1. A Zeova kɩtame tɩ d saagd n na n wa paam bõe?

 A ZEOVA kɩtame tɩ d saagd n na n wa vɩɩmd wakat sẽn kõn sa. Woto yaa bũmb sẽn be yamleoogo. Neb kẽer saagdame n na n tɩ vɩɩmd saasẽ, n lebg malɛgs sẽn tar yĩng sẽn pa kiidi. (1 Kor. 15:50, 53) La wʋsgã saagdame n na n wa zems zãnga, n vɩɩmd tẽngã zug wakat sẽn kõn sa yĩnga, laafɩ la sũ-noog pʋgẽ. (Vẽn. 21:3, 4) D saagdame n na n tɩ vɩɩmd saasẽ tɩ yaa tẽngã zug me, yaa bũmb sẽn tar yõod wʋsg ne-do.

2. D sẽn saagd tɩ manegr n watã tik bõe zugu, la bõe yĩng tɩ d tõe n yeel woto?

² D gũuda bũmb nins Wẽnnaam sẽn pʋlem tɩ be Biiblã pʋgẽ wã pidsgu, la d bas d yam tɩ na n pidsame. Biiblã sẽn pʋlem tɩ manegr n wat beoog daarã pa na n vaale, bala yaa a Zeova n pʋlme. (Rom. 15:13) D mii bũmb nins a sẽn pʋlmã, la d miẽ me t’a pidsda a sẽn yeel fãa. (Sõd. 23:19) D kɩsa sɩd t’a Zeova ratame n pids bũmb ning fãa a sẽn yeele, la a sɩd tõe n maana rẽ. D sẽn saagd tɩ manegr n watã pa tik vɩʋʋgẽ ye. Tika bũmb d sẽn mi tɩ yaa sɩd zugu.

3. Bõe yell la d na n gom sõs-kãngã pʋgẽ? (Yɩɩn-sõamyã 27:14)

³ D saasẽ Ba wã nong-d lame, la a rat tɩ d kɩs-a sɩda. (Karm-y Yɩɩn-sõamyã 27:14.) D sã n sɩd saagd tɩ manegr n wate, na n sõng-d lame tɩ d tõog toogo, la d tall raood la sũ-noogo, sẽn wa n yaa zu-loɛɛg ning fãa. Bɩ d ges rẽ sẽn tõe n kogl-d to-to. D na n deng n yãame tɩ d sẽn saagd tɩ manegr n watã wõnda baare, la kut pugla. Rẽ poore, d na n yãa d sẽn tõe n maane, tɩ sõng-d tɩ d ket n tẽed tɩ manegr n wate.

4. Bõe yĩng tɩ d tõe n yeel tɩ d sẽn saagd tɩ manegr n watã yaa wa baare? (Ebre-rãmbã 6:19)

⁴ Lɛtr ning tẽn-tʋmd a Poll sẽn gʋls n tool Ebre rãmbã pʋgẽ, a yeelame tɩ d sẽn saagd tɩ manegr n watã wõnda baare. (Karm-y Ebre-rãmb 6:19.) A Poll sẽn da nong n togd soay  ne batayo wã, a ra miime tɩ baar sõngdame tɩ batayo yals zĩ-yɛnga. Daar a ye, a ra bee batayo pʋgẽ, tɩ seb-kãseng yik mogrã zugu. Sebgã sẽn wa n yikã, sẽn da tʋmd-b batayo wã pʋgẽ wã loba baarã koomã pʋgẽ, sẽn na yɩl tɩ koglgã yals zĩ-yɛnga, n da tɩ fão kug-bɛd ye. (Tʋʋ. 27:29, 39-41) Wala baare, d sẽn saagd tɩ manegr n watã sõngda tõnd tɩ d kell n gãd a Zeova kãn-kãe, d sã n wa segd zu-loees sẽn wõnd seb-kãsemse. A leb n sõngda tõnd tɩ d tall sũur pʋgẽ bãane. Tẽeg-y t’a Zeezi ra pĩnd n togsame tɩ b na n namsa tõnd d tẽebã yĩnga. (Zã 15:20) Dẽnd d sã n bʋgsd bũmb ning d sẽn saagd n na n wa paam beoog daarã zugu, sõngd-d lame tɩ d ket n tũud a Zeova.

