Mistoqsijiet mill-Qarrejja
X’ried ifisser Ġesù meta qal: “Taħsbux li ġejt inġib il-paċi”?
Ġesù dejjem għallem lin-nies biex iżommu l-paċi bejniethom. Imma darba waħda lill-appostli tiegħu qalilhom: “Taħsbux li ġejt inġib il-paċi fuq l-art; ma ġejtx inġib il-paċi, imma sejf. Għax jien ġejt biex nifred, raġel minn missieru, u bint minn ommha, u mara żagħżugħa mill-kunjata tagħha.” (Mt. 10:34, 35) X’ried ifisser Ġesù meta qal dan il-kliem?
Ġesù ma riedx jifred lill-familji, imma hu kien jaf li t-tagħlim tiegħu setaʼ jġib il-firda f’xi familji. Għalhekk, dawk li jkunu jixtiequ jsiru dixxipli taʼ Kristu u jitgħammdu għandhom jifhmu li kultant tal-familja mhux se jieħdu pjaċir bid-deċiżjoni tagħhom. Għandu mnejn, ir-raġel jew il-mara, jew forsi xi ħadd ieħor tal-familja jiħodha kontrihom, u għalhekk ikun diffiċli għalihom biex jibqgħu leali lejn it-tagħlim taʼ Kristu.
Il-Bibbja tinkuraġġixxi lill-Kristjani biex ‘iżommu l-paċi mal-bnedmin kollha.’ (Rum. 12:18) Imma t-tagħlim taʼ Ġesù jistaʼ jkun bħal “sejf” għal xi familji. Dan jiġri meta xi ħadd fil-familja jaċċetta t-tagħlim taʼ Ġesù waqt li oħrajn fil-familja ma jaċċettawhx jew jiħduha kontrih. Meta jiġri hekk, dawn l-uħud tal-familja jagħmlu lilhom infushom “għedewwa” taʼ min ikun qed jitgħallem il-verità.—Mt. 10:36.
Dixxipli taʼ Kristu li jgħixu f’dar fejn tal-familja għandhom reliġjon differenti kultant ikollhom jagħżlu jekk jagħmlux dak li jferraħ lil Ġeħova u lil Ġesù jew inkella dak li jferraħ lil tal-familja tagħhom. Pereżempju, tal-familja jipprovaw jisforzawhom biex jiċċelebraw festi pagani. Meta jiffaċċjaw prova bħal din, lil min se jferrħu? Ġesù qal: “Min għandu affezzjoni lejn missieru jew lejn ommu iktar milli għandu lejja ma jistħoqqlux ikun tiegħi.” (Mt. 10:37) Bla dubju, Ġesù ma kienx qed jgħid li biex inkunu dixxipli tiegħu m’għandniex nibqgħu nħobbu lill-ġenituri tagħna daqskemm konna. Minflok, hu kien qed jgħallimna li xejn m’għandu jwaqqafna milli nkomplu nimxu warajh. Jekk tal-familja ma jkunux iriduna nibqgħu naqdu lil Ġeħova, aħna xorta nibqgħu nħobbuhom. Imma nafu li l-imħabba tagħna għal Alla hija l-iktar ħaġa importanti għalina.
Bla dubju, meta l-familja jiħduha kontrina nħossuna mdejqin. Imma d-dixxipli taʼ Ġesù għandhom jiftakru l-kliem: “Kulmin ma jaċċettax iz-zokk tat-tortura tiegħu u jiġi warajja ma jistħoqqlux ikun tiegħi.” (Mt. 10:38) Fi kliem ieħor, il-Kristjani jħarsu lejn l-oppożizzjoni mill-familja bħala parti mit-tbatija li d-dixxipli taʼ Kristu lesti li jissaportu. Imma huma jittamaw li minħabba l-mod kif jgħixu ħajjithom, tal-familja tagħhom ibiddlu l-mod kif jaħsbuha dwarhom u jkunu jridu jitgħallmu dwar dak li tgħid il-Bibbja.—1 Pt. 3:1, 2.