¿Tikitstok miakej religiones san mosentlalijtokej kitlanisej miak tomij uan amo kinpaleuiaj maseualmej ma tlaneltokakaj ipan toTeotsij? Inijuantij kinpaleuiaj maseualmej pampa kinekij ma kintlaxtlauikaj uan nojkia kintlanamakiltiaj. Katli tlayakanaj ipan nopa religiones kitlanij miak tomij uan kipiaj miak tlamantli tlen pajpatiyo. Ma tikitakaj tlen panotok.

•   Katli kitlachiliaj tlen kichiuaj maseualmej kiijtojkej se obispo católico paxalok kipano 13 xiuitl ika inintomij maseualmej. Nechka 150 imiakpa kiixtlajki avión kampa san ya yauiyaya uan se 200 imiakpa paxalok ipan se kuali carro tlen kiiljuiaj limusina, katli nojkia tlauel patiyo. Nojkia, kitekiuik kipano 4 millones de dólares kema kikualchijchijki nopa kali kampa itstoya ipan iglesia.

•   Ipan África, tlauel miakej maseualmej mosentiliaj ipan se ueyi iglesia kampa tlamachtia se katli tlayakana ipan religión. Nopaya kinamaka miak tlamantli, kej “aceite tlen kiijtoua uelis kinpaleuis maseualmej”, toallas uan yoyomitl kampa nesi iixkopinka. Maske ya tlauel tlatominpia, miakej katli nopaya mosentiliaj tlauel teikneltsitsij.

•   Ipan China, katli tlaneltokaj ipan Buda tlaueyichiuaj ipan naui tepetinij, uan omej tlen nopa tepetinij tlauel kitlanij miak tomij, yeka nojkia nesij kampa itstokej katli tlatominpiaj (o bolsa de valores). Uan nopa templo Shaolín, kampa ueli mokalakijtok pampa kineki kitlanis miak tomij. Yeka, katli tlayakana nopaya kiiljuiaj “monje katli tlayakana kampa kitlanij miak tomij”.

•   Ipan Estados Unidos kampa kiyakanaj se ueyi tekitl, kintekimakaj maseualmej katli tetlajchiuiaj. Se amochtli kiijtoua inijuantij kinmachtiaj sekinok tlen momajtokej kichiuaj uan kiampa amo tleno kinpanos, uan nojkia kejuak kinpaleuiaj ma kinechkauikaj toTeotsij.

 ¿Tlake timoiljuia kema tikita religiones kichiuaj se keski tlamantli tlen ika kitlanij tomij? ¿Timoiljuijtok kenijkatsa kiita toTeotsij kema katli tlayakanaj ipan religiones tlainamaj kema tlamachtiaj?

 ToTeotsij amo kuali kiita kema katli tlayakanaj ipan religiones san kinekij kitlanisej tomij. Uejkajkia, Biblia kiijtoua itstoyaj sacerdotes katli kiijtouayayaj kitekipanouayayaj toTeotsij maske tlainamayayaj ika tlen kichiuayayaj. ToTeotsij amo kipaktik tlen kichijkej (Miqueas 3:11). Yeka, kiijtok kintlatsakuiltis katli kitekiuijkej ichaj kej kampa “tlachtekinij [...] mosentiliaj” (Jeremías 7:11). Nochi tlen kichiuayayaj eliyaya san pampa kinekiyayaj kitlanisej miak tomij.

 Kej iTata, Jesús nojkia kiijiayaya kema kitekiuiyayaj religiones san pampa kinekiyayaj kitlanisej tomij. Kema itstoya ipan Tlaltipaktli katli tlayakanayayaj ipan religiones tlen Jerusalén, kinkauayayaj ma tlanamakakaj kampa tlaueyichiuayayaj uan kiampa kitlaniyayaj miak tomij. Maseualmej katli kuali ininyolo uan yauiyayaj kampa kiueyichiuaj toTeotsij, tlauel patiyo kintlanamakiltiyayaj. Jesús tlauel amo kuali kiitak tlen kichiuayayaj, yeka kintojtokak nopa tlanamakanij uan kiniljuik: “Ayok xijchiuakaj inmotiankis teopankalijtik pampa ni [...] ichaj noTata” (Juan 2:14-16).

 Kema Jesús itstoya ipan Tlaltipaktli kinextik nojkia kiitayaya se keski tlamantli kej toTeotsij (Juan 8:28, 29). Amo kema tlainanki kema tlamachtiyaya yon tlajtlanki tomij kema kichiuayaya uejueyi tlamantli, kej kema kitlamakak maseualmej, kinchikajki kokoyanij yon kema kinyolkuik se keskij. Maske Jesús amo kipixtoya se kali tlen iaxka, amo kema tlajtlanki tomij kema tlamachtik tlen toTeotsij (Lucas 9:58).

