“Wieħed li jpejjep jiswa lil min iħaddmu . . . $5,816 iktar kull sena meta mqabbel maʼ wieħed li ma jpejjipx,” jgħid rapport fin-​New York Times. Skont informazzjoni miġbura minn riċerkaturi tal-​Ohio State University, il-​medja tal-​ispiża żejda stmata rriżultat minn brejks għat-​tipjip, spejjeż ogħla f’kura medika, u nuqqas t’attendenza għax-​xogħol. Fattur ieħor kien telf fil-​produttività, aktarx riżultat tas-​sintomi skomdi li jkun hemm għax ma tkunx qed tittieħed nikotina.

“L-​inkonsistenza min-​naħa tas-​saċerdoti u l-​fidili bejn dak li jgħidu u dak li jagħmlu, bejn il-​kliem u l-​istil tal-​ħajja, qiegħda therri l-​kredibilità tal-​Knisja.” —Il-​Papa Franġisku.

L-​awtoritajiet tal-​Malasja sabu 24 tunnellata t’avorju li ddaħħlu b’kuntrabandu—iżjed minn 1,000 sinna twila tal-​iljunfanti (tusks)—moħbijin f’żewġ konsenji taʼ injam tal-​kawba. Xi konservazzjonisti qalu li s-​sejba kienet l-​ikbar waħda li qatt saret. It-​tagħbija ntbagħtet mit-​Togo u kienet destinata għaċ-​Ċina.

Skont rapport tal-​2012 maħruġ mill-​Organizzazzjoni Dinjija tas-​Saħħa, 63 fil-​mija tal-​imwiet kienu kkaġunati minn mard li jittieħed, partikularment l-​HIV/AIDS, mard tad-​dijarea, malarja, tuberkulosi, u mard tat-​tfal.

Applications (apps) taʼ logħob li jixbah lil dak tal-​ażżard fuq l-​ismartphones u apparat ieħor saru popolari fost it-​tfal. Xi apps jixbhu logħob veru li jintlagħab fil-​każinò imma huma iktar faċli li tirbaħhom. Rapport tal-​gvern iwissi li logħob bħal dan jistaʼ jġiegħel lit-​tfal iħossu li l-​logħob tal-​ażżard huwa aċċettabbli “u jistaʼ jwassalhom biex ikollhom il-​vizzju tal-​logħob fil-​futur.”