¿Noyampa mochiua tein amo melauak?
“Kampa titekitij tikchiuaj tekimej itech semej tekitiloyamej tein tekiuajyot kiixtalijtok, uan miakpa moneki timochiaskej ome oso eyi metsti uan ijkon uelis tikseliskej totaxtauil. Sayoj ke yankuixtok nechnotsak se ueyichiujkej tein nechiluij ke uelis kichiuas maj okachi ijsiujka techtaxtauikan komo tikmakaj seki tomin tein techmakaskiaj.” (JUAN) *
¿MITSONIJTAKOUANI nejin tachiualis? Xa amo tikonpanouani kemej tein kipanok takat akin achto ika titajtojkej, sayoj ke uelis tikyekijtoskej ke no tiontajyouiani porin axkan mochiujtok nejon amo kuali tachiualis.
Itech xiuit 2011, Transparencia Internacional kiitak katiyejua altepemej amo monejnemiltiaj melaujkej, uan kiajsik ke 183 uejueyi altepemej uan xolalmej kitelpiaj nejon kuejmol. Itech xiuit 2009, nejin taltikpaknechikol kitematiltijkaya ke noyampa taltikpak moajsi nejin tachiualis. Kinextij: “Moyekita ke kampa yeski mochiujtok tein amo melauak”.
“Nejin tachiualis tein amo melauak yejua teikamauiltilis tein kichiuaj akin kipiaj tanauatil keman kiseliaj tomin. Uan nejin miakej kinijtakoua porin amo kuali nemijok, kipolouaj tein ika moixpanoltiskej uan amo yolpakijok.” (TRANSPARENCIA INTERNACIONAL)
Kemansa, keman uejueyi chiuanimej amo monejnemiltiaj melaujkej, tel amo kuali tein panoua. Kemej neskayot, se amaix tein motokaytia Time, kitematiltij ke ijkuak chikauak talolinik itech xiuit 2010 ompa Haití, uan tel miakej momikilijkej, no kipiakej tajtakol uejueyi chiuanimej tein amo monejnemiltijkej ika melaujkayot uan amo kintemojkej akin kimatij kichijchiuaskej kalmej. Amaix no kijtoua: “Keman kinchijchiuaj uejkapan kalmej, tel miakpa amo kintemouaj akin tel kuali kimatij kalchiuaskej, ta sayoj kinmakaj tomin akin kinpaleuiaj tekiuanij maj kiitakan ox yektachijchiuaj”.
¿Uelis senkis poliuis nejin tachiualis? Techpaleuis maj tiknankilikan nejin netajtanil, komo tikajsikamatij toni okachi kinuika taltikpakneminij maj amo monejnemiltikan melaujkej. Nejin tikitaskej itech okse tamachtilis.
^ párr. 2 Mopatak tokayit.
