Julio: Ernesto, tlauel nechpaktia kema tikamanaltij tlen Biblia. * ¿Tikilnamiki tinechtlajtlanik se tlamantli tlen toTeotsij iTlanauatijkayo? Tikijtok tijnekiyaya tijmatis kenke Jehová itlajtoltemakauaj tikijtouaj pejki tekichiua ipan 1914.

Ernesto: Kena, nopa nijpojki ipan se pilamochtsi tlen intemakaj, kiijtouayaya toTeotsij iTlanauatijkayo pejki tekichiua ipan xiuitl 1914 uan nijnekiyaya nijmatis kenke kiampa intlamachtiaj. Inkiijtouaj nochi tlen intlamachtiaj mokixtijtok ipan Biblia.

Julio: Kena, nochi tijkixtiaj nopaya.

Ernesto: Na nijpojtok nochi Biblia uan amo nikilnamiki tlaj nikitak nopa xiuitl. Yeka, ipan se Biblia tlen nijpantik ipan internet nijtemok nopa número “1914”, uan amo neski yon se tlamantli.

Julio: Niyolpaki pampa tijchijki nopa ome tlamantli. Achtoui pampa tijpojtok nochi Biblia, nopa kinextia tlauel tijpatiita.

Ernesto: Kena, nimoiljuia yon se amochtli eli kej Biblia.

Julio: Na nojkia kiampa nimoiljuia. Nojkia, niyolpaki pampa tijchiua kampeka tijnankilis ika Biblia tlen tijneki tijmatis. Tijchijki tlen Biblia kiijtoua ma tijchiuakaj: ma tijchiuakaj kampeka tijpiasej tlalnamikilistli. * ¡Kualtitok pampa kiampa tijchiua!

Ernesto: Tlaskamati Julio. Nijneki nijmatis miak tlamantli. Nijtemok sekinok tlamachtili ipan nopa amochtli tlen tijpojtokej uan nijpantik se keski tlamantli tlen nopa xiuitl 1914. Kamanaltiyaya tlen se ueyi kuauitl tlen kitsontejkej uan teipa sampa ueyixki... Amo kuali nikilnamiki.

Julio: Kena. Tlen tijpantik eli nopa tlajtolpanextili tlen uala ipan Daniel capítulo 4. Nopaya kiijtoua tlen kitemijki Nabucodonosor, katli tlanauatiyaya ipan Babilonia.

Ernesto: Kena, ya nopa nijpantik. Nijpojki miakpa nopa tlamachtili uan namantsi nojua ayamo nijkuamachilia kenke kiijtoua tlen toTeotsij iTlanauatijkayo o tlen nopa xiuitl 1914.

Julio: Amo ximotekipacho. Daniel, katli kiijkuilok tlen nopaya kiijtoua, nojkia amo kikuamachilik tlake kinekiyaya kiijtos.

Ernesto: ¿Nelia?

Julio: Kena. Xikita tlake kiijtok nikaj, ipan Daniel 12:⁠8: “Na nijkajki tlen kiijtouayaya, pero axtleno nijmachilik”.

Ernesto: Nelia, ya nojkia amo kikuamachilik. Uajka ayokmo tlauel nimotekipachos.

Julio: ¿Uan tijmati kenke kiampa kipanok Daniel? Pampa toTeotsij ayamo kinekiyaya ma kikuamachili nopa tlajtoli. Nama ayokmo kiampa pano, pampa nama kena uelis tijkuamachilisej nopa tlajtolpanextili tlen kiijkuilok.

Ernesto: ¿Nelia?

Julio: Kena, kiampa kiijtoua versículo 9. Xikita tlake kiijtoua: “Ni tlamantli moneki motlatijtos hasta asis itlamia tonali”. ¿Tikitak? Nopaya kiijtoua ni tlajtolpanextili ueliskia mokuamachilis san ipan itlamia tonali. Uan onka miak tlamantli tlen kinextia ya tiitstokej ipan nopa tonali. Ni tikitasej teipa ipan nopa amochtli tlen tijpojtokej. *

Ernesto: ¿Uelis tinechixtomilis nopa tlajtolpanextili?

Julio: Nijchiuas kampeka.

Julio: Achtoui tikitasej tlen kitemijki tlanauatijketl Nabucodonosor uan teipa tikijtosej tlake kiijtosneki. ¿Katsa tikita?

Ernesto: Kena kuali.

