Ãnda la d segd n pʋʋs bɩ n gom ne?

WẼNNAAM bobla malɛgsã tʋʋm kẽere. Wala makre, a bobla a Zezi tẽngã zug naam, la a kɩt tɩ malɛgs kẽer sõngd n get koe-noogã mooneg yelle. (Wilgri 14:6) La a pa rɩk pʋʋsgã kelgr n bobl b baa a yembr ye. Yẽ mengã n kelgd pʋʋsgã. Yaa Wẽnnaam bal la d segd n pʋʋse.

A Zeova “wʋmda pʋʋsgo.” (Yɩɩl Sõamyã 65:3) A kelgda tõnd pʋʋsgã, la a reegdame me. Pʋʋsgã wɛɛngẽ, tʋm-tʋmd a Zã gʋlsa a tẽed-n-taasã n yeel woto: “Tõnd sã n kos bũmb sẽn zems bãmb daabo, b kelgda tõndo. La tõnd sã n mi tɩ b kelgda tõnd ne bũmb ning tõnd sẽn kotã, dẽ, tõnd miime tɩ tõnd paamda bũmb ning tõnd sẽn kos bãmbã.”—1 Zã 5:14, 15.

Wẽnnaam malɛgsã pa rat tɩ d pʋʋs bãmb bɩ n bao n na n gom ne-b ye. B sak n deegame tɩ yaa Wẽnnaam bal la d segd n pʋʋse. Wakat ning menga, Wẽnnaam tũnugda ne bãmb n leokd tõnd pʋʋsgã. Wala makre, no-rɛɛs a Daniɛll sẽn pʋʋs a Zeova Zerizalɛm sãoongã wɛɛngẽ wã, a  Zeova leoka a pʋʋsgã, n tʋm malɛk a Gabriyɛll t’a tɩ togs-a koɛɛg sẽn keng a raoodo.—Daniɛll 9:3, 20-22.

Sẽn ki-bã tõe n goma ne tõnd bɩ?

Rẽ yĩnga d segd n bao n na n goma ne sẽn ki-bã bɩ? Kibay wʋsg pʋgẽ, d wʋmda neb sẽn yet tɩ bãmb goma ne ned sẽn ki. Wala makre, Irlãnde, kinkir-bag n kẽng pag a ye nengẽ n tɩ yeel-a tɩ yẽ goma ne a sɩd a Fred yʋngẽ. A Fred yaool n da zoe n kii na maan semen a wãna. Kinkir-bagã togsa yɛl a Fred pagã sẽn da tẽed tɩ yaa yẽ a ye bal n mi, n yeel tɩ yaa a Fred n togs yẽnda. Dẽnd lebga nana t’a Fred pagã tẽ t’a Fred tɩ vɩɩ zĩig a to, n dat n tũnug ne sãanã n gom ne yẽnda. La tagsg a woto kɩɩsda Biiblã sẽn yet bũmb ning sẽn ki-bã wɛɛngẽ wã.—Ges-y zĩ-gũbrã sẽn be tẽngrã.

Bõe yĩng tɩ kibay woto buud beẽ? Bũmb a ye zĩn-dãmbã sẽn maand sẽn na yɩl n belg nebã yaa b sẽn ledgd sẽn ki-bã zĩigẽ sẽn na yɩl tɩ nebã tẽ tɩ b ket n vɩɩme wã. A Fred nengẽ wã yɩɩ woto. B maanda woto sẽn na yɩl tɩ nebã ra tẽ Biiblã sẽn yetã, la b ra kɩs Wẽnnaam sɩd ye. Sãmbg sẽn ka be, a Sʋɩtãan ne zĩn-dãmbã belgda nebã “ne ziri bõn-bãn buud fãa la bãn ne bõn-yɛɛsdse.” B waa “ne belgr buud fãa sẽn yaa wẽnga, n belg neb nins sẽn na n sãamã.”—2 Tesalonik rãmba 2:9, 10.

Vẽenega, kinkir-bagbã, sẽn boond-b kɩɩmsã ne neb nins fãa sẽn tʋmd ne-bã tẽedame tɩ sɩd yaa neb nins sẽn ki wã la  b sẽn mi n gomd ne wã. La b sã n sɩd wʋma koees me, pa sẽn ki-bã koees ye. Yaa zĩn-dãmbã sẽn yaa a Zeova bɛɛbã la b gom ne. Woto, neb me n be n tẽed tɩ b tũuda Wẽnnaam, la b yaool n tudgame. Tʋm-tʋmd a Poll yeelame tɩ neb nins sẽn pa mi Wẽnnaamã “sẽn kʋʋd maandã, b kʋʋda zĩn-dãmbã yĩnga, la ka Wẽnnaam yĩng ye.”—1 Korẽnt dãmba 10:20, 21.

