L-Aħbar Tajba Skont Luqa 12:1-59
-
Il-ħmira tal-Fariżej (1-3)
-
Ibżgħu minn Alla, mhux min-nies (4-7)
-
Min jgħid li jaf lill-Kristu (8-12)
-
L-eżempju tar-raġel sinjur iblah (13-21)
-
Tibqgħux tkunu ansjużi (22-34)
-
Merħla żgħira (32)
-
-
Oqogħdu għassa (35-40)
-
L-ilsir leali u lsir mhux leali (41-48)
-
Firda u mhux paċi (49-53)
-
Hemm bżonn li tagħrfu ż-żminijiet (54-56)
-
Solvu l-kwistjoni (57-59)
12 Sadanittant, inġabru ħafna eluf taʼ nies tant li bdew jirfsu fuq xulxin, u Ġesù beda billi qal lid-dixxipli: “Oqogħdu attenti mill-ħmira tal-Fariżej, li hi l-ipokresija.
2 Imma m’hemm xejn mgħotti sew li mhux se jinkixef, u m’hemm l-ebda sigriet li mhux se jsiru jafu bih in-nies.
3 Għalhekk, kulma tgħidu fid-dlam se jinstemaʼ fid-dawl, u kulma tgħidu minn taħt l-ilsien fil-kmamar tagħkom se jiġi ppritkat minn fuq il-bjut.
4 Iktar minn hekk, ħbieb tiegħi, tibżgħux minn dawk li jistgħu joqtlukom u wara ma jistgħu jagħmlu xejn iktar.
5 Imma ibżgħu minn Alla, għax hu jistaʼ joqtolkom u jitfagħkom f’Geħenna.* Allura, minnu għandkom tibżgħu.
6 Ħames għasafar tal-bejt jiswew żewġ muniti taʼ valur żgħir,* mhux hekk? Imma lanqas wieħed minnhom mhu minsi minn Alla.
7 Fil-każ tagħkom, Alla jaf anki kemm għandkom xagħar f’raskom. Tibżgħux, għax intom tiswew ħafna iktar mill-għasafar tal-bejt.
8 “Naċċertakom li kull min jgħid li jafni man-nies, jien, Bin il-bniedem, ngħid lill-anġli t’Alla li nafu.
9 Imma min jgħid li ma jafnix, jien se ngħid lill-anġli t’Alla li ma nafux.
10 Kull min jgħid xi ħaġa kontrija, Bin il-bniedem, se tinħafirlu. Imma kull min jgħid xi ħaġa kontra l-ispirtu qaddis, mhux se tinħafirlu.
11 Meta tiġu interrogati fil-pubbliku* jew jiħdukom għand l-uffiċjali tal-gvern u l-awtoritajiet, tkunux ansjużi dwar x’se tgħidu jew kif se tiddefendu ruħkom,
12 għax dak il-ħin stess l-ispirtu qaddis se jiggwidakom biex tkunu tafu* x’għandkom tgħidu.”
13 Imbagħad xi ħadd mill-folla qallu: “Għalliem, għid lil ħija jaqsam il-wirt miegħi.”
14 Qallu: “Min laħħaqni bħala mħallef fuqkom jew qabbadni naqsam il-wirt bejnietkom?”
15 Imbagħad qalilhom: “Oqogħdu attenti u evitaw kull tip taʼ regħba,* għax anki meta xi ħadd ikollu ħafna, ħajtu ma tiddependix mill-affarijiet li għandu.”
