Jehová itlajtoltemakauaj techpaktia tikinpouilisej nochi maseualmej tlen Biblia tlamachtia maske sekij amo kinekij techtlakakilisej. ¿Kenke kiampa tijchiuaj? Pampa tikikneliaj toTeotsij uan nojkia maseualmej (Mateo 22:37-39). Pampa tikikneliaj toTeotsij techyololinia ma tijchiuakaj tlen Jesús kiijtok, ma ‘tikinkamanaljuikaj nochi maseualmej tlen ya’ (Hechos 10:42; 1 Juan 5:3). Tijchiuaj kej kichijkej toTeotsij itlajtolpanextijkauaj katli uejkajkia itstoyaj, yeka tikiniljuiaj maseualmej tlen Biblia tlamachtia (Jeremías 25:9). Nojkia tikinikneliaj maseualmej, yeka tikinmachtiaj tlen toTeotsij iTlanauatijkayo maske sekij amo kinekij techtlakakilisej, pampa tijmatij nopa uelis kinmanauis (Mateo 24:14).

 Kemantika sampa tijpanoj ipan se kali kampa amo kinejkej techtlakakilisej, pampa tikinpantiaj sekinok katli kena kinekij techtlakakilisej. Ma tikitakaj kenke kiampa pano:

•   Pampa maseualmej yauij mochantiaj sejkanok.

•   Pampa sekij maseualmej tlen nopa kali kena kinpaktia.

•   Maseualmej uelis moyolpatlasej. Tlen pano ipan Tlaltipaktli uan tlen kinpano maseualmej, uelis kichiuas sekij ma kinekikaj kimatisej tlen Biblia tlamachtia (Mateo 5:3). Uan maske sekij kualanij, inijuantij uelis moyolpatlasej kej kichijki apóstol Pablo (1 Timoteo 1:13).

 Tojuantij amo tikinchiualtiaj maseualmej ma techtlakakilikaj (1 Pedro 3:15). Tijmatij sejse tlen tojuantij moneki kitlapejpenis tlake kineltokas (Deuteronomio 30:19, 20).