Judíos kichiuayaj Pascua nochi xiujmej itech tonal 14 metsti nisán. Ijkon kielnamikiaj ke Jiova kinkixtijka Egipto kampa kinteltekitiltiayaj uan kinuikaka itech Tal tein motenkaujka kinmakas. Itech xiuit 33, Jesús uan itatitaniluan kichiujkej Pascua ajko itech se kali tein moajsia Jerusalén. Keman tamitakuajkej, Jesús kijtoj: “Nansemej nechtemaktiti”. Tatitanilmej kimoujkakakkej uan kitajtanijkej: “¿Akoni?”. Jesús kinnankilij: “Yejua takat akin nikmaka nejin pantsin”. Uan kimakak sentakoton pantsin Judas Iscariote. Ompa, Judas niman moketsak uan yajki.

Satepan Jesús kichiuak se netataujtil, kitapanak se pantsin uan kinxejxelouilij tatitanilmej akin mokaujkej iuan. Kiniluij: “Xikuakan nejin pantsin. Kiixnextia nonakayo, tein namoka niktemakati”. Satepan, kichiuak se netataujtil achto ke kipanoltiskia vino, kinpanoltilij tatitanilmej uan kiniluij: “Xitayikan nejin vino. Kiixnextia noesyo, tein niktemakati maj ika namechtapojpoluikan nanmotajtakoluan. Nimotenkaua ke namejuan nantekiuajtiskej nouan ne iluikak. Xikchiuakan nejin nochi xiujmej uan ika xinechelnamikikan”. Itatojtokakauan Jesús kisentokaj mosentiliaj nochi xiujmej itech nejon tonal keman tapoyaui. Nejon nechikol kitokaytiaj iTakualis toTekotsin.

 Satepan ke takuajkej, tatitanilmej peujkej motajtolteuiaj porin kinekiaj kimatiskej akoni katka okachi ueyichiujkej. Sayoj ke Jesús kiniluij: “Akin okachi ueyichiujkej moneki monejnemiltis kemej akin okachi amo ueyichiujkej”.

Jesús no kiniluij: “Namejuan nannotasojikniuan. Yejua ika namechiluia nochi tein noTajtsin kineki maj namechilui. Amo uejkaua nimokepati iluikak, kampa yetok noTajtsin. Sayoj ke namejuan nanmokauatij nikan, uan taltikpakneminij kimatiskej ke nannomomachtijkauan komo nanmotasojtaj. Moneki nanmotasojtaskej kemej nejua namechtasojtak”.

Ompa, Jesús kitataujtij Jiova maj kinyekpiani nochin imomachtijkauan uan maj kinpaleuiani maj sentekitinij uan maj kuali mouikanij. No tajtanik maj itokay Jiova moueyitali. Satepan, Jesús uan itatitaniluan kiueyichiujkej Jiova ika nekuikatilmej uan yajkej. Amo uejkaua yaya kikitskitijya Jesús.