Min huma l-anġli jew x’inhuma?
It-tweġiba tal-Bibbja
L-anġli huma ħlejjaq li għandhom iktar qawwa u abbiltà mill-bnedmin. (2 Pietru 2:11) Huma jgħixu fis-sema, jew fil-qasam tal-ispirti, stat iktar għoli taʼ eżistenza separat mill-univers letterali. (1 Slaten 8:27; Ġwanni 6:38) Għalhekk, huma jissejħu wkoll spirti.—1 Slaten 22:21; Salm 18:10.
L-anġli kif bdew jeżistu?
Alla ħalaq l-anġli permezz taʼ Ġesù, li l-Bibbja ssejjaħlu “l-ewwel imwieled mill-ħolqien kollu.” Meta tiddeskrivi kif Alla uża lil Ġesù meta ħalaq il-ħolqien, il-Bibbja tgħid: “Permezz [taʼ Ġesù] nħolqu l-affarijiet l-oħrajn kollha fis-smewwiet u fuq l-art, dawk viżibbli u dawk inviżibbli,” u dan jinkludi lill-anġli. (Kolossin 1:13-17) L-anġli la jiżżewġu u lanqas inisslu. (Marku 12:25) Minflok, kull wieħed minn dawn l-“ulied l-Alla l-veru” kien maħluq b’mod individwali.—Ġob 1:6.
L-anġli ġew maħluqin ħafna żmien ilu, qabel ma bdiet teżisti l-art. Meta Alla ħalaq l-art, l-anġli “bdew jgħajtu b’tifħir.”—Ġob 38:4-7.
Kemm hemm anġli?
Il-Bibbja ma tgħidx eżatt kemm hemm, imma turi li hemm numru kbir ħafna. Pereżempju, f’viżjoni li kellu l-appostlu Ġwanni, hu qal li ra mijiet taʼ miljuni t’anġli.—Rivelazzjoni 5:11, nota taʼ taħt.
Għandhom l-anġli isem u karattru individwali?
Iva. Il-Bibbja ssemmi l-ismijiet taʼ żewġ anġli: Mikiel u Gabrijel. (Danjel 12:1; Luqa 1:26) a Anġli oħra għarfu li kellhom isem imma ma qalux x’kien.—Ġenesi 32:29; Imħallfin 13:17, 18.
L-anġli għandhom karattri differenti. Huma jistgħu jikkomunikaw maʼ xulxin. (1 Korintin 13:1) Għandhom l-abbiltà li jaħsbu u kapaċi jesprimu espressjonijiet taʼ tifħir lil Alla. (Luqa 2:13, 14) Għandhom ukoll il-libertà li jagħżlu bejn it-tajjeb u l-ħażin, kif ġara meta xi wħud minnhom dinbu u ngħaqdu maʼ Satana x-Xitan fir-ribelljoni tiegħu kontra Alla.—Mattew 25:41; 2 Pietru 2:4.
Hemm pożizzjonijiet differenti fost l-anġli?
Iva. L-ikbar anġlu t’awtorità u qawwa hu Mikiel l-arkanġlu. (Ġuda 9; Rivelazzjoni 12:7) Is-serafini huma anġli taʼ pożizzjoni għolja li huma weqfin fejn it-tron taʼ Ġeħova. (Isaija 6:2, 6) Il-kerubini huma anġli taʼ pożizzjoni għolja oħra li għandhom xogħlijiet speċjali. Pereżempju, il-kerubini kienu qagħdu għassa mal-entratura tal-ġnien tal-Għeden meta Adam u Eva tkeċċew minnu.—Ġenesi 3:23, 24.
L-anġli jgħinuhom lin-nies?
Iva, Alla juża lill-anġli leali tiegħu biex jgħin lin-nies illum.
Alla juża l-anġli biex jiggwida lill-qaddejja tiegħu waqt li jkunu qed jippritkaw l-aħbar tajba tas-Saltna t’Alla. (Rivelazzjoni 14:6, 7) Din id-direzzjoni tgħin kemm lil dawk li jkunu qed jaqsmu din l-aħbar u kemm lil dawk li jisimgħuha.—Atti 8:26, 27.
L-anġli jgħinu biex il-kongregazzjoni Kristjana tibqaʼ nadifa u ma titniġġisx min-nies ħżiena.—Mattew 13:49.
