1, 2. Bõe la b yeel kankamã zug tɩ tõe n naf-do?

YÃMB nonga kankam bɩ? Pĩnd wẽndẽ, Israyɛll nebã ra nonga kankama. (Nah. 3:12; Luk 13:6-9) Rũndã-rũndã, tẽns wʋsg pʋsẽ, nebã senda kankamse. Kankam dɩlgda ninsaal yĩngã sõma. Neb kẽer pʋd n yeelame t’a paasda sũurã laafɩ.

² Vugri, a Zeova maka neb ne kankama. A ra pa rat n wilg kankam sẽn tõe n paas ninsaal laafɩ to-to wã ye. Yaa bũmb nins sẽn be b sũyã pʋsẽ wã yell la a ra gomda. A sẽn yeelã tõe n nafa tõnd la d roagdbã. D sã n wa vaeesd a sẽn yeel bũmb ningã sõs-kãngã pʋgẽ, bɩ d bao n bãng yam ning kiris-nebã sẽn tõe n dɩke.

3. Kankam nins yell b sẽn gomd Zeremi sak 24 soabẽ wã makda bõe?

³ Bɩ d reng n gom bũmb Wẽnnaam sẽn yeel kankamã wɛɛngẽ no-rɛɛs a Zeremi wakatẽ wã. Yʋʋmd 617 sẽn deng a Zezi rogmã tɩ Zida nebã ra maanda yɛl a Zeova sẽn kisi. Wẽnnaam vẽnega a Zeremi t’a yã bũmb ning sẽn na n paam Zida wã, n kɩt t’a yã pet a yiibu, t’a ye pid ne kankam sẽn yaa “sõma wʋsgo,” t’a to wã pid ne kankam sẽn “ka sõma baa bilf ye.” (Karm-y Zeremi 24:1-3.) Kankam nins sẽn pa sõma wã makda rĩm a Sedesias ne neb nins sẽn da kɩɩsd Wẽnnaam wa yẽ wã. Ra pa na n kaoos la rĩm a Nebukadnezaar ne a sodaasã wa zaba ne-b ye. La Zida neb kẽer da yaa wa kankam sẽn yaa sõma. Wala makre, a Ezekɩɛlle, a Daniɛll ne a zo-rãmb a tãabã, n paas zʋɩf-rãmb a taab b sẽn da na n wa tall n kẽng yembd Babilon. Nin-kãens sʋkã, kẽer n da na n wa tɩ lebs n me  Zerizalɛm ne a wẽnd-doogã. Kaoosg zugẽ, b sɩd maana woto.—Zer. 24:8-10; 25:11, 12; 29:10.

4. Bõe yĩng tɩ Wẽnnaam sẽn yeel bũmb ning kankam-sõma wã zugã kengd raoodo?

⁴ A Zeova goma neb nins kankam-sõma wã sẽn makdã yell n yeele: “Mam na n kɩtame tɩ b bãng tɩ m yaa b Zusoaba. Bãmb na n yɩɩ mam neba.” (Zer. 24:7) Vɛrse kãngã sɩd kengda raoodo, bala a wilgdame tɩ Wẽnnaam datame tɩ d ‘bãng-a,’ rat n yeel tɩ d yɩ ned sẽn tʋll n bãng-a, la sẽn dat n zĩnd a nin-buiidã sʋka. La f maanda wãn n yɩ ned a woto? Yaa f sẽn na n zãmsd Biiblã la f tũud a sẽn yetã, n tek yam n bas f pĩnd tʋʋmã, n wa rɩk f meng n kõ Wẽnnaam n deeg lisg Ba la Biiga, la vʋʋsem sõng yʋʋr yĩnga. (Mat. 28:19, 20; Tʋʋ. 3:19) Tõe tɩ y zoe n maana woto fãa, wall y kẽnda a Zeova Kaset rãmbã tigissã fãa n dat n wa maan rẽ.