5. Wãn to la a Zeezi sẽn da saagd n na n wa paam bũmb ningã sõng-a t’a yals kãn-kãe kũumã taoore?

⁵ D ges a Zeezi sẽn da saagd n na n wa paam bũmb ningã sẽn sõng-a t’a kell n yals kãn-kãe, baa ne a sẽn da mi t’a na n wa kii kũ-toaagã. Yʋʋmd 33 Pãntekotã daare, tẽn-tʋmd a Pɩyɛɛr goma bãngr-gomd ning sẽn be Yɩɩn-sõamyã sebrã pʋgẽ wã yelle, sẽn wilgd a Zeezi manesmã la a tagsgã sẽn da yaa to-to. Be, b yetame yaa: “M na n teega Wẽnnaam m vɩɩmã tõre, bala yãmb pa na n bas maam Yaoogã pʋgẽ, wall y bas y sɩd soabã t’a põog ye. . . . Y na n kõo maam sũ-no-kãseng y nengẽ.” (Tʋʋ. 2:25-28; Yɩɩn. 16:8-11) Baa ne a Zeezi sẽn da mi tɩ b na n kʋ-a lame wã, a ra kɩsa sɩd tɩ Wẽnnaam na n vʋʋg-a lame, la t’a na n paam n le tɩ zĩnda ne a Ba wã saasẽ.—Ebre. 12:2, 3.

6. Bõe la saam-biig a ye yeel saagrã wɛɛngẽ?

⁶ D saam-biisã la d saam-bi-pogsã sẽn saagd tɩ manegr n watã, sõng-b lame tɩ b tõog toogo. D gom saam-biig a ye sẽn maan sɩd ne a Zeova yelle. A yʋʋr la a Leonard Chinn, n da be Ãngeletɛɛre. Dũni gill pipi zabrã sasa, b yõk-a lame n kẽes bãens roogo, a sẽn zãgs t’a pa na n kẽ sodaarã yĩnga. B pag-a-la a yembr n kaoos kiis a yiibu, la rẽ poore, b modg-a lame t’a tʋm tʋʋm-wɛgla. A wa n yeelame yaa: “Bũmb ning sẽn paam maamã sõng-m lame tɩ m bãng tɩ sẽn na yɩl n tõog toogo, yaa tɩlɛ tɩ d saagd tɩ manegr n wate. D paamame t’a Zeezi ne tẽn-tʋmdbã la no-rɛɛsdbã kõ-d mak-sõngo. D tara bũmb nins Wẽnnaam sẽn pʋlem tɩ be Biiblã pʋgẽ wã me. Woto fãa kɩtame tɩ d sɩd saagd tɩ manegr n wate, la sõngd tõnd tɩ d tõogd toog namsg wakate.” A Leonard sẽn da saagd tɩ manegr n watã, ra yaa wa baar sẽn sõng-a t’a yals kãn-kãe. Tõe n sõnga tõnd me tɩ d yals kãn-kãe.

7. Wãn to la toogã tõe n kɩt tɩ d ket n tẽed tɩ manegr n wate? (Rom dãmbã 5:3-5; Zak 1:12)

⁷ D sẽn ne a Zeova sẽn sõngd tõnd to-to toog sasa wã, kɩtame tɩ d bãng tɩ d tata a yam, la d ket n tẽed tɩ manegr n wate. (Karm-y Rom dãmb 5:3-5; Zak 1:12.) D sẽn tẽed tɩ manegr n watã paama pãng n yɩɩd d sẽn wa n bãng sɩdã paalmã. A Sʋɩtãan datame tɩ toogã loog d nugu. La ne a Zeova songre, d na n tõog n kell n yalsa kãe-kãe toog fãa sasa.

