1 Tesalonicenses 2:1-20
2 Nokniuan, namejuan kuali nankimatij ke amo nenkaj tamechkalpanojkej.
2 Kemej nankimatij, titajyouijkej uan toka mauiltijkej ompa Filipos, sayoj ke Dios techyolchikauak* para tamechixmatiltiskej kuali tanauatilmej* maski semi techixnamikiaj.*
3 Porin keman tamechyolmajxitiaj, amo timopolouaj uan tamechiluiaj tein chipauak uan amo tamechkajkayauaj,
4 uan kemej Dios techixtalij maj tikteixmatiltikan kuali tanauatilmej, amo tamechnojnotsaj para tikinyolpaktiskej oksekin, ta para tikyolpaktiskej Dios, akin kiyekita toyolo.
5 Tein melauj, namejuan nankimatij ke amo keman tamechueyitalijkej, nion titaixkajkayaujkej para xitechmakakan tomin. ¡Dios kiitstok ke amo ijkon!
6 Amo no tiktemouanij maj techueyitalikan, nion namejuan nion oksekin, maski ueliskia tamechiluiskej xitechtekipanokan porin tiitatitaniluan Cristo.
7 Amo tikchiujkej nejon, ta tamechtasojtakej uan tamechyekpiakej, ijkon kemej se temomaj kinchichitia ikoneuan uan kinyekpia porin kintasojta.
8 Yejua ika, kemej semi tamechtasojtaj, ika miak pakilis tamechixmatiltijkej ikuali tajtoluan Dios, uan no hasta timotemakakej timikiskej para tamechpaleuiskej.
9 Nokniuan, nikyekmattok ke nankielnamikij ke chikauak titekitikej uan amo timoseuijkej. Keman tamechixmatiltijkej ikuali tajtoluan Dios, titekitikej youalintonal para amo monekis nantechtekipanoskej.
10 Tein melauj nokniuan, keman tietoyaj namouan tichipaujkanenkej, timelaujkanenkej uan amo nantechajxilijkej nion teyi tein amo kuali. Namejuan nankiyekmatij nejon uan no Dios.
11 Kuali nankimatij ke ijkon kemej se tepopaj kichiua iniuan ikoneuan, tejuan tamechyolmajxitiayaj, tamechyolseuiayaj uan tamechnejmachtiayaj nansejsemej
12 para xiksentokakan xinemikan kemej moneki nemiskej akin kitekitiliaj Dios, akin namechnotstok para xikalakikan itech iTaixyekanalis uan para namechueyitalis.
13 Yejua ika tejuan nochipa tiktasojkamatiliaj Dios, porin keman namejuan nankikakkej itajtol Dios, tein tejuan tamechmatiltijkej, amo nankineltokakej kemej inintajtol takamej, ta kemej yekmelauj itajtol Dios, tein no namechpaleuijtok namejuan akin nantaneltokaj.
14 Nokniuan, namejuan nankichiujkej kemej imomachtijkauan Cristo Jesús akin pouij itech inechikoluan Dios ompa Judea. Porin namejuan no namechtajyouiltijkej akin nemij itech namoaltepeuj, ijkon kemej judíos no kintajyouiltijtokej tokniuan ompa Judea.
15 Judíos hasta kimiktijkej toTekotsin Jesús uan tanauatianij,* uan no techtajyouiltijkej tejuan. Uan no, yejuan amo kiyolpaktijtokej Dios, uan tein kichiuaj amo akin kipaleuia,
16 porin kitemouaj maj amo tikinixmatiltikan akin amo judíos keniuj uelis momakixtiskej. Ijkon yejuan nochipa tajtakolchiujtokej. Sayoj ke iueyi kualanyo Dios inintech uetsikoya.
17 Nokniuan, keman monekik tamechkauaskej* seki tonalmej (amo uelia tamechitayaj, sayoj ke tiksentokayaj tamechelnamikiaj), uan kemej tiktelnekiaj tamechitaskej, tikchiujkej nochi tein tiuelkej para tamechitaskej.
18 Yejua ika tiknekiaj tamechkalpanotiuij. Kemaj, nejua Pablo, niktemoj nias amo sayoj sepa, ta ojpa. Sayoj ke Satanás techtsakuilij.
19 Porin keman toTekotsin Jesús mokepasya,* ¿toni tikchiaskej, toni techyolpaktis oso toni taxtauil* ika timoueyitaliskej iixpan? ¿Amo namejuan?
20 Kemaj, namejuan nankichiuaj maj timoueyitalikan uan maj tiyolpakikan.
Tajtolmelaualismej
^ Oso “techpaleuij maj amo timouikan”.
^ Oso “tajtolmej”.
^ Oso xa “tikixnamiktoyaj miak taman”.
^ Xikonita tanauatijkej.
^ Oso “keman techxexelojkej”.
^ Tajtol griego, parousía. Xikonita keman Cristo mokepasya.
^ Itech griego, “corona”.