5. Yaa ãnd dãmb yell la a Zeremi ra gomd n yɩɩda?

⁵ Baa d sã n zoe n maana bũmb nins b sẽn sõdgã fãa, segdame tɩ d ket n gũusd ne d yel-manesmã la ne d tʋʋmã. A Zeremi sẽn yeel bũmb ning sũurã wɛɛngẽ wã tõe n sõng-d lame tɩ d bãng d sẽn segd n ket n maand woto wã võore. Yaa sɩd tɩ Zeremi sebrã sags kẽer gomda Zida tẽn-yagsã yelle. La yaa Zida nebã yell la a gomd n yɩɩda. Yɩɩ Zida rĩm-dãmb a nu naam wakate. (Zer. 1:15, 16) A Zeremi goma rapa, pagb la kamb sẽn da zoe n dɩk b mens n kõ a Zeova yelle. Yaa nin-kãensã yaab-rãmb n da sak tɩ bãmb buudã na n yɩɩ Wẽnnaam nin-buiidu. (Yik. 19:3-8) A Zeremi wakatẽ wã, nin-buiidã leb n sakame t’a Zeova la bãmb Zusoaba, n yeel woto: “Ad tõndo, d wata yãmb nengẽ, tɩ yãmb n yaa Zusoab a Wẽnnaam.” (Zer. 3:22) La rẽ yĩnga b ned kam fãa sũur da yaa sõma bɩ?

6. Bõe yĩng tɩ d segd n bao n bãng bũmb ning Wẽnnaam sẽn yeel sũurã zugã võore?

⁶ Logtoɛɛmbã tara teed b sẽn tõe n tall n fees ninsaal sũur n bãng a sã n tara laafɩ, la a sẽn tʋmd to-to wã. La a Zeova yẽ tõe n bãnga ned sẽn yaa a soab a sũur pʋgẽ wã menga. A yeela woto: “Ninsaal sũur tara ziri n yɩɩd bũmb fãa, la a yaa wẽng wʋsgo. Yaa ãnda n tõe n bãng-a? Mam yaa Zusoaba. Mam mii neb sũy tagsg sẽn yaa bũmb ninga. Mam maanda ned fãa wa sẽn zems a manesem ne a tʋʋma.” (Zer. 17:9, 10) Wẽnnaam tõe n bãnga d raabo, d tagsgo, la d sẽn magd n na n maan bũmb ning d vɩɩmã pʋgẽ. Yaa sɩd tɩ Wẽnnaam na n feesa y sũurã. La yãmb me tara y sẽn tõe n maan n bãng y sẽn sɩd yaa ned ning y sũurã pʋgẽ wã.

7. A Zeremi wilgame t’a wakatẽ zʋɩf-rãmbã wʋsg sũy ra yaa wãna?

⁷ Sẽn na yɩl n sõng-d tɩ d bãng d sẽn tõe n fees d sũyã to-to, d sok d mens woto: ‘A Zeremi wakatẽ zʋɩf-rãmbã sũy ra yaa wãna?’ A Zeremi wilgame tɩ baa b sẽn da yaa “neb sẽn kẽ bãong” tɩ wilgdẽ tɩ b lebga Wẽnnaam nin-buiidã, b ra pa tũud a Moiiz tõogã ye. (Zer. 9:24, 25) Sɩd me, b ra pa sakd a Zeova ne b sũy fãa ye.

8, 9. Bõe la zʋɩf-rãmbã wʋsg ra segd n maane?

 ⁸ A Zeova sagla zʋɩf-rãmbã tɩ b “ned kam fãa bas a yel-wẽna, n tek yam.” (Zer. 18:11) Bõe yĩng tɩ b sẽn da maandã ra yaa wẽnga? (Karm-y Mark 7:20-23.) Wẽnnaam vẽnega a Zeremi t’a wilg bũmb ning sẽn kɩt tɩ zʋɩf-rãmbã tʋʋm da yaa wẽnsã. A yeelame tɩ b yaa sũ-kɛgems rãmb la tõtba. B sũyã tʋlsem la b tagsa wã ra pa tat Wẽnnaam yam ye. (Karm-y Zeremi 5:23, 24; 7:24-26.) Wẽnnaam yeel-b-la woto: ‘Bao-y yam-sõma n kõ y mense.’—Zer. 4:4.

⁹ Dẽnd a Zeremi wakatẽ zʋɩf-rãmbã ra pa tũud a Zeova ne b sũy fãa ye. A Moiiz wakatẽ zʋɩf-rãmbã me ra yaa woto. (Tõo. 10:16; 30:6) B ra segd n basa tagsa la tʋlsem nins fãa sẽn kɩt tɩ b pa tũud a Zeova noyã.—Tʋʋ. 7:51.

10. A Davɩɩd mak-sõngã wilgda tõnd bõe?

¹⁰ D pʋʋsda Wẽnnaam bark a sẽn sõng-d tɩ d mi sũur sẽn makd bũmb ningã. La d sẽn zoe n yaa a Zeova nin-buiidã, rẽ yĩnga d segd n maanda yɩɩr d sẽn yaa neb nins d sũyã pʋsẽ wã yĩng bɩ? Tigingã neb fãa la bal tũuda a Zeova ne b sũy fãa, la b zãad b mens sõma. B pa lebgd wa kankam sẽn “ka sõma baa bilf ye.” La baasgo, d tẽeg tɩ nin-tɩrg a Davɩɩd kosa a Zeova woto: “Wẽnnaam, bɩ y fees maam n bãng m sũuri, mak-y maam n bãng m tagsgo, n ges mam sã n tũuda so-wẽnga.”—Yɩɩl 17:3; 139:23, 24.