Julio: Nabucodonosor kitemijki se ueyi kuauitl tlen asiyaya iluikak, uan nojkia kikajki se iluikaejketl katli kiijtok ma kitekikaj nopa kuauitl. San mokajki nopa kuatsomitl uan ineljuayo. Teipa, panok “chikome xiuitl”, uan nopa kuauitl sampa moskaltik. * Achtoui, ni tlajtolpanextili moaxitik ipan Nabucodonosor. Ya eliyaya se ueyi tlanauatijketl; sanse kej nopa kuauitl tlen asiyaya iluikak. Maske kiampa, ya nojkia kejuak kitsontejkej, uan kiampa kikajkej “chikome xiuitl”. ¿Tikilnamiki tlake kiijtosneki ni?

Ernesto: Mmm... amo nikilnamiki.

Julio: Biblia kiijtoua Nabucodonosor uiuitixki, uan kiampa itstoya “chikome xiuitl”. Kema kiampa kipanok, ayokmo uelki tlanauatia. Uan kema tlanki nopa chikome xiuitl, ayokmo uiuitixki uan sampa uelki tlanauatia. *

Ernesto: Kualtitok ya nijkuamachilik. Uan, ¿kenke tlen nopaya kiijtoua mouika ika toTeotsij iTlanauatijkayo uan ika nopa xiuitl 1914?

Julio: Uelis tikijtosej ni tlajtolpanextili ompa moaxitijtok. Achtoui moaxitik kema ayokmo kikauilijkej Nabucodonosor ma tlanauati. Uan kema ika ompa moaxitik, elki kema toTeotsij iTlanauatijkayo ayokmo tlanauatik ipan Tlaltipaktli. Ya nopa eli tlen mouika ika toTeotsij iTlanauatijkayo.

Ernesto: ¿Uan kenke tikijtoua ika ompa moaxitik?

Julio: Pampa ipan nopa tlajtolpanextili kiijtoua se keski tlamantli tlen kiampa kinextia. Daniel 4:17 kiijtoua ni tlajtolpanextili mochijki pampa kiampa “nochi tlakamej kimatisej para Dios Tlen Más Ueyi kipia tekiuejkayotl ika nochi tlanauatianij ipan Tlaltipaktli uan ika nochi inintlanauatijkayo. Uan Dios kimaka tekiuejkayotl uan se tlanauatilistli tlen yajaya kineki”. ¿Tikitak nopaya kiijtoua “tekiuejkayotl ika nochi tlanauatianij ipan Tlaltipaktli uan ika nochi inintlanauatijkayo”?

Ernesto: Kena, nopaya kiijtoua “Tlen Más Ueyi kipia tekiuejkayotl ika nochi tlanauatianij uan ika nochi inintlanauatijkayo”.

Julio: ¿Ajkia timoiljuia eli “Tlen Más Ueyi”?

Ernesto: Nimoiljuia eli toTeotsij.

Julio: Kena. Nopa tlajtoli kinextia nopa tlajtolpanextili amo san moaxitik ika Nabucodonosor. Nojkia moaxitia ipan toTeotsij iTlanauatijkayo, tlen ika kinnauatia maseualmej. Tlaj tikitasej tlake kiijtoua kampa peua ni tlajtolpanextili, tikitas nelia ya nopa kinextia.

Ernesto: Uajka xinechiljui.

Julio: Ipan pilamochtsi Daniel miakpa kiijtoua tlake panos kema Jesucristo tlanauatis ipan toTeotsij iTlanauatijkayo. ¿Katsa tikita tlaj tikitasej se neskayotl? Eltok ipan Daniel 2:​44. ¿Uelis tijpouas?

Ernesto: Kena, kiijtoua: “Uan ipan nopa tonali kema tlanauatijtosej nopa tlanauatianij [...], toTeko Dios tlen itstok iluikak kiketsas se tlanauatilistli kampa itlakauaj tlen axaka uelis kisemanas, niyon axkikauas nopa itlanauatilis ika seyok. Uan axaki uelis kitlanis nopa tlanauatijketl tlen toTeko Dios kitlalis para nochipa. Itlanauatijkayo kintlamiltis nochi sekinok tlanauatianij uan inintlanauatijkayo, uan ayok tleno mokauas tlen ne sekinok. Nopa tlanauatilistli uan nopa tlanauatijketl tlen toTeko kitlalijtos uejkauas para nochipa”.

Julio: Kualtitok. ¿Timoiljuia ni texto kamanalti tlen toTeotsij iTlanauatijkayo?

Ernesto: Mmm... Amo nijmati.

