SANTIAGO uan Judas katkaj itakpaikniuan Jesús, uan Pedro uan Juan katkaj itatitaniluan. Nejin naui takamej ika ichikaualis Dios kijkuilojkej chikome cartas tein kipia Tajkuilolmej Griegas Cristianas, uan sejse carta kipia itokay akin kijkuiloj. Ika nejin, kinekiaj kinpaleuiskej itatojtokakauan Cristo maj amo kikauanij Dios niono iTekiuajyo.

Moneki kinextiskej takuaujtamatilis. Amo moneki sayoj se kijtos ke se kipia takuaujtamatilis, ta moneki se kinextis ika tachiualis. Kemej kijtoj Santiago: “Se itakuaujtamatilis amo teyi ipatiuj komo amo [se] kinextijtinemi [...] ika ne kuali tatakamatilis” (Santiago 2:​26). Akin kinextia takuaujtamatilis keman kiixnamiki tayejyekolis okachi kipia taxikolis. Uan no, uelis kitajtanis Dios maj kimaka tamatilis, uan uelis kineltokas ke kiselis. Komo amo kikaua Jiova yejuatsin kiselis (Santiago 1:​2-6, 12). Dios nochipa kipaleuia akin kinextia ke kipia iyolo ajsitok iuan yejuatsin. Yejika Santiago tayolmajxitij: “Ximotokikan iuan Dios uan Yejuatsin no motokis namouan” (Santiago 4:8).

Itatojtokakauan Cristo moneki kichikauaskej imin takuaujtamatilis, ta nejon kinpaleuis maj kixikokan tayejyekolis uan maj amo uetsikan itech auilnemilis. Judas akin nemia kampa motelitaya auilnemilis, tayolmajxitij maj amo mokauakan maj ‘kinkuetauilikan imin takuaujtamatilis’ (Judas 3).

Moneki kisentokaskej chipaujkanemiskej. Jiova kichia maj itekitikauan mopiakan chipaujkej itech nochi. Pablo kijkuiloj: “Xinentinemikan ika ne yolchipaualis tech nochi namonemilispan. [...] [Porin] Totajtsin Dios techiluijtok tech Itajkuilolamatsin ijkuin: ‘Xiyolchipaujkej namejuan porin Nejuatsin no Niyolchipauaktsin’” (1 Pedro 1:​15, 16). Tein kinpaleuis maj kichiuakan nejon, moneki kitojtokaskej neskayot tein kikauak Cristo, uan kemej kijtoua Pedro, moneki kichiuaskej “ika miak nejmachkayot” (1 Pedro 2:​21, NM). Maski iksa ouij kinkisas kitakamatiskej itanauatiluan Dios, amo nenkaj, ta kinpaleuia ‘maj amo kinteluili ika tajtakol imin tamachilis’ (1 Pedro 3:​16, 17). Pedro kinextia ke motelneki kisentokaskej chipaujkanemiskej, uan ika tachiualis kinextiskej ke kinekij kiyolpaktiskej Dios achto ke ejkos Tonal keman Dios kiualkuis tatsakuiltilis uan nikan taltikpak “mochiujtos sayoj ten kualtsin chipaujkanemilis” (2 Pedro 3:​11-​13).

Moneki kinextiskej netasojtalis. Tatitanil Juan kijtoj ke “to Dios Yejuatsin tetasojtatinemi”. Jiova kinextia ke techteltasojta, ta kiualtitanik iKonetsin nikan taltikpak maj kitemakaki inemilis uan “maj technekixtiltiki ka in mikilis den totajtakoluan”. ¿Toni moneki techolinis maj tikchiuakan? Juan kimelauak ijkon: “Notasojikniuan, komo Dios ijkon techtasojtak, ijkuakon moneki tejuan no maj timosepantasojtakan se uan okse” (1 Juan 4:​8-​11). Uan se taman kemej tiknextiaj ke tikintasojtaj oksekin tokniuan, keman kuali tikinseliaj akin techkalpanouaj (3 Juan 5-8).

¿Uan keniuj kinextiaj itatojtokakauan Cristo ke kitasojtaj Jiova? Juan tanankilia: “Nestinemi ke melauj tikpiaj ne tetasojtalis de Dios, kuak no tiktakamatij ya in tanauatil [...]. Uan in tanauatilmej de Dios amo [...] ouij para se kintakamatinemis” (1 Juan 5:3; 2 Juan 6). Akin kitakamatij Dios senkis kiyekmatij ke uelis kisentokaskej itech inetasojtalis Dios, akin kinmakas ‘nochipanemilis’ (Judas 21).

​(Motaksaltia itech Santiago, 1 uan 2 Pedro, 1, 2 uan 3 Juan uan Judas.)