Tekit tein tikchiuaj moixtaua yekinika ika tomin tein kitemakaj itaixpantijkauan Jiova. a Tiktaliaj tomin itech cajas tein moajsij kampa timosentiliaj. Okseki taman kemej uelis tiktemakaskej tomin moijtoua itech Internet kampa timoteixmatiltiaj itech taxelol Nepaleuil ika tomin. Taltikpaknenkej uelis kiixpejpenas ox tapaleuis ika tomin itech tekit tein tikchiuaj noyampa taltikpak oso sayoj kampa ika nemi, oso ojkan.

 Amo ixyetok kanachi tomin moneki kitemakas sejse itaixpantijkauj Jiova. Amo moneki kitemakas diezmo nion ixyetok kanachi tomin moneki kitemakas tein kitani (2 Corintios 9:7). Amo titajtanij tomin itech nechikolmej nion tikintaxtaualtiaj akin ajsij itech nechikol. Amo no tiknechikouaj tomin tein ika tikintaxtauiskej akin kiixyekanaj se neauilis, nenamiktilis, oso akin kitemaka se tanojnots keman aksa momikilia uan nion se taman kemej nejon. Amo tiksentiliaj tomin ika teisa tanamakalis kemej ijkuak monamaka takual. Amo no tiksentiliaj tomin ika seki taman neauiltilis kemej bingos oso loterías uan rifas. Amo no tiksentiliaj tomin ika seki taman iluimej oso okseki taman kemej nejon, uan amo titajtanij maj kitemakakan nepaleuil ika tomin. Uan amo keman motematiltia akonimej kitemakaj nepaleuil ika tomin (Mateo 6:2-4). Uan no, itech Internet kampa timoteixmatiltiaj oso itech toamaixuan amo kipia tein kitematiltia ke tikchiuaj seki taman tanamakalis oso tekit kampa tiktaniskej tomin.

 Itech nechikolmej tein kipiaj itaixpantijkauan Jiova kampa nochin uelis yaskej, motematiltia mejmetstika keniuj motekitiltij tomin. Tein moamatalia keniuj motekitiltij tomin itech sejse nechikol, okse aksa kiyekita maj kuali motekitilti nepaleuil ika tomin tein motemaka (2 Corintios 8:20, 21).

•   Caja kampa motalia tomin: Uelis tikontalis monepaleuil ika tomin oso ika cheque itech cajas tein moajsij itech Kali kampa tiMosentiliaj, itech Kali kampa mochiuaj Uejueyi Nechikolmej uan itech okseki kalmej kampa timosentiliaj.

•   Nepaleuil ika tomin tein se temaka itech Internet: Itech miak altepemej, itech taxelol “Nepaleuil ika tomin tein se kinmaka itaixpantijkauan Jiova” uelis tikontemakas tomin ika tarjeta de crédito oso débito, transferencia bancaria uan oksekiok. b Ika nejin taman, seki itaixpantijkauan Jiova kichiuaj maj tepos iselti kitemaka tomin tein yejuan ‘kiixtaliaj’ kitemakaskej mejmetsika (1 Corintios 16:2).

•   Nepaleuil tein moneki moixtalis: Seki taman nepaleuil moneki achto kuali kiixtalis taltikpaknenkej uan kitemos inepaleuil akin kiixmati nejin taman. Nejon tein moixtalia tapaleuiani keman taxtauaj impuestos itech ininaltepeuj. Miakej kinpaleuiani kimatiskej toni taman tein kipiaj uelis kitemakaskej keman yoltokej oso uelis kikuiskej tein kitekauiliaj satepan ke yejuan momikiliskej. Xiontajtani itech sucursal tein taixyekana itech altepet kampa tionnemi, komo tikonuelitaskia tikonmatis okachi keniuj motemaka nepaleuil itech nejin taman:

  •   tomin tein se kipia banco

  •   seguros uan planes de jubilación

  •   acciones uan bonos

  •   Talmej oso kalmej

  •   testamentos uan difeicomisos

Komo tikonneki tikonmatis okachi keniuj uelis tikontemakas nepaleuil itech moaltepeuj, xikonita taxelol “Nepaleuil ika tomin tein se kinmaka itaixpantijkauan Jiova.”