8. Bõe yĩng tɩ d tõe n yeel tɩ d sẽn saagd tɩ manegr n watã yaa wa kut pugla? (1 Tesalonik rãmbã 5:8)

⁸ Biiblã leb n yetame tɩ d sẽn tẽed tɩ manegr n watã yaa wa kut pugla. (Karm-y 1 Tesalonik rãmb 5:8.) Sodaag ningda kut pugla, tɩ bɛɛbã ra wa lobg bũmb tɩ pogl a zugã ye. D sẽn zabd ne a Sʋɩtãanã, yaa tɩlɛ tɩ d kogl d yamã la d tagsã wã. Bala a tũnugda ne manesem buud toor-toore, n dat tɩ d tall tags-yoodo. Wa kut pugl sẽn kogend sodaag zug to-to wã, d sẽn tẽed tɩ manegr n watã kogenda d yamã la d tagsã wã, tɩ d ket n maand sɩd ne a Zeova.

9. Neb nins sẽn pa tẽed tɩ manegr n watã manesem yaa wãna?

 ⁹ D sẽn saagd n na n wa vɩɩmd wakat sẽn kõn sa wã sõngda tõnd tɩ d maand sẽn tat Wẽnnaam yam. La d tẽebã pãng sã n booge, tõe n kɩtame tɩ tags-kɛg kẽ d yamẽ wã, tɩ d wa pa le saagd tɩ d na n paama vɩɩm sẽn kõn sa wã ye. D ges sẽn yɩ to-to ne pĩnd wẽndẽ Korẽnt kiris-neb kẽere. B ra pa le tẽed kũum vʋʋgrã, sẽn yaa bũmb Wẽnnaam sẽn pʋlem tɩ tar yõod wʋsgã ye. (1 Kor. 15:12) A Poll yeelame tɩ neb nins sẽn pa saagd n na n wa vɩɩmd wakat sẽn kõn sa wã baoodame n na n pids b mensã raab masã menga. (1 Kor. 15:32) Rũndã-rũndã, neb wʋsg sẽn pa tẽed Wẽnnaam pʋlemsã maanda b sẽn tõe fãa n noogd b yõore, n pa tagsd beoog yell ye. La tõnd yẽ kɩsa sɩd ne bũmb nins Wẽnnaam sẽn pʋlmã. D sẽn saagd tɩ manegr n watã yaa wa kut pugl sẽn kogend d yamã, tɩ d ra wa maan bũmb sẽn tõe n sãam tõnd ne a Zeova zoodã, wala makre, n tagsd d mengã yell bala.—1 Kor. 15:33, 34.

10. D sã n saagd tɩ manegr n wate, wãn to la rẽ tõe n sõng-d tɩ d zãag d meng ne tags-kɛga?

¹⁰ D sẽn saagd tɩ manegr n watã sẽn yaa wa kut puglã tõe n sõng-d lame tɩ d ra wa tags tɩ d pa tol n tõe n ta a Zeova yam ye. Wala makre, neb kẽer yetame yaa: ‘M pa tol n tõe n wa naag neb nins sẽn na n wa vɩɩmd wakat sẽn kõn sa wã ye. M pa segd ne rẽ ye. M pa tol n tõe n maan Wẽnnaam sẽn dat tɩ m maanã ye.’ Tẽeg-y t’a Zoob zoa a Elifaaz togsa a Zoob goam a woto buudu. A Elifaaz yeelame yaa: “Ninsaal sẽn yaa kiidã yaa bõe n na n yɩ yɩlemde?” Rẽ poore, a goma Wẽnnaam yell n yeel yaa: “Ade, bãmb pa kɩs b malɛgsã sɩd ye. La baa saasã pa yɩlemd bãmb nifẽ ye.” (Zoob 15:14, 15, MN) Ad yaa zirẽ tɛkẽ! Tẽeg-y tɩ yaa a Sʋɩtãan n dat tɩ y tags woto. Y sã n tagsd woto, na n kɩtame tɩ y wa pa le tẽed tɩ manegr n wat ye. Woto yĩnga, zãag-y y mens ne zirẽ a woto buudu, la y kell n tagsd a Zeova pʋlemsã yell n tɩ yɩɩda. Ra tol-y n maan-y sãmbs t’a Zeova ratame tɩ y wa paam n vɩɩmd wakat sẽn kõn sa, la t’a na n sõng-y lame tɩ y sɩd wa paam rẽ.—1 Tɩm. 2:3, 4.

