Tinochin tiikoneuan yekinika takat Adán. Nejon kijtosneki ke tinochin tikalyetouanij. Itech se kalyetouanij moneki motasojtaskej uan mopoujkaitaskej, sayoj ke itech nochi taltikpak nejon netasojtalis amo nochipa monextia. Sayoj ke, Dios amo kiuelita maj ijkon tikchiuakan.

“Moneki tiktasojtas mokniuj kemej tejua timotasojta” (LEVÍTICO 19:18).

“Xiktasojtakan naken namechtauelitaske” (MATEO 5:44).

Itech 1 Corintios 13:4-7 Dios techiluia keniuj moneki titetasojtaskej.

“Naken kipixtinemi tetasojtalis de Dios, yejua ne yolyemanik uan kixikoa tajyouilis”.

Xikonnemili nejin: ¿Keniuj tionmomachilia keman tionmoajsi iuan se akin amo yolijsiui, kualtakat uan amo kualani maski tionmopoloua?

“Naken tetasojtatinemi, yejua ne [...] amo no kiyolmachilia nexijkolot”.

Xikonnemili nejin: ¿Keniuj tionmomachilia keman amo takuaujtamatij mouan uan mitsonnexikoluiaj?

Akin tetasojta “amo no kinemilijtinemi sayo ten niaxka”.

Xikonnemili nejin: ¿Keniuj tionmomachilia keman kipoujkaitaj tein tikonnemilia uan amo mochiua sayoj tein yejuan kinekij?

Akin tetasojta “amo no kielnamiktinemi tetajtakoluan”.

Xikonnemili nejin: Dios kintapojpoluia akin kinyolkokoua tein kichiujkej uan amo oksepa kichiuajok. “Yejua amo nochipa kiitstos nepololmej, uan amo nochipa kisentokas kielnamikisok” (Salmo 103:9). Semi tiktasojkamatij maj akin tikyolxokolijkej techtapojpolui. Yejua ika, moneki no tikintapojpoluiskej akin techyolxokoliaj (Salmo 86:5).

Akin tetasojta “amo ika paki ne naken motajtakolmaka”.

Xikonnemili nejin: Keman techpanoua tein amo kuali, amo tikuelitaj maj oksekin yolpakikan. Yejua ika amo tiyolpakij keman oksekin tajyouiaj maski techchiuilijkej tein amo kuali.

Komo tiknekij maj Dios techtatiochiui moneki nochin tikintasojtaskej maski okseko kayomej, maski okse inintaneltokalis oso maski tataman xiujmej kipiaskej. Keman tikinpaleuiaj oksekin tiknextiaj ke tikintasojtaj.