¿Kema tlamis tlen amo kuali? Tlen Jesús kiijtok
Kej tikitstokej, kema Biblia kiijtoua tlamis Tlaltipaktli, amo kiijtosneki nelia kitsontlamiltisej yon kintsontlamiltisej nochi maseualmej, san tlamis nochi tlen amo kuali uan kintsontlamiltisej katli amo kuali monejnemiltiaj. Uajka, ¿kiijtoua Biblia kema tlamis tlen amo kuali?
XIMOILJUI IPAN NI OME TLAMANTLI TLEN JESÚS KIIJTOK:
“Xitlachixtokaj pampa axinkimatij tlachke tonal, yon tlachke hora, [...] niualas” (MATEO 25:13).
“Xitlachixtokaj kuali uan ximomaijtokaj pampa axinkimatij kema asis nopa tonal kema sampa niualas” (MARCOS 13:33).
Yon se maseuali amo kimati kema tlamis tlen amo kuali, san toTeotsij “yajaya kimati” kema nelnelia mochiuas (Mateo 24:36). ¿Tlake techpaleuis tijmatisej kema tlamis? Jesús kiniljuik itokilijkauaj ma kiitakaj se keski tlamantli tlen kinpaleuiskia kimatisej kema tlamiskia tlen amo kuali.
TLEN PANOSKIA
Tlen nama pano, kinextia nechka tlamis tlen amo kuali. Jesús kiijtok: “Tlakamej ipan tlaltinij kampa ueli motlalanasej uan moteuisej tlakamej ipan sekinok tlaltinij. [...] Uan ueyi mayantli uan kampa ueli mojmolinis tlali” (Mateo 24:3, 7). Uan nojkia onkaskia “uejueyi kokolistli” (Lucas 21:11). ¿Nelia moaxitia tlen Jesús kiijtok?
Miakej maseualmej tlaijiyouiaj pampa onka tlauilankayotl, mayantli, mojmolinia tlali uan kokolistli. Se neskayotl, ipan 2004, mijkej se 225,000 maseualmej pampa ipan ueyi atl Índico mojmolinik tlali uan mixkuepki atl. San ipan eyi xiuitl, mijkej kipano 6.9 millones maseualmej ika kokolistli COVID-19 ipan nochi Tlaltipaktli. Jesús kiijtok ni tlamantli kinextiskia nechka tlamiskia tlen amo kuali.
“IPAN ITLAMIA TONALI”
Biblia kiijtoua “itlamia tonali”, kineki kiijtos kema nechka tlamis nochi tlen amo kuali (2 Pedro 3:3, 4). Kej kiijtoua 2 Timoteo 3:1-5, ipan itlamia tonali maseualmej ayokmo kuali monejnemiltiskiaj (xikita recuadro “ Kema nechka tlamis tlen amo kuali”). Uajka, kema tikinita maseualmej san inijuantij moikneliaj, mosisiniaj, tlauel kipatiitaj tomij uan amo teikneliaj, kinextia nechka tlamis tlen amo kuali.
¿Keski uejkauas itlamia tonali? Biblia kiijtoua amo uejkauas. Ipan nopa tonali toTeotsij kintsontlamiltis “tlen tlaxoleuayayaj ipan Tlaltipaktli” (Apocalipsis 11:15-18; 12:12).
TLALTIPAKTLI NECHKA MOCHIUAS SE XOCHIMILI
ToTeotsij ya kitlalijtok se tonali kema kitsontlamiltis tlen amo kuali (Mateo 24:36). Nojkia, “axkineki niyon se ma poliui” (2 Pedro 3:9). Yeka, nojua kikajtok tonali uan kiampa uelis tikixmatisej uan tijtlepanitasej. ¿Kenke? Pampa amo kineki ma timikikaj kema kitsontlamiltisej tlen amo kuali. Ya kineki ma tiitstokaj ipan nopa yankuik Tlaltipaktli.
ToTeotsij kichijtok ma kinmachtikaj maseualmej ika Biblia ipan nochi Tlaltipaktli, kiampa kimatisej tlake moneki kichiuasej uan kiampa uelis itstosej ipan yankuik Tlaltipaktli kema ya tlanauatijtos. Jesús kiijtok nopa kuali tlamachtili kimoyauaskiaj “ipan nochi tlaltinij” (Mateo 24:14). Jehová itlajtoltemakauaj ipan nochi Tlaltipaktli tlajtolmoyauaj uan tlamachtiaj ika Biblia millones tlen horas. Jesús kiijtok tlajtolmoyauaskiaj ipan nochi Tlaltipaktli kema nechka tlamiskia tlen amo kuali.
Uajka, tlanauatianij ayokmo uejkauasej tlanauatijtosej. Uan tojuantij uelis timomanauisej uan nochipa tiitstosej ipan se yankuik Tlaltipaktli. Ipan seyok tlamachtili kiixtomas tlake moneki tijchiuasej tlaj tijnekij tiitstosej ipan nopa yankuik Tlaltipaktli.
Tlen Jesús kiijtok panoskia ipan “itlamia tonali”, techyolchikaua.
Tlen nojkia mitspaktis tikitas
TLEN TEMATILTIA
¿Kema tekichiuas toTeotsij iTlanauatijkayo ipan Tlaltipaktli?
Se keskij Jesús itokilijkauaj kinekiyayaj kimatisej ni. ¿Tlake kinnankilik?
TLEN BIBLIA KINANKILIA
¿Tlake kinextia tiitstokej ipan “itlamia tonali” o “kema tlamis tonali”?
Biblia kiijtok panoskia miak tlamantli uan kinextiskia tiitstokej ipan itlamia tonali.