11, 12. a) Bõe yĩng tɩ tõnd ned kam fãa segd n feesd a menga? b) Bõe la Wẽnnaam pa maande?

¹¹ A Zeova ratame tɩ tõnd ned kam fãa mao n ta a yam, la d kell n yɩ ned sẽn tat a yam. A Zeremi yeelame t’a Zeova feesda nin-tɩrga, la t’a ‘mii sẽn be ninsaal sũur pʋgẽ, la a mi a tagsgo.’ (Zer. 20:12) Saasẽ-pãng-soabã sã n feesda hal baa nin-tɩrg sũuri, rẽ yĩnga pa segd tɩ tõnd fãa feesd d mens ne pʋ-peelem sɩda? (Karm-y Yɩɩl Sõamyã 11:5.) D sã n maand woto, tõe tɩ d mik tɩ d yel-manesem ninga, d tagsg wall bũmb d sẽn magd n na n maan n pa sõma, tɩ wilgdẽ tɩ d sũurã rata manegre. Bõe sẽn pa sõma la d tõe n yã d sũurã pʋgẽ? Wãn to la d tõe n maneg d sũurã?—Zer. 4:4.

¹² A Zeova pa na n modg tõnd tɩ d toeem ye. A sẽn wa n gomd “kankam-sõma” wã yellã, a yeelame t’a ‘na n kɩtame tɩ b bãng’ yẽ. Woto pa rat n yeel t’a na n modg-b lame tɩ b maneg b sũyã ye. Yaa bãmb n segd n wilg tɩ b rat n bãnga Wẽnnaam. Tõnd me tog n maana woto.

13, 14. Wãn to la kiris-ned sũur tõe n wã-a?

 ¹³ A Zezi yeelame tɩ “tags-wẽnse, la nin-kʋʋbo, la yoob buud fãa, la wagdem ne ziri, la kãnegr yita sũur pʋgẽ.” (Mat. 15:19) Wala makre, kiris-ned sã n tar tʋls-wẽnse, a tõe n wa yoome, t’a sã n pa tek yam n kos sugr bɩ a kong Wẽnnaam lohorem wakat fãa yĩnga. La baa a sã n pa yo, a tõe n wa basame tɩ tʋls-wẽns paam pãng a sũurã pʋgẽ. (Karm-y Matɩe 5:27, 28.) Rẽnd tara yõod tɩ d feesd d meng n get d sã n pa tar tʋls-wẽnse. Rẽ yĩnga yãmb mi n gesa pag bɩ rao ne raab sẽn pa tat a Zeova yam bɩ? Sã n yaa rẽ, y pa ne tɩ sũurã rata manegr sɩda?

¹⁴ Kiris-ned pa na n kʋ ned ye. La a tõe n basame t’a sũur sẽn yik ne a tẽed-n-taag paam pãnga, hal t’a wa kisg-a. (Maan. 19:17) Sã n yaa woto, a segd n modg n basa a to wã kisgri.—Mat. 5:21, 22.

15, 16. a) Bõe n tõe n kɩt tɩ kiris-ned sũur wa rat manegre? b) Bõe yĩng tɩ y tagsdẽ t’a Zeova ratame tɩ d sũur yɩ sõma?

¹⁵ Zu-noogo, kiris-neb wʋsg pa tar zu-loe-kãensã ye. La a Zezi goma tags-kɛg yell me. Wala makre, d tõe n tagsdame tɩ rogem yõod yɩɩda bũmb fãa. Yaa sɩd tɩ kiris-nebã segd n nonga b roagdbã, la b ra yɩ wa dũniyã neb sẽn pa tar dogem yĩn-sidgã ye. (2 Tɩm. 3:1, 3) La d tõe n wa nonga d roagdbã tɩ loog noore. Sɩd me, wʋsg yetame tɩ “rogem pa pekd ne koom ye. Kall ne zɩɩm.” Sẽn tagsd-b a woto wã getame tɩ ned sã n beeg b roagda, a beega bãmba. Tẽeg-y-yã a Dina kẽem-dãmbã sũur sẽn yik ne a Sikɛm tɩ b kʋ neb wʋsgã. (Sɩng. 34:13, 25-30) A Absalom me sũ-yikrã yɩɩ sabab t’a kʋ a ba-biig a Amno. (2 Sãm. 13:1-30) Hakɩka, tags-kɛg tõe n kɩtame tɩ ned tʋm tɩ nare.

