Yɩɩn-sõamyã sebre 68:1-35
Yɩɩlã taoor soab yĩnga. A Davɩɩd yɩɩlle.
68 Bɩ Wẽnnaam yiki. Bɩ a bɛɛbã sãeege.Bɩ neb nins sẽn kis-a wã zoe a taoore.+
2 Bɩ y rig-b tɩ b looge, wa bug-zõos sẽn loogd to-to wã.Bɩ nin-wẽnsã sãam Wẽnnaam taoore,+wa siribd* sẽn yẽnegd bugum taoor to-to wã.
3 La bɩ nin-tɩrsã kɩdme.+Bɩ b maan sũ-noog wʋsg Wẽnnaam taoore.Bɩ b kɩdem sũ-noogo.
4 Yɩɩl-y Wẽnnaam yĩnga. Yɩɩl-y n pẽg-y-yã a yʋʋrã.+
Yɩɩl-y Soab ning sẽn pasgd we-rasempʋɩɩgã sẽn yaa tẽn-nabã* yĩnga.
A yʋʋr la a Zah!*+ Kɩdm-y-yã a taoore!
5 Wẽnnaam bee a zĩ-sõngẽ wã,+n yaa kɩɩbs* ba la pʋg-kõap koagenda.*+
6 Wẽnnaam kõta neb nins sẽn pa tar sõangdbã roog tɩ b zĩndi.+A yiisda sẽn be-b bãens rotẽ wã, n kɩtdẽ tɩ b paamd paoongo.+
La neb nins sũy sẽn diglmã* segd n vɩɩmda tẽn-koɛɛng zugu.+
7 Mam Wẽnnaam, yãmb sẽn wa n lʋɩ y nin-buiidã taoorã,*+yãmb sẽn wa n pasgd we-rasempʋɩɩgã, (Sela)
8 tẽngã rigimdame.+Saagã nii Wẽnnaam yĩnga.Sinayi-kãngã rigimda Wẽnnaam yĩnga, Israyɛll Wẽnnaamã yĩnga.+
9 Mam Wẽnnaam, yãmb kɩtame tɩ saagã ni wʋsgo.Yãmb kɩtame tɩ y nin-buiidã* sẽn da ya wã lebs n paam pãnga.
10 B zĩnda yãmb fu-rotẽ wã.+Mam Wẽnnaam, yãmb sõmblmã yĩnga, yãmb gesa naong rãmbã yelle.
11 A Zeova kõta noore.Pagb nins sẽn moond koe-noogã yaa tãb-biis kʋʋngo.+
12 Rĩm-dãmbã ne b tãb-biis zoetame.+ B zoetame!
Pag ning sẽn pa yirã me paama pʋɩɩr te-zɛɛdmã pʋgẽ.+
13 Baa yãmb a rapã sẽn da gãe sik-zĩigã bug-rãmb sʋkã,*yãmb na n paama marwall t’a pɩgsã bolg ne wanzuri,t’a kõbdã yaa ne sãnem halaale.*
14 Sẽn-tõe-a-fãa wã sẽn wa n sãeeg soolmã rĩm-dãmbã,+sa-lamd rʋʋga Zalmon zugu.*
15 Basan tãngã+ yaa Wẽnnaam tãnga.*Basan tãngã yaa tãng sẽn tar zĩis wʋsg sẽn lugi.
16 Yãmb a tãens sẽn tar zĩis wʋsg sẽn lugi, bõe yĩng tɩ y getWẽnnaam tãngã a sẽn yãk tɩ yaa a zĩigã+ ne sũ-kiiri?
Sɩd-sɩda, a Zeova na n zĩnda be wakat fãa yĩnga.+
17 Wẽnnaam zabr saar-dãmbã* yaa tus ka tɛka,+ n pa tõe n sõd n sa ye.
A Zeova yii Sinayi n kẽng zĩ-sõngẽ wã.+
18 Yãmb dʋʋ yĩngri.+Yãmb zãa yembs n looge.Yãmb yãka kũun sẽn yaa rapa.+Mam Wẽnnaam a Zah, yãmb yãka baa neb sũy sẽn diglmi,+ sẽn na yɩl n zĩnd b sʋka.
19 Bɩ a Zeova paam pẽgre, yẽ sẽn yaa soab ning sẽn tʋkd tõnd zɩɩbã daar fãa wã.+A yaa Wẽnnaam sẽn yaa tõnd fãagda. (Sela)
20 Wẽnnaam sɩd-sɩdã yaa tõnd Wẽnnaam sẽn fãagde.+A Zeova sẽn yaa Zu-soab sẽn ka to wã kɩtdame tɩ d põsd kũum.+
21 Wẽnnaam na n wãa a bɛɛbã zutu.A na n wãaga ned ning fãa sẽn ket n be* a taalã pʋgẽ wã+ zu-wanga.
22 A Zeova yeelame: “Mam na n tall-b lame n yi Basan+ n wa.Mam na n yiis-b-la mogrã zĩ-zulumsẽ wã,
23 sẽn na yɩl tɩ bɛɛbã zɩɩm lim y naoã,+la tɩ y baasã zɩlma wã lɛg b zɩɩmã.”
