Tikintlalnamiktis mokoneuaj kiijtosneki tikinyakanas, tikinmachtis uan kemantika tikintlakaualtis. Nojkia kiijtosneki tikinpaleuis ma kiitakaj tlake kinamiki kichiuasej, kiampa kimatisej tlake kitlapejpenisej uan amo mokuapolosej.

Ipan se keski xiuitl tlen panotok, tetajmej ayokmo kintlalnamiktiaj ininkoneuaj pampa moiljuiaj tlaj kiampa kichiuasej, uajka ininkoneuaj moiljuisej amo tleno ininpati. Maske sekij kiampa moiljuiaj, tetajmej katli kuali kiniskaltiaj ininkoneuaj kena kiniljuiaj tlake moneki kichiuasej uan tlake amo.

“Konemej moneki kimatisej onka se keski tlamantli tlen amo uelis kichiuasej, nopa kinpaleuis kuali ma monejnemiltikaj kema moskaltisej. Tlaj amo kimajtosej nopa, uajka elisej kej se barco tlen amo kipia tlen ika moyakana, pampa amo kuali kitlapejpenisej tlen kichiuasej uan teipa amo kuali itstosej” (Pamela).

Xijchiua tlen tikiljuia. Tlaj mokone amo kichiua tlen tikiljuia, xijtlalnamikti. Uan tlaj kena kichiua tlen tikiljuia, xikiljui kuali tlen kichijki.

“Nama miakej ayokmo kichiuaj tlen kiniljuiaj, yeka kema nokoneuaj nechneltokaj, nochipa nikiniljuia kuali tlen kichijkej. Nopa kinpaleuia amo ma moyolkokokaj kema nikintlalnamiktia” (Christine).

TLEN BIBLIA TETLAJTOLMAKA: “Tlen inkitokasej, ya nopa inkipixkasej” (Gálatas 6:7).

Xijchiua san tlen kinamiki. Kema tijtlalnamiktis mokone xikilnamiki keski xiuitl kipia, tlake tlamantli amo ueli kichiua uan tlake tlamantli amo kuali kichijki. Konemej tlauel kinpaleuia kema inintatauaj kintlalnamiktiaj kema kichiuaj tlen amo kuali. Tlaj mokone amo mitsneltoka maske tikiljuik keski tonali moneki kitekiuis celular, uajka xijkuili o xikiljui san kemantika uelis kitekiuis. Xijchiua kampeka amo tlauel tikualanis kema kichiuas se tlamantli tlen amo mitspaktis.

“Nochipa nijchiua kampeka nikitas tlaj nokone mokuapolok o tlaj san kinejki amo nechneltokas. Moneki tikitas kenijkatsa tijtlalnamiktis, pampa amo tijtlalnamiktis ika sanse tlamantli tlaj tikitas nochipa amo mitsneltoka o tlaj san sempatsi kiampa kichijki” (Wendell).

TLEN BIBLIA TETLAJTOLMAKA: “Xitlakakikaj inmojuantij tlen inkinpiaj inmokoneuaj. Amo xikinkualankamakakaj inmokoneuaj para ma axmokuesosej” (Colosenses 3:21).

Xikinikneli mokoneuaj. Tlaj tijnextia tikiniknelia mokoneuaj kema tikintlalnamiktia, inijuantij kuali mitstlakakilisej kema tikintlalnamiktis uan kichiuasej tlen tikiniljuik.

“Kema tokone mokuapolouayaya nochipa tikiljuiyayaj tiyolpakiyayaj pampa miakpa kuali kitlapejpenijtoya tlen kichiuas. Nojkia tikiljuiyayaj tlaj ayokmo kichiuaskia nopa, sekinok kuali kiitaskiaj uan tojuantij tijpaleuiskiaj” (Daniel).

TLEN BIBLIA TETLAJTOLMAKA: “Se tlen teiknelia kipia iyolo ininuaya sekinok uan kinchiuilia tlen kuali” (1 Corintios 13:4).