Julio: Nopa versículo kiijtoua nopa Tlanauatijkayotl “uejkauas para nochipa”. ¿Itstok se maseuali katli uelis tlanauatis nochipa?

Ernesto: Amo aka.

Julio: Nopa nelia. Ma tijtemokaj seyok tlajtolpanextili tlen kamanalti tlen toTeotsij iTlanauatijkayo. Eltok ipan Daniel 7:​13 uan 14. Nopaya kiijtoua se akajya tlanauatiskia ipan nopa Tlanauatijkayotl. Xikita tlen kiijtoua: “Uan itlatekipanojkauaj kiualikakej ma monextiki iixpa. Uan Yajaya Tlen Itstok Nochipa kimakak Yajaya Tlen Mokuepki Tlakatl tekiuejkayotl para tlanauatis uan miak tlatlepanitakayotl uan chikaualistli. Uan nochi tlakamej ipan nochi tlaltinij, uan tlakamej tlen kimatiyayaj nochi tlajtoli ipan Tlaltipaktli itstoyaj ipan itlanauatilis uan kiueyichijkej Yajaya Tlen Mokuepki Tlakatl. Uan itekiuejkayo para tlanauatis uejkauas para nochipa, uan itlanauatilis axkema panoteuas, niyon axaki uelis kitlamiltis”. Ipan ni versículos kiijtoua se keski tlamantli tlen ya tikijtojtoyaj.

Ernesto: Kena, sampa kiijtoua eltok se tlanauatijkayotl.

Julio: Kena. Uan eli se tlanauatijkayotl tlen tlauel ipati, pampa tlaj tikita, nopaya kiijtoua kinnauatia “nochi tlakamej ipan nochi tlaltinij, uan tlakamej tlen kimatiyayaj nochi tlajtoli”. Uelis tikijtosej tlanauatia ipan nochi Tlaltipaktli.

Ernesto: Maske amo nikitstoya nopa, kena kiampa eli pampa nopaya kiijtoua.

Julio: Sampa xikita tlen nopaya kiijtoua: “Uan itekiuejkayo para tlanauatis uejkauas para nochipa, uan itlanauatilis axkema panoteuas, niyon axaki uelis kitlamiltis”. ¿Tikitak tlen nikaj ijkuilijtok eli sanse ika tlen kiijtoua Daniel 2:​44, tlen namantsi tijpojkej?

Ernesto: Nelia, elij sanse.

Julio: Kualtitok, nama tikompauisej tlen tikitakej. Tlen kiijtoua Daniel capítulo 4, moijkuilok pampa kinekiyaya kinnextilis maseualmej toTeotsij “Tlen Más Ueyi”, “kipia tekiuejkayotl ika nochi tlanauatianij uan ika nochi inintlanauatijkayo”. Ni kinextia nopa tlajtolpanextili moaxitia ipan seyok maseuali katli kipia miak tlanauatili uan amo kej Nabucodonosor. Uan ipan nochi pilamochtsi Daniel miakpa kiijtoua se tlamantli: kema toTeotsij iTlanauatijkayo peuas tekichiuas uan Jesucristo elis nopa Tlanauatijketl. ¿Tikitak nochi ni tlamantli kinextia nopa tlajtolpanextili tlen ijkuilijtok ipan Daniel capítulo 4 kamanalti tlen toTeotsij iTlanauatijkayo?

Ernesto: Kena nelia. Ayamo nijkuamachilia kenke tikijtoua nopa tlajtolpanextili mouika ika xiuitl 1914.

Julio: Sampa ma tikamanaltikaj tlen nopa tlanauatijketl Nabucodonosor. Tikijtojkej kema achtoui moaxitik nopa tlajtolpanextili, ya eliyaya kejuak nopa ueyi kuauitl. Ya ayokmo tlanauatik kema kitsontejkej nopa kuauitl uan panok chikome xiuitl. Maske Nabucodonosor uiuitixki, kema tlanki nopa chikome xiuitl sampa uelki tlanauatik. Uan kema ika ompa moaxitik nopa tlajtolpanextili, toTeotsij iTlanauatijkayo ayokmo tlanauatik. Ni amo panok pampa toTeotsij kichijtoya tlen amo kuali.

Ernesto: Amo nijkuamachilia.