16 Imbagħad ġabilhom dan l-eżempju: “L-art taʼ wieħed sinjur ipproduċiet ħafna.
17 Allura beda jgħid bejnu u bejn ruħu, ‘Fejn se nqiegħdu dan il-prodott kollu?
18 Naf x’nagħmel! Inwaqqaʼ l-imħażen li għandi u nibni oħrajn akbar, u fihom inpoġġi ċ-ċereali* u l-ġid kollu tiegħi.’
19 Imbagħad qal: ‘La għandi ħafna ġid merfugħ għal ħafna snin, nistaʼ nistrieħ, niekol, nixrob, u ngawdi l-ħajja.’
20 Imma Alla qallu, ‘Ja bniedem bla raġuni! Dan il-lejl int se tmut. Allura min se jiħodhom l-affarijiet li rfajt?’
21 Hekk jiġrilu min jerfaʼ ħafna affarijiet taʼ valur għalih innifsu imma mhuwiex sinjur f’affarijiet li huma importanti għal Alla.”*
22 Imbagħad qal lid-dixxipli tiegħu: “Għalhekk jien ngħidilkom: Tibqgħux tkunu ansjużi dwar x’se tieklu jew x’se tilbsu.
23 Għax il-ħajja tagħkom tiswa iktar mill-ikel u mill-ħwejjeġ.
24 Aħsbu dwar iċ-ċawluni. Dawn la jiżirgħu u lanqas jaħsdu. Huma m’għandhomx fejn jerfgħu l-ikel, imma Alla jitmagħhom. Ma tiswewx intom iktar mill-għasafar?
25 Min minnkom jistaʼ jtawwal ħajtu mqar bi ftit billi jkun ansjuż?
26 Allura, jekk lanqas biss tistgħu tagħmlu din il-ħaġa, għala għandkom tkunu ansjużi dwar affarijiet oħrajn?
27 Aħsbu dwar il-mod kif jikbru l-fjuri.* Dawn la jaħdmu iebes u lanqas iħitu ħwejjeġ. Imma lanqas ir-Re Salamun fil-glorja kollha li kellu ma setaʼ jilbes sabiħ daqshom.
28 Mela, jekk Alla jlibbes lill-pjanti li llum hawn u għada jintefgħu fin-nar, kemm iktar se jlibbes lilkom! Kif m’għandkomx biżżejjed fidi?
29 Allura, tibqgħux tkunu ansjużi dwar x’se tieklu u x’se tixorbu, u tibqgħux tinkwetaw iżżejjed.
30 Għax dawn huma l-affarijiet li n-nies l-oħrajn qed jirsistu ħafna għalihom. Imma Missierkom jaf li għandkom bżonn dawn l-affarijiet.
31 Minflok, komplu poġġu s-Saltna tiegħu* fl-ewwel post f’ħajjitkom, u Alla jagħtikom l-affarijiet l-oħrajn.
32 “Tibżgħux merħla żgħira, għax Missierkom għoġbu jagħtikom is-Saltna.
33 Bigħu dak li għandkom u għinu lil dawk fil-bżonn.* Agħmlu boroż tal-flus li ma jitmermrux, jiġifieri agħmlu affarijiet li huma importanti għal Alla.* Dawn ma jispiċċaw qatt u ma jistgħux jinsterqu jew jittieklu mill-kamla.
34 Għax qalbkom tintrabat maʼ dak li tqisu taʼ valur.
35 “Kunu mlibbsin u lesti,* u ixegħlu l-lampi tagħkom.
36 Tridu tkunu bħal qaddejja li jistennew lil sidhom jiġi mit-tieġ, ħalli meta jiġi u jħabbat, jiftħulu mill-ewwel.
37 Ferħanin ikunu dawk il-qaddejja li meta jiġi sidhom isibhom għassa! Naċċertakom li hu jilbes il-ħwejjeġ taʼ qaddej, jistidinhom joqogħdu mal-mejda, u jmur iservilhom l-ikel.
38 Huma se jkunu ferħanin jekk isibhom lesti, anki jekk jiġi tard billejl* jew saħansitra wara nofsillejl!*
39 Imma kunu afu li kieku sid id-dar kien jaf x’ħin ġej il-ħalliel, ma kienx iħallih jidħol f’daru.
40 Uru li intom lesti wkoll, għax jien, Bin il-bniedem, ġej f’ħin li ma tkunux qed tistennew.”
41 Imbagħad Pietru qallu: “Mulej, dan l-eżempju qed tgħidu għalina jew għal kulħadd?”
42 Il-Mulej qal: “Min hu verament l-ilsir* leali u għaqli, li sidu se jinkarigah fuq il-qaddejja taʼ daru biex ikompli jagħtihom l-ikel li għandhom bżonn fiż-żmien xieraq?
