Tein tikneltokaj senkis mokixtia itech tein kijtoua Biblia. Yejua ika, ijkon kemej okachi kuali tikajsikamatij, tikpataj tein tikneltokaj. a

 Proverbios 4:​18 techpaleuia maj tikajsikamatikan keyej moneki mopatas seki taman: “Ojti kampa nejnemij yolmelaujkej kemej yeskia tanex tein tatanextijtiuj hasta keman mokaua kualtsin tonayan”. Tein kijtosneki ke ijkon kemej yolik tanestiyouj tapaleuia maj okachi kuali tikitakan teisa, no ijkon Dios yolik kinmatiltiyouj itekitikauan tein melauak keman yejuatsin kiita ke moneki (1 Pedro 1:​10-​12). Uan Biblia achto kijtojka ke Dios kiijsiuiltiskia nejon itech “tonalmej keman ejkos tamilis” (Daniel 12:4).

 Amo monekiskia tikmoujkaitaskej nion techtekipachos maj mopata seki taman. Itekitikauan Dios ne uejkauj no kinemiliayaj uan kineltokayaj seki taman tein satepan monekik kipataskej.

•   Dios kiixtalijka kemanian kinmakixtiskia israelitas, sayoj ke Moisés kinekia kichiuas nejon 40 xiujmej achto (Hechos 7:​23-​25, 30, 35).

•   Imomachtijkauan Jesús amo kiajsikamatkej ke Mesías monekia momikilis uan satepan oksepa kipias nemilis (Isaías 53:​8-​12; Mateo 16:21-​23).

•   Itech yekinika siglo sekin akin kichiuayaj kemej Cristo mopolojtoyaj keman kinemiliayaj ke niman ejkoskia “itonal Jiova” (2 Tesalonicenses 2:​1, 2, Traducción del Nuevo Mundo).

 Ijkon kemej panokej tonalmej, Dios kimelauak inintanemilil itekitikauan ne uejkauj. Uan tiktataujtiaj maj no ijkon kichiua touan (Santiago 1:5).