KẼER tagsdame tɩ ned sã n baood n na n bãng Wẽnnaam manesem võore, pa zems ye. Tõe tɩ b getame tɩ sẽn maand-a woto paoogda Wẽnnaam. Yãmb me tagsda woto bɩ?

Sã n yaa rẽ bɩ y bãng tɩ wẽn-tũudb wʋsg bao n na n bãnga Wẽnnaam manesem kẽer võore. Ad sogsg a wãn sãnda sẽn sok Wẽnnaam:

Nin-tɩrg a Zoob soka woto: “Yaa bõe tɩ nin-wẽns paamd yõ-wok tɩ b pãng paasdẽ?”—Zoob 21:7.

No-rɛɛs a Habakuk soka woto: “Yaa bõe tɩ y sĩnd n get nin-wẽnsã tɩ b sãamd neb nins sẽn yaa sõma n yɩɩd bãmbã?”—Habakuk 1:13.

A Zezi Kirist soka woto: “Mam Wẽnnaam, mam Wẽnnaam, yaa bõe tɩ yãmb bas maam?”—Matɩe 27:46.

Y sã n karem b ned kam fãa kibare, y mikdame tɩ b sẽn pelg b pʋs n sok woto wã pa yik Wẽnnaam a Zeova * sũur ye. La rẽ pa lingr ye. Sɩd me, d sã n kos Wẽnnaam bũmb sẽn yaa tɩlae ne d yĩnsã laafɩ, a sũur pa yikd ye. A kõt-d lame. (Matɩe 6:11, 33) Woto me, bũmb sã n yaa tɩlae sẽn na yɩl tɩ d tõog n kogl d yamã la d sũurã, a sakd n wilg-d lame. (Filip rãmba 4:6, 7) A Zezi yeela a karen-biisã woto: “Bɩ y kos tɩ b na kõ-yã.” (Matɩe 7:7) Y sã n bao n bãng sẽn sɩng to-to t’a Zezi wa yet woto wã, y mikdame tɩ pa kos bũmb nins sẽn yaa tɩlae ne d yĩnsã yell bal la a ra gomd ye, yaa bao sogsg sẽn tar yõod leoor me.

Yãmb sã n paam sor n na n sok Wẽnnaam sokre, sogsg nins sẽn be tẽngrã sʋka, bʋg la y na n sok-a?

• Vɩɩmã yõod yaa bõe?

• Bõe n be kũum poore?

• Bõe yĩng tɩ ninsaalbã namsdẽ?

Y tõe n bãnga Wẽnnaam sẽn leokd sogs-kãensã to-to wã Biiblã b sẽn boond tɩ Gʋlsg Sõamyã pʋgẽ, bala, “Gʋlsg Sõamyã zãng yaa Wẽnnaam n kõ tõndo.” (2 Tɩmote 3:16) Bɩ d ges sẽn sɩng to-to tɩ kẽer wa sokd b mens sogsg nins sẽn be zugẽ wã, la d bao n bãng Biiblã sẽn leokd sogs-kãens to-to wã me.