1 Timoteo 2:1-15
2 Yejua ika achto namechiluia ke moneki maj ininka timotataujtikan nochin, maj tikintajtouikan uan maj semi tiktajtanikan Dios maj kinpaleui uan maj tiktasojkamatilikan,
2 uan no maj tikinelnamikikan tekiuanij uan nochin uejueyi chiuanimej, para maj tiksentokakan tiyolseujkanemikan, maj amo timotekipachokan, maj senkis tikueyichiuakan Dios ika nochi toyolo uan maj amo teyi tikauilmatikan.*
3 ToTemakixtijkauj Dios, kiita ke nejin kuali yetok uan kiyolpaktia,
4 porin yejua kineki maj akin yeski momakixti uan maj kuali kiixmati tein melauak.
5 Porin nemi sayoj se Dios, uan yetok sayoj se akin techtajtouia iixpan Dios: se takat, Cristo Jesús,
6 akin kitemakak inemilis uan ika kiixtauak tein monekia para kinmakixtis nochin porin tajtakolejkej. Nejin moteixmatiltis keman ejkos tonal.
7 Para niknextis ke melauak nejin, Dios nechixtalij kemej tanojnotskej uan kemej tatitanil, para nikinmachtis akin amo judíos maj takuaujtamatikan uan maj kiixmatikan tein melauak. Nikijtoua tein melauak, amo nitakajkayaua.
8 Yejua ika, kampa yeski namosentiliskej, nikneki maj takamej kichiuakan* netataujtil, uan moneki yeskij yolchipaujkej, amo kualantoskej nion motajtolteuiskej iniuan oksekin.
9 No ijkon, siuamej moneki motasaltiskej kemej kinamiki uan keman mochijchiuaskej maj kinextikan ke yektalnamikij uan maj amo kitelpanoltikan, uan no maj taixejekol kemej mokuaxiluiskej, amo ika oro nion tetsitsin tein patiyojkej oso tasal tein semi patiyoj,
10 ta moneki mochijchiuaskej kemej kinamiki mochijchiuaskej siuamej akin kiueyichiuaj Dios ika nochi ininyolo. Yejuan moneki mokualtsintiliskej ika nochi tein kuali tein kichiuaskej.
11 Maj siuamej sayoj takaktokan* uan maj mokauakan maj kinmachtikan.*
12 Amo nikaua maj siuamej tamachtikan nion maj kinixyekanakan takamej; ta maj sayoj takaktokan.*
13 Porin Dios achto kichijchiuak Adán, uan satepan Eva.
14 Uan no, Adán amo kikajkayaujkej, ta yejua siuat akin senkis kikajkayaujkej uan tajtakoj.
15 Sayoj ke, se siuat semi kipaleuis maj kinpia ikoneuan, porin nejon kipaleuis maj amo kichiua tein amo kuali, sayoj ke moneki maj kisentoka takuaujtamati, maj tetasojta, maj chipauak iixpan Dios uan maj yektalnamikto.
Tajtolmelaualismej
^ Oso “maj tikyekchiuakan nochi”.
^ Oso “momaajokuikan para kichiuaskej”.
^ Oso “amo tajtokan”.
^ Nejin kijtosneki itech nechikol.
^ Oso “maj amo teyi kijtokan”.