24 Mam Wẽnnaam, b nee yãmb nebã sẽn tong taabã.B nee mam Wẽnnaamã sẽn yaa mam Rĩmã nebã sẽn tong taab n dabd zĩ-sõngẽ wã.+
25 Yɩɩn-yɩɩndbã bee taoor n kẽnda, tɩ sẽn wẽed-b yʋʋm-teed nins sẽn tar rissã pʋgd-ba.+Pʋg-sadb sẽn wẽed bembend*+ n be sul a yiibã sʋka.
26 Pẽg-y Wẽnnaam kʋʋngã sẽn tigmã sʋka.Yãmb a neb nins Israyɛll Yẽbgdã* sẽn naanã,+ pẽg-y-yã a Zeova.
27 Be, a Bẽnzame+ sẽn yaa yao-zʋʋgã tõog-b lame.Zida nanambsã ne b kʋʋngã sẽn maand bʋʋrã,la Zabulõ nanambsã ne Naftali nanambsã me tõog-b lame.
28 Yãmb Wẽnnaamã yiisa noor n wilg tɩ yãmb na n talla pãnga.
Mam Wẽnnaam, yãmb a soab ning sẽn sõng tõndã, wilg-y y pãngã.+
29 Yãmb doogã sẽn be Zerizalɛmmã yĩnga,+rĩm-dãmb na n talla kũun n wa kõ yãmba.+
30 Tãsd-y we-rũms nins sẽn be tãnwĩisẽ wã,lolsã sull+ ne b kambã,n tãag buud toɛy-toɛyã neb sẽn na n wõgemd yãmb taoore, la b wat ne* wanzuri ligd-koeemse.
La yãmb sãeegda buud toɛy-toɛy nins sẽn nong zabã.
31 B na n talla teed sẽn maan ne zũud n yi* Ezɩpt n wa.+Kuus nebã na n yɩɩ tao-tao n kõ Wẽnnaam kũuni.
32 Tẽngã soolem toor-toorã, yɩɩl-y Wẽnnaam yĩnga.+Yɩɩl-y n pẽg-y-yã a Zeova, (Sela)
33 soab ning sẽn pasgd pĩnd wẽndẽ saasẽ saagã.+
A zẽkda a koɛɛg n tãsdẽ, a koɛɛg sẽn tar pãngã.
34 Sak-y n deeg-y tɩ Wẽnnaam tara pãnga.+
A naamã bee Israyɛll zugu.A pãngã bee sa-gãnẽ wã.*
35 Wẽnnaam bee a* ro-kãsengẽ wã, n segd ne zoees la waoogre.+
A yaa Israyɛll Wẽnnaamã,soab ning sẽn kõt nebã pãng la tõogã.+
Pẽg-y Wẽnnaam.
Vẽnegr toor-toore
^ Wõnda yaa bũmb sĩ wã sẽn maand b sɩɩdã yĩnga. A pa zaeed yẽnegr ye.
^ Pa rẽ bɩ, “sẽn zao sawatã.”
^ “Zah” wã yaa a Zeova yʋʋrã bool-koɛɛga.
^ Ebre, “kamb sẽn pa tar ba-rãmba.”
^ Ebre, “bʋ-kaooda.”
^ Bɩ, “tõatbã.”
^ Ebre, “kẽnd y nin-buiidã taoorã.”
^ Ebre, “yãmb pʋɩɩrã.”
^ Bɩ, “kõodr-kõodre.”
^ Pa rẽ bɩ, “yãgã sʋkã.”
^ Bɩ, “ra yaa wa sa-lamd n dʋʋg Zalmon zugu.”
^ Bɩ, “tãn-kãsenga.”
^ Yaa bũmb sẽn wõnd sarɛt tɩ wed-moos tatẽ.
^ Bɩ, “sẽn kẽnd.”
^ Yaa bũmb sẽn wõnd gãngaoogo, tɩ b zãad ne nug n pãbda.
^ Ebre, “Israyɛll ko-bundg zĩigã.”
^ Pa rẽ bɩ, “tabd.”
^ Pa rẽ bɩ, “Rĩm tʋm-tʋmdb n na n yi.”
^ Ebre, “sawatẽ wã.”
^ Ebre, “yãmb.”