 Jesús kiniljuik itokilijkauaj amo kema ma tlajtlanikaj tomij kema tlamachtiskiaj. Ya kiniljuik: “San tlapik niinmechmaka ni chikaualistli, uajka axkema xitlainamakaj kema intepaleuisej” (Mateo 10:8). Uan ya nopa kichijkej achtoui Cristo itokilijkauaj. Ma tikitakaj se keski neskayotl:

•   Apóstol Pedro, elki se katli iuaya nenki Jesús kema itstoya ipan Tlaltipaktli. Se tonali se tlakatl katli motokaxtiyaya Simón, kiiljuik Pedro kimakaskia tomij tlaj kitekimakaskia uan kimakaskia chikaualistli. Pedro nima kiiljuik Simón amo kuali tlen moiljuiyaya. Ya kiiljuik: “Ma toTeko mitstsontlamilti iuaya motomi pampa timoiljuia uelis tijkouas nopa tlen san toTeko ueli temaka uan yajaya temaka keja se regalo” (Hechos 8:18-20).

•   Apóstol Pablo kiixmatkej pampa kinpaxalouayaya tlanechikolmej. Maske miak xiuitl chikauak tlatekipanok ipan tlanechikolmej, amo kema kinejki ma kitlaxtlauikaj. Ya uan katli nemiyayaj iuaya amo eliyayaj sanse kej “tlakamej tlen kitekiuiaj iTlajtol toTeko para [...] kitlanisej tomij”, kej miakej kichiuayayaj (2 Corintios 2:17). Pablo kiijtok: “Titekitiyayaj youali uan tonali para tijtlanisej tlen ika tipanosej para ma axtiinmechkuatotonikaj kema tiinmechiljuiyayaj iTlajtol toTeko” (1 Tesalonicenses 2:9).

 Maske nopa achtoui Cristo itokilijkauaj nojkia kitekiuijkej tomij tlen ika tlajtolmoyauayayaj uan kema kinpaleuiyayaj sekinok, amo kema tlainankej kema tlamachtiyayaj. Tlaj se akajya kinekiyaya temakas se kentsi tomij, ueliskia kichiuas kej kiijtoua ni textos:

•   2 Corintios 8:12: “Intla se tlakatl temakas iofrenda ika iyolo, uajka toTeko kiselis nopa ofrenda keja tlen nopa tlakatl kipia, yonke miak o kentsi. Yajaya axinmechtlajtlania xitemakakaj tlen axinkipiaj”.

   Tlen kiijtosneki: Tlauel ipati kema se maseuali temaka se tlenijki ika nochi iyolo, uan amo keski temaka.

•   2 Corintios 9:7: “Sejse inmojuantij moneki temakas keja ipa moyoliljuijtok para temakas. Amo xitemakakaj ika kuesoli, niyon pampa seyok inmechfuerzajuia, pampa toTeko kiiknelia tlen temaka ika pakilistli”.

   Tlen kiijtosneki: ToTeotsij amo kineki se akajya ma temaka tomij san pampa kichiualtiaj. Ya kineki maseualmej ma temakakaj ika nochi ininyolo.

 Biblia kiijtoua toTeotsij amo kuali kinita nochi religiones yon kej momajtokej kiueyichiuaj (Mateo 7:21-23). Ipan se tlajtolpanextili, Biblia kiijtoua nochi religiones katli amo melauak elij kej se momekatijkasiuatl. ¿Kenke? Pampa mopaleuiaj ininuaya tlanauatianij pampa kinekij tomij o sekinok tlamantli, uan nojkia kintlachtekiliaj maseualmej tlen kampa ueli euaj (Apocalipsis 17:1-3; 18:3). Ni tlajtolpanextili nojkia kiijtoua toTeotsij nechka kintlatsakuiltis religiones katli amo melauak (Apocalipsis 17:15-17; 18:7).

 ToTeotsij ayokmo kineki religiones nojua ma kinkajkayauakaj maseualmej o ma kinuejkatlalikaj tlen ya (Mateo 24:11, 12). Yeka, kiniljuia maseualmej katli kipiaj kuali ininyolo ma kiueyichiuakaj kej ya kineki uan ma mouejkatlalikaj tlen religión katli amo melauak (2 Corintios 6:16, 17).