Tein okachi kinpaleuis konemej maj kuali moskaltikan yejua maj kiitakan ke inintatuan motasojtaj uan mopoujkaitaj (Colosenses 3:14, 19). No moneki kimatiskej ke inintatuan kintasojtaj uan ke kinyolpaktia tein kichiuaj. Jiova kinmakak se kuali neskayot tetatmej keman kiluij iKonetsin, Jesucristo, ke kitasojtaya uan ke tein kichiuaya kiyolpaktiaya. (Xikonixtajtolti Mateo 3:17.)

ToTajtsin Dios, Jiova, techkaki uan kiita tein tikmachiliaj. Tetatmej monekiskia kichiuaskej kemej yejuatsin uan kikakiskej tein kijtouaj ininkoneuan (Santiago 1:19). Moneki maj kipoujkaitakan tein kimachiliaj uan maj amo kimoujkaitakan komo kijtouaj teisa tein amo moneki. (Xikonixtajtolti Números 11:11, 15.)

Tetatmej kinnamiki kiixtaliskej tanauatilmej ininkalijtik (Efesios 6:1). Sayoj ke, ijkon kemej Dios, moneki kinmelauiliskej katiyejuan uan toni uelis kinpanos komo amo kintakamatij. Ika nejon kinextiskej ke kintasojtaj (Génesis 3:3). Uan no, moneki maj amo kinchikaujkauikan maj tatakamatikan, ta okachi kuali maj kinnextilikan ke kuali kinyas komo kichiuaj tein kuali. (Xikonixtajtolti Isaías 48:18, 19.)

Xikonixtali tikonpaleuis mokoneuan maj kitasojtakan Dios. Ijkon yejuan kuali monejnemiltiskej, maski tejuatsin amo iniuan tionyetos. Dios techmachtia ika tein kichiua; tejuatsin no ijkon xikonchiua. (Xikonixtajtolti Deuteronomio 6:5-7; Efesios 4:32, uan 5:1.)