Tõnd sẽn mi tɩ d tõe n pʋʋsa Wẽnnaam sẽn yaa pãng sẽn ka to soabã, sẽn nong tõnd la a get d yellã, bõe yĩng masã tɩ d na n pʋʋs ned a to bɩ bũmb a to? Biiblã kõta tõnd bas-m-yam woto: “Zusoabã nif geta dũniyã zĩigã fãa n dat n sõng neb nins sẽn dat Wẽnnaam ne b sũyã fãa wã.”—2 Kibaya 16:9.

[Foto, seb-neng a 9]

Tõnd sẽn mi tɩ d tõe n pʋʋsa Wẽnnaam sẽn yaa pãng sẽn ka to soabã, sẽn nong tõnd la a get d yellã, bõe yĩng masã tɩ d na n pʋʋs ned a to bɩ bũmb a to?

[Zĩ-gũbri/Foto, seb-neng a 8]

Sɩda, la Ziri

A SƲƖTÃAN SƖD BEEME: SƖDA

“Sʋɩtãanã toeemda a meng n lebgd vẽenem malɛka.”—2 Korẽnt dãmba 11:14.

“Yõk-y y mens n gũusi; tɩ bõe, yãmb bɛ wã sẽn yaa Sʋɩtãanã gõoda wa gɩgemd sẽn kelemd n baood a sẽn tõe n paam a soab n sãam.”—1 Pɩɛɛr 5:8.

“Ned ning sẽn maand yel-wẽna, a yaa Sʋɩtãan neda, tɩ bõe, Sʋɩtãanã maanda yel-wẽn hal sɩngre tɩ ta masã.”—1 Zã 3:8.

“Dẽ yĩnga, bɩ y sak Wẽnnaam. Kɩɩs-y Sʋɩtãanã, la yẽ na zoe n bas yãmba.”—Zak 4:7.

“Sʋɩtãanã . . . yaa nin-kʋʋd hal sɩngre, la yẽ ka paad sɩd pʋgẽ ye, sɩdã sẽn ka be yẽ pʋgẽ wã yĩnga. Yẽ sẽn yagd ziri, yẽ gomda a meng sũur pʋgẽ dẽnda, tɩ bõe, yẽ yaa ziri yagda, la ziri ba.”—Zã 8:44.

NED KŨUM POORE, A TARA SƖƖG SẼN KET N VƖYA: ZIRI

“Yaa ne fo neng tʋʋlg la f na n paam dɩɩb n dɩ n wa tãag f sẽn na n lebg tẽngã tom fo sẽn yi a pʋgẽ wã. Tɩ bõe, fo yaa tẽng tom, la fo na n le lebga tẽng tom yɛsa.”—Sɩngre 3:19.

“Nin-vɩɩs miime tɩ b na n kiime. La kũum ka mi bũmb ye.”—Koɛɛg Soaba 9:5.

“Bũmb ning fo nug sẽn tõe n maan ne fo pãngã, bɩ f maan-a. Tɩ bõe, tʋʋmd ne tagsg la yam ne bãngr ka be kɩɩm-kulg fo sẽn dabd zĩig ningã ye.”—Koɛɛg Soaba 9:10.

“Bãmb na n maana yõore, n leb n leb tẽngã tomẽ. Baraar bala bãmb tagsg na n sɛɛme.”—Yɩɩl Sõamyã 146:4.

MALƐG-SÕMSÃ GETA D YELLE: SƖDA

“Zusoabã malɛk rãmb gũbgda neb nins sẽn zoet bãmbã n fãagd bãmba.”—Yɩɩl Sõamyã 34:8; 91:11.

“Malɛk rãmbã fãa ka sɩɩs sẽn yaa tʋm-tʋmdb Wẽnnaam sẽn tʋm tɩ b sõng neb nins sẽn na n paam fãagrã bɩ?”—Hebre dãmba 1:14.

“La mam yãa malɛk a to sẽn yɩgd n pɩʋʋgd [saasã], la a tara koe-noog sẽn ka sɛt n na n moon neb nins sẽn be dũniyã soolem fãa la buud fãa la goam toɛy-toɛyã fãa la nebã fãa. La yẽ zẽka a koɛɛgã n yeele: ‘Bɩ y zoe Wẽnnaam la y waoog bãmba.’ ”—Wilgri 14:6, 7.

A ZEZI ZEMA WẼNNAAM: ZIRI

“La mam datame tɩ yãmb bãng tɩ Kirist yaa ned kam fãa zugu, la tɩ pag zug yaa a sɩda, la tɩ Kirist zug yaa Wẽnnaam.”—1 Korẽnt dãmba 11:3.

“La bũmb fãa sã n wa sak bãmba, dẽ, Biigã meng na sak sẽn kɩt-a tɩ bũmb fãa sak bãmbã, tɩ Wẽnnaam yɩ fãa ne fãa.”—1 Korẽnt dãmba 15:28.

“Mam yeta yãmb sɩd-sɩda, tɩ Biigã ka tõe n maan bũmb ne a meng pãng ye, yaa a sẽn yã t’a Ba maand bũmb ningã bal la a maanda.”—Zã 5:19.