11. Bõe yĩng tɩ d segd n tall sũ-mare, n gũ wakat ning a Zeova sẽn na n wa pids a pʋlemsã?

¹¹ Pa wakat fãa la yaa nana tɩ d ket n saagd tɩ manegr n wat ye. D tõe n wa yãgdame n dat tɩ Wẽnnaam pids bũmb nins a sẽn pʋlmã. La a Zeova vɩɩ wakat fãa. Dẽnd a sẽn get wakatã to-to wã pa wa tõnd ye. (2 Pɩy. 3:8, 9) A na n pidsa bũmb nins a sẽn pʋlmã tɩ zems kɛpɩ. La tõeeme n pa yɩ wa tõnd sẽn tẽedã ye. Bõe n tõe n sõng-d tɩ d ket n saagd tɩ manegr n wate, la d tall sũ-mar n gũud wakat ning Wẽnnaam sẽn na n pids a pʋlemsã zãngã?—Zak 5:7, 8.

12. Wa Ebre-rãmb 11:1, 6 sẽn wilgdã, yɩl n tall saagr tɩ manegr n wate, yaa tɩlɛ tɩ d tẽ bõe?

¹² D sã n kell n tall zood sõma ne a Zeova sẽn yaa soab ning sẽn pidsd a pʋlemsã, na n sõng-d lame tɩ d kell n kɩs sɩd tɩ manegr n wate. Sẽn paase, sẽn na yɩl n tall saagr tɩ manegr n wate, d segd n tẽedame t’a Zeova beeme, la t’a yaa ‘neb nins sẽn baood yẽ ne b sũy fãa wã roanda.’ (Karm-y Ebre-rãmb 11:1, 6.) D sã n kɩs sɩd t’a Zeova sɩd beeme, d na n maneg n basa d yam t’a na n pidsa bũmb nins fãa a sẽn pʋlmã. Bɩ d ges bũmb kẽer d sẽn segd n maan tɩ paas tõnd ne a Zeova zoodã pãnga, la sõng-d tɩ d maneg n tẽed tɩ manegr n wate.

13. Bõe la d tõe n maan n paam n lebg Wẽnnaam zoa?

¹³ Pʋʋsd-y-yã a Zeova, la y karemd a Gomdã. Baa ne d sẽn pa ne a Zeova wã, d tõe n yɩ a zoa. D tõe n tũnugdã ne pʋʋsgã n gomd ne-a, n bas d yam t’a na n kelg-d  lame. (Zer. 29:11, 12) D kelgda Wẽnnaam, d sã n karemd a Gomdã, la d bʋgsd a zugu. D sã n karemd kibay sẽn wilgd bũmb nins a Zeova sẽn maan n sõng neb nins sẽn maan sɩd ne-a pĩnd wẽndẽ wã, d na n maneg n saagdame tɩ manegr n wate. Bũmb nins fãa b sẽn gʋls tɩ be Wẽnnaam Gomdã pʋgẽ wã, ‘b gʋls-a-la tõnd zãmsg yĩnga, sẽn na yɩl tɩ ne tõnd tõog-toogã maasem, la ne Gʋls-sõamyã belsgã maasem, d tõe n saag tɩ manegr n wate.’—Rom. 15:4.

14. Bõe yĩng tɩ d segd n bʋgsd bũmb nins a Zeova sẽn maan n kõ neb a taabã zugu?

¹⁴ Bʋgsd-y-yã a Zeova sẽn zoe n pids a pʋlemsã to-to wã zugu. D ges bũmb ning a Zeova sẽn maan n kõ a Abrahaam ne a Saara wã. B ra kʋʋla wʋsgo, n da pa tõe n paam biig ye. La Wẽnnaam pʋlem-b lame tɩ b na n wa n paama biiga. (Sɩng. 18:10) A Abrahaam manesem yɩɩ wanã? Ad Biiblã sẽn yete: “A ra kɩsa sɩd t’a na n yɩɩ buud wʋsg ba.” (Rom. 4:18) Baa ne a Abrahaam sẽn da pa mi Wẽnnaam pʋlengã sẽn na n pids to-to wã, a ra kɩsa sɩd t’a Zeova na n pidsa a pʋlengã. La a Zeova pa sãam a Abrahaam sũur ye. (Rom. 4:19-21) Kiba-kãngã wilgdame tɩ d tõe n kɩsa sɩd t’a Zeova na n pidsa a pʋlemsã fãa, baa d sã n wa getame tɩ yaa wa a pa tõe ye.

