Kema asis itlamia nochi, panos tlen tlauel amo kuali. Biblia kiijtoua: “Onkas se ueyi tlaijiyouilistli keja tlen axkema onkatok hasta kema pejki Tlaltipaktli. Uan axkema onkas seyok kej ni. Intla toTeko axkichiuaskia kototsi nopa tonali tlen tlaijiyouilistli, nochi mikiskiaj” (Mat. 24:21, 22). Uan kiijtoua sekij momanauisej: “Panoti ni Tlaltipaktli [...,] pero ajkeya kichiua tlen toTeko kineki, itstos para nochipa” (1 Juan 2:17).

¿Tlake moneki tijchiuasej tlaj tijnekij timomanauisej? ¿Moneki peuas tijnechikosej miak tlamantli? Amo. Biblia techtlajtolmaka: “Pampa ya inkimatij keja ni toTeko kixoleuas nochi tlen onka, moneki xiitstokaj intlatsejtseloltikej uan xijchiuakaj tlen senkistok kuali para más tiitstiasej keja toTeko. Xitlachixtokaj para nopa tonal kema nesis itekiuejkayo toTeko” (2 Ped. 3:10-12). Tlen achtoui kiijtoua, kinextia toTeotsij “kixoleuas” o kintsontlamiltis tekichiuanij katli amo xitlauak tlanauatiaj, katli kinpaleuiaj uan amo kinekij ma tekichiua toTeotsij iTlanauatijkayo. Uajka, nochi tlen ueliskia tijpiasej amo kichiuas ma timomanauikaj kema kitsontlamiltisej nochi.

Uelis timomanauisej tlaj tijyekosej timonejnemiltisej kej toTeotsij kineki uan tlaj amo kema tijtlauelkauasej (Sof. 2:3). Amo kinamiki tikijtosej amo panotok tlen kinextia tiitstokej ipan itlamia tonali, kej miakej. Moneki kuali tikilnamiktosej “nopa tonal kema nesis itekiuejkayo toTeko”. Jehová itlajtoltemakauaj uelis mitsnextilisej ika Biblia tlen moneki tijchiuas tlaj tijneki timomanauis.