43 Dan l-ilsir se jkun ferħan meta sidu jiġi u jsibu jagħmel dan!
44 Naċċertakom li hu se jinkarigah fuq kulma għandu.
45 Imma jekk l-ilsir jgħid bejnu u bejn ruħu, ‘Sidi qed idum biex jiġi,’ u jibda jsawwat lil sħabu l-qaddejja, u jiekol, jixrob, u jisker,
46 imbagħad sidu se jiġi f’ħin u f’ġurnata li ma jkunx qed jistennieh, u se jikkastigah bl-iktar mod aħrax u jitfgħu maʼ dawk li mhumiex leali.
47 Imbagħad dak l-ilsir li fehem x’ried sidu, imma ma kienx lest jew m’għamilx dak li qallu, se jaqlaʼ ħafna daqqiet.
48 Imma dak li ma fehemx, u b’hekk għamel affarijiet li jistħoqqlu jiġi msawwat għalihom, ftit se jaqlaʼ daqqiet. Fil-fatt, kull min irċieva ħafna, se jintalab ħafna minnu, u dak li ġie inkarigat biex jieħu ħsieb ħafna affarijiet, in-nies se jistennew minnu iktar mis-soltu.
49 “Jien ġejt biex inqabbad nar fuq l-art, u diġà qabbadtu. Allura xi rrid iktar?
50 Fil-fatt, hemm tip ieħor taʼ magħmudija li rrid ngħaddi minnha. Jien se nkun inkwetat ħafna sakemm tgħaddi!
51 Jaqaw taħsbu li ġejt biex inġib il-paċi fuq l-art? Le, anzi biex inġib firda.
52 Għax minn issa ’l quddiem se jkun hemm il-firda fil-familja. Jekk din ikun fiha ħames persuni, ikun hemm tlieta kontra tnejn u tnejn kontra tlieta.
53 Dawn ikunu mifrudin, il-missier kontra t-tifel u t-tifel kontra l-missier, l-omm kontra t-tifla u t-tifla kontra ommha, il-kunjata kontra l-mara tat-tifel u l-mara tat-tifel kontra l-kunjata tagħha.”
54 Imbagħad kompla jgħid lill-folol: “Meta taraw sħaba tielgħa mill-Punent, mill-ewwel tgħidu li ġejja maltempata, u hekk jiġri.
55 U meta jkun riħ isfel, tgħidu li ġejja sħana kbira, u hekk jiġri.
56 Ja ipokriti! Intom tkunu tafu x’temp se jagħmel billi tinnotaw is-sema u l-art, imma kif ma tagħrfux dan iż-żmien partikulari?
57 Kif ma tifhmux x’suppost tagħmlu?
58 Pereżempju, waqt li tkun qiegħed fit-triq maʼ dak li fetaħ kawża kontrik biex tmorru għand mexxej, ibda aħdem biex issolvi l-kwistjoni miegħu, ħalli ma jtellgħekx quddiem l-imħallef, u l-imħallef jagħtik f’idejn l-uffiċjal tal-qorti, u dan jitfgħek il-ħabs.
59 Nassigurak li mhux se toħroġ minn hemm sakemm tkun ħallast id-dejn kollu.”*
Noti taʼ taħt
^ Jew “Meta jiħdukom fis-sinagogi.”
^ Letteralment “se jgħallimkom.”
^ Jew “xenqa b’għira.”
^ Ċereali huma żrieragħ li jinkludu xgħir (barley) u qamħ.
^ Jew “mhuwiex sinjur m’Alla.”
^ Jew “il-ġilji.”
^ Jew “il-Gvern (it-Tmexxija) t’Alla.” Ara Termini tal-Bibbja Spjegati.
^ Jew “u agħtu rigali taʼ ħniena.” Ara Termini tal-Bibbja Spjegati.
^ Letteralment “teżor fis-sema.”
^ Letteralment “Ħa jkunu ġenbejkom imħażżmin.”
^ Letteralment “fit-tieni għassa.” Jiġifieri minn madwar id-9:00 p.m. sa nofsillejl.
^ Letteralment “fit-tielet għassa.” Jiġifieri minn nofsillejl sa madwar it-3:00 a.m.
^ Letteralment “il-prokuratur.” Jiġifieri dak li jieħu ħsieb id-dar.
