Tijuikaj kipano matlaktli xiuitl tijtekiuiaj nopa carritos. Ipan nochi Tlaltipaktli maseualmej ueli kiitaj ni carritos tlen kiuika amatlajkuiloli. Kema tijtlaliaj se carrito maseualmej techitaj uan ya kimatij ajkia tielij. Amo san yejyektsitsij, nojkia amo ouij kej motekiuia. Se tosiuaikni katli eua Polonia uan itoka Asenata, kiijtok: “Ni carritos amo tlauel uejueyi, kuali nesi uan uelis tijuikas kampa ueli”.

 Timotlajtlanijtok ¿kenijkatsa moiljuijkej kichijchiuasej ni carritos uan kenijkatsa kinchijchiuaj?

 Ipan 2001, Katli kinyakanaj Jehová itlajtoltemakauaj kiniljuijkej toikniuaj tlen Francia ueliskia kitekiuisej sekinok tlamantli kema tlajtolmoyauaskiaj kampa panoj miakej, kej exhibidores portátiles. Kiitakej tlake ueliskia kitekiuisej, se neskayotl, kitekiuijkej maletas ika ruedas uan carritos tlen kitekiuiaj kema tlakouaj uan nopaya kitlaliyayaj uan kiajokuiyayaj amatlajkuiloli. Teipa kali Betel tlen Francia kiijtok kenijkatsa eliskia nopa carritos, uan toikniuaj kiampa pejkej kichiuaj ipan miak xiuitl.

 Tlen toikniuaj kichijkej tlauel kuali kiski. Yeka, ipan 2011 Katli kinyakanaj Jehová itlajtoltemakauaj kiijtojkej motekiuiskia carritos uan mesas kema tlajtolmoyauaskiaj kampa panoj miakej ipan Nueva York (Estados Unidos). Toikniuaj precursores katli kitekiuijkej nopa carritos kiitakej tlauel kinpaleuik, pampa ueliyaya kiuikasej kampa ueli. Pero nojkia kiitakej uan kiijtojkej monekiyaya kipatlasej se keski tlamantli. Nopa carritos kichijchijtoyaj ika kuauitl uan eliyaya ouij kitlekoltisej uan kitemouisej ipan escalones. Yeka, kiitakej kenijkatsa kichiuaskiaj para amo etik eliskia yon amo ma uetsi kema tlaajakaskia. Nojkia kichiuilijkej llantas tlen achi uejueyi tlen kipaleuiskia kema kiuikaskiaj kampa amo kuali ojtli. Uan ika iika kitlalilijkej kampa ueliskia kiajokuisej amatlajkuiloli.

 Tlen kichijkej nochi kuali kiski. Yeka ipan 2012, Katli kinyakanaj Jehová itlajtoltemakauaj kiijtojkej ueliskia kitekiuisej carritos ika amatlajkuiloli ipan nochi Tlaltipaktli. Toikniuaj kitemojkej se fábrica kampa ueliskia kinchiuilisej miak carritos tlen amo ejetik uan uejkauaskia.

 Kej panotok tonali nojua kipatlatokej se keski tlamantli. Se neskayotl, ipan 2015 kichijchijkej ipantsajka ika plástico, kiampa kipaleuiskia amo ma xoloni kema uetsi atl. Dina, se tosiuaikni katli eua Georgia tlauel kipaktik kej kichijkej, ya kiijtoua: “Ipantsajka kipaleuia amatlajkuiloli amo tleno ma kipano”. Ipan 2017 pejki kisa carteles tlen kipia imán ipan se keski tlajtoli. Toikni Tomasz, katli eua Polonia kiijtoua: “Eliyaya tlauel ouij tijpatlas nopa carteles tlen san mopepechouayaya. Nama ika nopa carteles tlen kipia imán ayokmo eli ouij”. Ipan 2019 kipatlakej tlen ika kichijchiuayayaj uan kej kichijchiuayayaj, uan nopa kipaleuiskia nojua tlauel ma uejkaua.

 San se fábrica kichijchiua nochi nopa carritos, uan teipa motitlani ipan nochi Tlaltipaktli. Nama ni carrito ipati 43 dólares, uan kema kititlanij sejkanok uan motekiuia sekinok tlamantli iyoka moixtlaua. Ipan ni tonali motitlantok kipano 420,000 carritos ipan miak tlanechikoli tlen nochi Tlaltipaktli, uan tijtekiuijtokej kipano 16 millones tlen dólares.

 Pampa tijnekij kuali tijtekiuisej nopa tomij tlen miakej temakaj, tijkouaj carritos ika imiaka. Kema nopa carritos sojsoliuis o kipolos se tlamantli, toikniuaj uelis kikouasej uan kikualchijchiuasej, kiampa ayokmo monekis kikouasej seyok.

 Toikniuaj kinpaktia kiteuisej nopa carritos kema tlajtolmoyauaj. Martina katli eua Ghana kiijtoua: “Kema titlajtolmoyauaj tojuantij tikintemouaj maseualmej. Nechpaktia nitlajtolmoyauas ika carrito, pampa nopaya elij maseualmej katli monechkauiaj. Nochi katli panoj nopaya kiitaj tijmoyauaj toTeotsij itlajtol”.

 Ipan África, se tlakatl kiuikak amatlajkuiloli tlen se carrito ipan itlajtol. Kema panok se semana nopa tlakatl sampa tlakuepilik uan kiniljuik toikniuaj: “Nijpojki nochi nopa amatlajkuiloli. Tlen kiijtoua eli tlauel ipati, yeka nijuikas ipan noaltepe, kiampa nochampoyouaj nojkia uelis kipouasej”. Ichampoyouaj itstoyaj tlauel uejka, se 500 kilómetros. Uan kema panok ome metstli, nopa tlakatl sampa tlakuepilik uan kiijtok: “Maseualmej tlen noaltepe nochi kipojkej nopa amatlajkuiloli uan tlauel kinpaktik tlen nopaya kiijtoua. Mosentlalijtokej elisej Jehová itlajtoltemakauaj, pero nojkia kinekij kimatisej se keski tlamantli. Kimatij tlaj kinekij moatsonpoliuiltisej moneki elis ipan atl, pero kampa itstokej amo onka yon se ueyatl. ¿Moneki ualasej nikaj tlaj kinekij moatsonpoliuiltisej?”. Toikniuaj kipaleuijkej ma monojnotsa iuaya se toikni precursor katli kamanalti itlajtol. Yeka, pejkej nochipa mokamanaljuiaj.

 Tlauel kuali pampa nopa carritos motekiuia “ipan nochi tlaltinij ipan ni Tlaltipaktli para nochi tlakamej ma kimatikaj” (Mateo 24:14). Pampa miakej temakaj tomij ipan nochi Tlaltipaktli uan sekij kichiuaj ipan donate.ps8318.com, kichijchiuaj miak ika llantas. ¡Tlaskamati miak pampa intemakaj inmotomij!