¹⁶ Yaa sɩd tɩ kiris-neb hakɩkã pa nin-kʋʋdb ye. La b tẽed-n-taag sã n beeg b roagda, wall b sã n tagsdẽ t’a beega b roagda, b sũur tõe n yika ne a soabã. B tõeeme n wa pa rat n kẽng a yiri, wall b reeg-a sãand ye. (Heb. 13:1, 2) La kiris-ned sẽn sɩd nong a tẽed-n-taasã pa maand woto ye. A Zeova mii sẽn be d sũurẽ wã. D sã n tar tags-wẽns a woto, a na n  yãame tɩ d yamã bɩ d sũurã rata manegre. (Zer. 9:24, 25) Tẽeg-y neb nins a Zeova sẽn da yeel tɩ b ‘bao yam-sõma n kõ b mensã’ yelle.—Zer. 4:4.

17. D sã n zoet a Zeova, bõe yĩng tɩ na n sõng-d tɩ d maneg d sũurã?

¹⁷ Y sã n fees y menga, tõe tɩ y mik tɩ y pa le sakd a Zeova noyã tao-tao wa sẽn segdã ye. Tõe tɩ y zoeta neba, y baooda yʋʋr wall ligd tɩ looge, pa rẽ bɩ y lebga tõt wall soog-m-meng soaba. Sã n yaa rẽ bɩ y bãng tɩ woto pa sɩng ne yãmb ye. (Zer. 7:24; 11:8) A Zeremi yeelame tɩ yẽ wakatẽ zʋɩf-rãmb nins sẽn da pa sakd Wẽnnaamã yaa “sũ-kɛgems rãmba, la tõatba.” A paasa woto: “Bãmb sũur ka zoet Zusoabã sẽn kõt bãmb sigr saag ne yaoolem saaga, la sẽn kõt bãmb bõn-bɩʋʋng yʋʋmd fãa wã ye.” (Zer. 5:23, 24) D sã n zoet a Zeova, rat n yeel tɩ d sã n waoogd-a, d na n yiisa wẽng buud fãa d sũurẽ wã. Rẽ na n sõng-d lame tɩ d maneg d sũurã n tõog n maan bũmb ning fãa a Zeova sẽn dat tɩ d maane.

18. Bõe la a Zeova pʋlem neb nins sẽn be kaool-paalgã pʋgẽ wã?

¹⁸ D sã n modgd n maand woto, a Zeova na n sõng-d lame tɩ d ‘bãng-a.’ A pʋlma sẽn paam-b vʋʋsem sõngã zaeeb n be kaool-paalgã pʋgẽ wã woto: “Mam na n ninga m tõodã b pʋ-tẽerẽ, la m gʋls bãmb b sũyã pʋsẽ. Mam na n yɩɩ bãmb Wẽnnaam, la bãmb na n yɩɩ mam neba.” A paasa woto: “Ned ka na n le yeel a yak bɩ a saam-biig t’a bãng Zusoabã ye. Tɩ bõe, sẽn sɩng ne nin-kãsems n tɩ ta nin-bõonegã, fãa na n bãnga maam. Bala mam na n kõo bãmb b yel-wẽnã sugri, n ka le tẽeg b kongrã ye.”—Zer. 31:31-34. *

19. Bark bʋs la kiris-neb hakɩkã gũuda?

¹⁹ D gũuda Wẽnnaam pʋlemsã pidsg ne d sũur fãa. Tõnd fãa segd n bao n bãnga a Zeova la d zĩnd a nin-buiidã sʋka. La yɩl n wa paam bark kãense, y segd n deng n tika Kiristã maoongã n kos y yel-wẽnã sugri. D sẽn tõe n paam d yel-wẽnã sugrã tog n kɩtame tɩ tõnd me sakd n kõt d taabã sugri, baa sã n yaa toogo. D sã n kõt d taabã sugri, d yamã na n gãeyã bãane. Leb n na n wilgdame tɩ d tʋll n tũ a Zeova, la tɩ d bãngd-a lame n paasdẽ. Woto, d na n yɩɩ wa neb nins a Zeova sẽn da gom ne wã. A yeel-b-la woto: “Yãmb na n baoo maam, la y na n yãa maam, y sẽn baood maam ne y sũyã fãa wã yĩnga. Yãmb na n yãa maam.”—Zer. 29:13, 14.