A Zeezi kõo a vɩɩmã tɩ yɩ maoongo, n na n fãag wẽn-sakdbã. (Matye 20:28) Rẽ n so tɩ Biiblã pʋgẽ, b boond-a tɩ ‘dũniyã fãagda.’ (1 Zã 4:14) B leb n yeelame: “Fãagr ka be ne ned a to sã n ka a Zeezi ye. Bala, Wẽnnaam ka kõ ned yʋʋr a to ninsaalba sʋk dũniyã zug tɩ tõnd tõe n tũ n paam fãagr ye.” (Tʋʋma 4:12)

Dẽnd a Zeezi “lemba kũum,” neb nins sẽn tar tẽeb ne yẽ wã yĩnga. (Ebre-rãmbã 2:9; Zã 3:16) La “Wẽnnaam vʋʋg-a lame n yiis kũ-rãmb sʋka,” t’a le lebg malɛk n be saasẽ. (Tʋʋma 3:15, MN) Be, a ‘tõe n fãaga neb nins sẽn tũnugd yẽ n kolgd Wẽnnaamã hal sõama.’​—Ebre-rãmbã 7:25.

Bõe yĩng tɩ d rat t’a Zeezi yõk Wẽnnaam sɛɛg tõnd yĩnga?

Tõnd fãa yaa yel-wẽn-maandba. (Rom-dãmbã 3:23) Yel-wẽnã kɩtame tɩ d pa tõe n kolg Wẽnnaam ye. Leb n yaa yel-wẽnã n wat ne kũumã. (Rom dãmbã 6:23) La a Zeezi yaa ‘se-yõakda,’ neb nins sẽn tẽed a maoongã yĩnga. (1 Zã 2:1) A yõkda Wẽnnaam sɛɛg b yĩnga, n kotẽ t’a kelg b pʋʋsgã, la a kõ-b b yel-wẽnã sugri, yẽ maoongã maasem yĩnga. (Matye 1:21; Rom-dãmbã 8:34) Wẽnnaam sakd n deega a Zeezi kosgã, bala zemsa ne a raabã. A sẽn tʋm a Zeezi tẽngã zugã yaa sẽn na yɩl tɩ nebã “paam fãagr bãmb maasem yĩnga.”​—Zã 3:17.

D sã n tẽ a Zeezi bala, seka d na paam fãagr bɩ?

Ayo. Yaa sɩd tɩ d tog n tẽ a Zeezi sẽn na yɩl n paam fãagre. La pa rẽ bal la d segd n maan ye. (Tʋʋma 16:30, 31) Biiblã yetame: “Yĩng sã n ka naag ne sɩɩga, a yaa kũum. Woto me, tẽeb sã n ka naag ne tʋʋma a yaa kɩɩnga.” (Zak 2:26) D sã n dat n paam fãagre, d segd n:

• Zãmsa Biiblã n bãng a Zeezi ne a Ba a Zeova sõma.​—Zã 17:3.

• Talla tẽeb ne-ba.​—Zã 12:44; 14:1.

• Saka b sẽn yetã, tɩ wilgdẽ tɩ d sɩd tara tẽebo. (Luk 6:46; 1 Zã 2:17) A Zeezi wilgame tɩ pa ned ning sẽn boond yẽ tɩ “Zu-soabã” n na n paam fãagr ye. La yaa ned ning sẽn maand yẽ Ba sẽn be saasẽ wã raabã bala.​—Matye 7:21.

• Kell n talla tẽebo, baa ne zu-loeesã. A Zeezi sɩd wilga rẽ vẽenega. A yeelame: “Ned ning fãa sẽn na n mao-a tɩ wakat ta, a na paam fãagre.”​—Matye 24:13.