“Onikinmatilti motoka”

“Ne yonikinmatilti Akin Tejwatsi akimeh Tejwatsi otikimpéjpenki itech nin tlaltíkpaktli.[...] Ne onikinmatilti motoka, iwa ok nikinmatiltijtos” (JUAN 17:6, 26).

¿Tlen kijtosneki tlen okijto Jesús? Okitematiltiaya itoka toTajtsin Dios ijkuak otetlapouiaya. Xamo nochipa okijtouaya itoka ijkuak okintlajtoltiaya rollos (Lucas 4:16-21). Noijki okinmachti idiscípulos “makiyektenewakah” itoka toTajtsin Dios ijkuak motlatlaujtiskiaj (Lucas 11:2).

Tlen okichijkej akinmej opejkej kichiuaj ken Cristo. Ijkuak Pedro okintlapoui akinmej otlayekanayaj Jerusalén, okinmilui toTajtsin Dios “okinmopejpeni sikimeh para mayetokah iaxkawah” noso para ma kipiakan itoka (Hechos 15:14). Apóstoles uan idiscípulos Jesús otetlapouiayaj uan okijtouayaj: “Nochi akin kijtos itoka Jehová momakixtis” (Hechos 2:21; Romanos 10:13, TNM). Ijkuak otlajkuilouayaj okitlaliayaj itoka toTajtsin Dios. Ik non, se amochtli tlen itoka Tosefta kanin okinsetilijkej itlanauatiluan judíos uan otlanki okijkuilojkej kanaj itech xiuitl 300. Kijtoua: “Ma kintlatikan noso ma kinchichinokan nochi amochmej tlen kipiaj itoka toTajtsin Dios tlen okinmijkuilojkej akinmej kichiuaj ken Cristo”.

¿Axkan akinmej ijkon kichiuaj? Consejo Nacional de las Iglesias de Cristo tlen kajki Estados Unidos okitekauili ma kijkuilokan amochtli Revised Standard Version de la Biblia uan ompa kijtoua: “Ijkuak ayamo oualaya Jesús, judíos ayakmo okijtouayaj itoka toTajtsin Dios, porque okineltokayaj kajki san se Dios uan amo omonekiayaj kijtoskej itoka, ik non, axkan akinmej kineki kineltokaj Cristo amo moneki kinotsaskej toTajtsin Dios ika itoka”. Noijki itech nin amochtli amo okijkuilojkej itoka toTajtsin Dios, san okitlalijkej Toteko. Ayamo kipia miak xiuitl Vaticano okinmilui iteoxpixkauan: “Ijkuak motlatlaujtiskej, tlakuikaskej uan mochiuas misa, amo ma kijtokan itoka toTajtsin Dios ika tetragrammaton YHWH”. *

¿Kajki se religión tlen kitematiltia iToka toTajtsin Dios? Sergey tlen ochantiaya Kirguistán, okajsik non religión. Ijkuak okatka telpochtli okitak se película kanin okijtouaya toTajtsin Dios itoka Jehová, opanok kanaj majtlaktli xiuitl uan amo oksepa okikak. Satepan ijkuak ochantito Estados Unidos, ome iTlaixpantijkauan Jehová okitlajpalotoj ikalijtik uan okinextilijkej ika Biblia itoka Jehová. Sergey oyolpakik porque okajsik religión tlen kitekitiltia itoka toTajtsin Dios. Se diccionario tlen itoka Webster’s Third New International Dictionary, kanin ijkuilitok “Jehová Dios” kijtoua: “Dios akin okachi ueyititok uan kiueyichiuaj iTlaixpantijkauan Jehová”.

[Nota]