāhi haumaru hei whakatipu tamariki. Me manaaki te Karaitiana i ngā ture o te wā kāinga e pā ana ki te rēhitatanga o te mārena.​—Pānuitia Ruka 2:1, 4, 5.

He pēhea te whakaaro o te Atua ki te mārena? Ki a ia he whakakotahitanga pūmau tēnā i waenganui i te tāne me te wahine. E pai ana a Ihowa kia pono te tāne me te wahine ki a rāua anō. (Hīperu 13:4) E kino ana ia ki te whakarerenga. (Maraki 2:16) Heoi, e tuku ana ia kia whakarere te Karaitiana, kia mārena anō, ina moepuku tōna hoa.​—Pānuitia Matiu 19:3-6, 9.

I hangā e Ihowa te tāne me te wahine kia mahi tahi rāua i roto i te mārena. (Kēnehi 2:18) Nō te mea ko te tāne te upoko, māna te whānau e ārahi mā te mahi kia riro ai ngā mea e hiahia ana tana whānau, me te whakaako i a rātou ki te Atua. Me whakapau hoki ōna kaha ki te aroha ki tāna wahine. Me aroha tonu te tāne me te wahine ki a rāua, me manaaki. Nō te mea e hara katoa ana ngā tāne me ngā wāhine, ko te ako ki te muru hara, tētahi mea nui ki te koa o te mārena.​—Pānuitia Epeha 4:31, 32; 5:22-25, 33; 1 Pita 3:7.

Ina puta mai he raruraru ki tō mārena, me anga kōrua tahi ki te aroha tonu ki a kōrua. (1 Koriniti 13:4, 5) Kāhore te Kupu a te Atua e mea ana kia wehe kōrua hei whakatika i ngā raruraru e puta noa mai ki te mārena.​—Pānuitia 1 Koriniti 7:10-13.

E hiahia ana a Ihowa kia hari koutou. E homai ana ia i ngā tino tohutohu e hari ai koe i tō tamarikitanga. E pai ana ia kia whiwhi painga koe i te whakaaro nui me te mātauranga o ōu mātua. (Korohe 3:20) E pai ana hoki a Ihowa, kia kite koe i te hari o te mahinga mea mā tō Kaihanga rāua ko tāna Tama.​—Pānuitia Te Kaikauwhau 11:9–12:1; Matiu 19:13-15; 21:15, 16.

Me whakapau kaha koe ki te hoatu he kai, he kāinga, he kākahu hoki ki āu tamariki. (1 Tīmoti 5:8) Engari, kia tino koa ai ngā tamariki, ākona rātou ki te aroha ki te Atua, ki te whakarongo ki a ia anō. (Epeha 6:4) Ko tōu aroha ki te Atua, he tauira nui tēnā ki te ngākau o tāu tamaiti. Ki te mea nō te Kupu a te Atua tāu ako, ka ārahi pai koe i ngā whakaaro o tāu tamaiti.​—Pānuitia Tiuteronomi 6:4-7; Ngā Whakataukī 22:6.

Ka whiwhi painga ngā tamariki ina akiaki koe i a rātou, ina whakamihi. E hiahia ana hoki rātou ki te tohutohu me te papaki. Mā te ako pēnei rātou e tiaki i ngā mahi e mamae ai rātou. (Ngā Whakataukī 22:15) Engari, kaua rawa te papaki e tūkino, e whakawiri.​—Pānuitia Korohe 3:21.

E whakaputa ana ngā Kaiwhakaatu a Ihowa i ngā pukapuka maha kua tuhia rawa hei āwhina i ngā mātua me ngā tamariki. He pukapuka kōrero Paipera ēnei.​—Pānuitia Ngā Waiata 19:7, 11.