15. Bõe yĩng tɩ d segd n tagsd bũmb nins Wẽnnaam sẽn maan n kõ-dã zugu?

¹⁵ Tagsd-y bũmb nins a Zeova sẽn zoe n maan n kõ yãmbã zugu. Tags-y pʋlems nins sẽn be Wẽnnaam Gomdã pʋgẽ wã pidsg sẽn zoe n naf yãmb mengã to-to. Wala makre, a Zeezi yeelame t’a Ba wã na n gesame tɩ d paamd bũmb nins sẽn yaa tɩlɛ ne-d vɩɩmã. (Mat. 6:32, 33) A Zeezi leb n yeelame tɩ d sã n kos a Zeova a vʋʋsem sõngã, a na n kõ-d lame. (Luk 11:13) A Zeova pidsa pʋlem-kãensã. Tõe tɩ y tagsda pʋlems a taab a Zeova sẽn pids tɩ naf yãmb yelle. Wala  makre, a pʋlmame t’a na n kõ-y-la sugri, t’a na n belsa yãmba, la t’a na n kõ-y-la bũmb nins sẽn yaa tɩlɛ y tẽebã kengr yĩnga. (Mat. 6:14; 24:45; 2 Kor. 1:3) Y sã n tagsd bũmb nins Wẽnnaam sẽn zoe n maan n kõ yãmbã zugu, y na n maneg n kɩsa sɩd t’a na n pidsa bũmb nins a sẽn pʋlem t’a na n wa maan n kõo yãmbã.

16. Bõe yĩng tɩ d sẽn saagd tɩ manegr n watã yaa kũun sẽn yaa sõma wʋsgo?

¹⁶ D sẽn saagd n na n wa vɩɩmd wakat sẽn kõn sa wã yaa kũun-kãseng Wẽnnaam sẽn kõ-do. D gũuda beoog daar sẽn yaa sõma wʋsg ne d sũur fãa. D kɩsa sɩd tɩ na n yɩɩ woto. D sẽn saagd n na n wa vɩɩmd wakat sẽn kõn sa wã yaa wa baar sẽn sõngd tõnd tɩ d yalsd kãn-kãe la d tõogd toog zu-loees taoore, namsg taoore, la baa kũum taoore. A leb n yaa wa kut pugl sẽn kogend d tagsa wã, la sõngd tõnd tɩ d tõe n zãag d mens ne sẽn yaa wẽnga, la d maand sẽn yaa sõma. Biiblã sẽn yet bũmb ning beoog daarã wɛɛngẽ wã sõngda tõnd tɩ d bãngd a Zeova sõma n paasdẽ, la wilgd tõnd t’a nong-d-la wʋsgo. D sã n modg tɩ d sẽn saagd tɩ manegr n watã ket n tar pãnga, na n naf-d-la wʋsgo.

17. Bõe yĩng tɩ d tõe n maan sũ-noog ne bũmb ning d sẽn saagd n na n wa paam beoog daarã?

¹⁷ Lɛtr ning tẽn-tʋmd a Poll sẽn gʋls n tool Rom-dãmbã pʋgẽ, a yeel-b lame yaa: “Maan-y sũ-noog ne bũmb ning y sẽn saagd n na n paam beoog daarã.” (Rom. 12:12) A Poll ra tõe n kɩdma sũ-noogo, bala a ra kɩsa sɩd t’a sã n kell n maan sɩd ne a Zeova, a na n wa paam n vɩɩmda wakat sẽn kõn sa saasẽ. Tõnd me tõe n maana sũ-noog ne bũmb ning d sẽn saagd n na n wa paam beoog daarã, bala d kɩsa sɩd t’a Zeova na n pidsa a pʋlemsã. Yɩɩn gʋlsdã yeelame yaa: “Sũ-noog soab la ned ning . . . sẽn teeg a Wẽnnaam a Zeova wã. . . . Soab ning sẽn yaa sɩd soab wakat fãa wã.”—Yɩɩn. 146:5, 6. MN.