Julio: Uejkajkia, kiijtouayayaj katli eliyayaj tlanauatianij ipan altepetl Israel, moseuiyayaj “ipan isilla” Jehová. * Nopa kiijtosneki kiixnextiyayaj toTeotsij, uan inintlanauatijkayo kiixnextiyaya toTeotsij iTlanauatijkayo. Maske ya nopa kiixnextiyayaj, kema panok miak xiuitl, inijuantij kitlauelkajkej Jehová uan sekinok maseualmej nojkia kiampa kichijkej. Yeka, toTeotsij kinkajki babiloniaeuanij ma kintsontlamiltikaj israeleuanij ipan xiuitl 607 kema ayamo ualajtoya Jesús. Ipan nopa xiuitl, ayokmo itstoyaj tlanauatianij katli kiixnextiyayaj toTeotsij iTlanauatijkayo ipan Jerusalén. Nopaya kejuak toTeotsij ayokmo tlanauatik. ¿Nama kena tijkuamachilik?

Ernesto: Kena nijkuamachilijtia.

Julio: Nopa chikome xiuitl pejki ipan xiuitl 607 kema ayamo ualajtoya Jesús. Ipan nopa xiuitl, toTeotsij iTlanauatijkayo amo tlanauatijtoya. Uan kema tlanki nopa xiuitl, toTeotsij kitlalik seyok tlanauatijketl ipan iluikak. Nopa sekinok tlajtolpanextili tlen tijpojkej ipan amochtli Daniel, nojkia moaxitijkej kema tlanki nopa xiuitl. Nama ma timotlajtlanikaj: “¿Kema tlanki nopa chikome xiuitl?”. Tlaj tijmatisej kema tlanki nopa chikome xiuitl, tikitasej kema pejki tekichiua toTeotsij iTlanauatijkayo.

Ernesto: ¿Elki ipan xiuitl 1914?

Julio: Kena, kualtitok.

Ernesto: ¿Kenijkatsa uelis tijmatisej nelnelia elki ipan nopa xiuitl?

Julio: Kema Jesús itstoya ipan Tlaltipaktli, kiijtok nopa chikome xiuitl ayamo tlamiyaya. * Uajka uelis tikijtosej nopa chikome xiuitl tlauel uejkajki. Nopa chikome xiuitl pejki kema nojua poliuiyaya tlauel miak xiuitl ika ualaskia Jesús, uan nojua uejkajki tlauel miak xiuitl kema tlakuepilik iluikak. Uan xikilnamiki tikijtojkej nopa tlajtolpanextili tlen ijkuilijtok ipan amochtli Daniel, ueliskia mokuamachilis ipan “itlamia tonali”. * Kema nechka tlamiskia xiuitl 1,800, se keskij katli momachtiyayaj Biblia, kiitakej monekiyaya kuali momachtisej uan kitlachilisej nopa tlajtolpanextili. Ika yolik kikuamachilijkej nopa chikome xiuitl tlamiskia ipan 1914. Tlen pejki mochiua ipan Tlaltipaktli ipan nopa xiuitl, kinextia ipan nopa tonali pejki tekichiua toTeotsij iTlanauatijkayo ipan iluikak uan nojkia pejki itlamia tonali. Nijmati san nima tijkuamachilisej ni eli kentsi ouij Ernesto.

Ernesto: Kena, nimoiljuia miakpa nikompauis uan kiampa kuali nijkuamachilis.

Julio: Amo ximotekipacho, na nojkia niuejkajki uan kiampa nijkuamachilik. Tlen timomachtijkej uelis mitspaleuik tikitas nochi tlen Jehová itlajtoltemakauaj titlamachtiaj tlen toTeotsij iTlanauatijkayo, mokixtijtok ipan Biblia.

Ernesto: Kena, nochipa nikitstok tlauel inmotemachiaj ipan tlen Biblia kiijtoua.

Julio: Nikita ta nojkia tijneki timotemachis ipan tlen Biblia kiijtoua. Kej nimitsiljuik, elij kentsi ouij san nima tijkuamachilis ni tlamachtili, uan uelis nojua timotlajtlania se keski tlamantli. Se neskayotl, pampa tikijtojkej nopa chikome xiuitl pejki ipan xiuitl 607 kema ayamo ualajtoya Jesús uan mouika ika toTeotsij iTlanauatijkayo. Uajka, ¿kenke tikijtouaj tlanki ipan xiuitl 1914? *

Ernesto: Kena, ya nopa nimotlajtlania.

Julio: Biblia nojkia techpaleuia ma tijmatikaj keski uejkajki nopa chikome xiuitl. ¿Uelis niualas seyok tonali uan kiampa tikamanaltisej tlen nopa tlamantli? *

Ernesto: Kena, nikaj nimitschias.