L-anġli jipproteġu u jiggwidaw lil dawk li huma leali lejn Alla.—Salm 34:7; 91:10, 11; Ebrej 1:7, 14.
Dalwaqt, l-anġli se jġibu ħelsien lill-umanità billi jiġġieldu flimkien maʼ Ġesù Kristu biex ineħħu l-ħażen.—2 Tessalonikin 1:6-8.
Għandu kull wieħed minna l-anġlu kustodju tiegħu?
Għalkemm l-anġli jieħdu ħsieb l-interessi spiritwali tal-qaddejja t’Alla, dan ma jfissirx li Alla ta lil kull Kristjan l-anġlu kustodju tiegħu. b (Mattew 18:10) L-anġli ma jipproteġux lill-qaddejja t’Alla minn kull prova jew tentazzjoni. Il-Bibbja turi li meta ngħaddu minn prova, Alla spiss ‘jiftħilna t-triq’ billi jagħtina l-għerf u s-saħħa biex nissaportu.—1 Korintin 10:12, 13; Ġakbu 1:2-5.
Ideat żbaljati dwar l-anġli
Idea żbaljata: L-anġli kollha huma tajbin.
Fatt: Il-Bibbja tgħid li hemm “l-ispirti mill-agħar” u “l-anġli li dinbu.” (Efesin 6:12; 2 Pietru 2:4) Dawn l-anġli ħżiena huma demonji, li ngħaqdu maʼ Satana f’li jirribellaw kontra Alla.
Idea żbaljata: L-anġli ma jmutu qatt.
Fatt: L-anġli ħżiena, flimkien maʼ Satana x-Xitan, se jinqerdu.—Ġuda 6.
Idea żbaljata: In-nies isiru anġli meta jmutu.
Fatt: L-anġli ġew maħluqin mill-ewwel bħala anġli minn Alla, allura dawn mhumiex nies li ġew irxoxtati. (Kolossin 1:16) Uħud li jiġu rxoxtati għall-ħajja fis-sema jirċievu mingħand Alla r-rigal li ma jmutu qatt. (1 Korintin 15:53, 54) Huma se jkollhom pożizzjoni ogħla minn dik tal-anġli.—1 Korintin 6:3.
Idea żbaljata: L-anġli qegħdin hemm biex jaqdu lin-nies.
Fatt: L-anġli jobdu dak li jgħidilhom Alla, u mhux li ngħidulhom aħna. (Salm 103:20, 21) Anke Ġesù kien ċert li kellu jitlob direttament lil Alla għall-għajnuna, u mhux lill-anġli.—Mattew 26:53.
Idea żbaljata: Aħna nistgħu nitolbu lill-anġli għall-għajnuna.
Fatt: It-talb tagħna lil Alla hu parti mill-qima tagħna, li bi dritt hi t’Alla Ġeħova. (Rivelazzjoni 19:10) Aħna għandna nitolbu biss lil Alla, permezz taʼ Ġesù.—Ġwanni 14:6.
a Xi traduzzjonijiet tal-Bibbja jużaw it-terminu “Luċifru” f’Isaija 14:12, li xi nies jaħsbu li dan hu l-isem tal-anġlu li sar Satana x-Xitan. Però, il-kelma oriġinali Ebrajka użata hawn tfisser “wieħed li jiddi.” Il-kuntest juri li dan it-terminu ma jirreferix għal Satana, imma għad-dinastija, jew linja taʼ slaten, taʼ Babilonja, li Alla kien se jumilja minħabba l-arroganza tagħha. (Isaija 14:4, 13-20) L-espressjoni “wieħed li jiddi” ntużat biex twaqqaʼ għaċ-ċajt lid-dinastija Babiloniża wara li ntrebħet.
b Xi wħud jaħsbu li r-rakkont taʼ meta Pietru nħeles mill-ħabs jindika li hu kellu l-anġlu kustodju personali tiegħu. (Atti 12:6-16) Però, meta d-dixxipli qalu: “Dak l-anġlu [taʼ Pietru],” jistaʼ jkun li huma b’mod żbaljat ħasbu li dak li kien ġie għandhom kien il-messaġġier anġeliku li jirrappreżenta lil Pietru, u mhux Pietru nnifsu.