Tũudum n be y sẽn tõe n kɩs sɩd bɩ?

Sã n mikame tɩ tũudum ning sãama y sũuri, tõe tɩ y na n yeelame tɩ y kõn le kɩs tũudum baa a ye sɩd ye. La bãng-y tɩ tũudum n be y sẽn tõe n kɩs sɩda. A Zezi sẽn wa n be tẽngã zugã, a lugla wẽn-tũudb hakɩk sulli, n wilg-b tɩ b segd n tũuda Wẽnnaam noyã b vɩɩmã pʋgẽ. Baa rũndã-rũndã, kiris-neb hakɩk n ket n be, neb sẽn modgd n tũud Wẽnnaam noyã ne b sũy fãa. Y maanda wãn n bãng-ba?

Ɛstɛll ning yell d sẽn zoe n gomã yeela woto: “Mam wa n baas n sɩnga Biiblã zãmsg ne a Zeova Kaset rãmbã. Pa yã n kaoos la m wʋm Zã 8:32 võor ye. Be b yetame tɩ: ‘Yãmb na bãng sɩdã, la sɩdã na kõ yãmb lohorem.’”

Ray ning yell d sẽn zoe n gomã me yeela woto: “M sẽn zãms Biiblã ne a Zeova Kaset rãmbã sõng-m lame tɩ m bãng tɩ pa Wẽnnaam n kɩt tɩ namsgã beẽ ye. M sũurã nooma wʋsgo, m sẽn bãng me t’a sẽn bas tɩ namsgã ket n beẽ wã tara võore, la tɩ ka la bilfu a na n kɩtame tɩ sa wã.”

Hakɩka, neb wʋsg sẽn pa tũud Wẽnnaam noyã sẽn segd la sẽn pa segdã wɛɛngẽ wã yĩnga, yɩl n tõog n maan sẽn yaa tɩrgã yaa toogo. La d tõe n maana sẽn yaa tɩrga. Yaa rẽ n so t’a Zeova Kaset rãmbã zãmsd neb milyõ rãmb Biiblã zaalem dũniyã gill zugu. Semen fãa, neb wʋsg n zãmsd Biiblã. Woto sõngame tɩ b paam b Naandã zoodo, la b paam sũ-noog b vɩɩmã pʋgẽ. *

Y sã n seg a Zeova Kaset rãmbã, bɩ y sok-b n ges bũmb ning sẽn kɩt tɩ b kɩs b tũudmã sɩdã. Bao-y n bãng-y b sẽn zãmsd nebã bũmb ninsã, la b sã n tũuda rẽ sõma. Rẽ, y na n bãnga tũudum sã n bee y sẽn tõe n kɩs sɩda.

[Tẽngr note]

[Foto seb-neng a 7]

Bõe yĩng tɩ y pa na n sok a Zeova Kaset rãmbã n ges bũmb ning sẽn kɩt tɩ b kɩs b tũudmã sɩdã?