Okungakunceda Ukuthi Uthokoze Futhi Usuthiseke
Sonke siyakufuna ukuthokoza lokusuthiseka kungelani lokuthi sitshadile kumbe asitshadanga, sibatsha loba sibadala. UMdali wethu laye ufuna sithokoze futhi sisuthiseke, yikho esinike amacebo amahle kakhulu.
Khuthala
“Kasebenze nzima, enze umsebenzi omuhle ngezandla zakhe ukuze abe lolutho angalwabela oswelayo.”—KWABASE-EFESU 4:28.
UMdali wethu ufuna sikukholise ukusebenza. Umuntu osebenza gadalala uyathokoza ngoba uyenelisa ukuzinakekela yena lemuli yakhe. Angenelisa lokunceda abanye ngalokho abakudingayo. Kanti njalo umqhatshi wakhe uzamthanda. Yikho nxa uyisisebenzi esikhutheleyo, izikhathi ezinengi awuphelelwa ngumsebenzi. IMibhalo iqinisile sibili nxa isithi imivuzo yokusebenza nzima ‘iyisipho esivela kuNkulunkulu.’—UmTshumayeli 3:13.
Thembeka
“Sithemba ukuthi silomzwangedwa omsulwa, njengoba sifisa ukuthembeka kukho konke.”—KUMAHEBHERU 13:18.
Nxa sithembekile sizazizwa silesithunzi, sizahlaliseka futhi sizalala behle. Labanye bazasithemba futhi basihloniphe. Abantu abangathembekanga abakutholi konke lokhu. Kanti njalo imizwangedwa yabo ingahlala ibathonisisa futhi bangahlalela evalweni, besesaba ukuthi ngelinye ilanga ukungathembeki kwabo kuzavela.
Ungaqakathekisi Kakhulu Imali
“Indlela eliphila ngayo kayingabi ngeyokuthanda kakhulu imali kodwa suthisekani ngalokho elilakho.”—KUMAHEBHERU 13:5.
Siyayidinga imali ukuze sithenge ukudla lokunye okuqakathekileyo empilweni kodwa ‘ukuthanda imali’ kuyingozi. Umuntu othanda imali angaqeda isikhathi esinengi lamandla ezama ukudinga enengi. Lokhu kungabangela ukuthi abe lenhlupho emtshadweni wakhe, angabi lesikhathi eseneleyo labantwabakhe njalo acine egula. (1 KuThimothi 6:9, 10) Kanti njalo angacina eselimenemene. Enye indoda ehlakaniphileyo yathi: “Umuntu othembekileyo uzabusiswa ngokuphumelela, kodwa ogijimela ukunotha (“kayi kuhlala emsulwa,” NWT).”—IZaga 28:20.
Khetha Imfundo Engcono Kulayo Yonke
“Gcina ukuhlakanipha okuncedayo, uhlale usebenzisa kuhle ingqondo.”—IZAGA 3:21, NWT.
Imfundo iyasinceda ukuthi sibe ngabantu abathembekileyo labazali abahle. Kodwa ukuba lemfundo yomhlaba lo ngeke kusenze sihlale sithola konke esikudingayo njalo sithokoze. Nxa sifuna ukuphumelela kukho konke esikwenzayo kumele sithole imfundo evela kuNkulunkulu. IMibhalo ithi ngomuntu olalela uNkulunkulu: “Konke akwenzayo kuyaphumelela.”—IHubo 1:1-3.
Nanku Okunye
INQABAYOKULINDA
Ungenzani Ukuze Ukukholise Ukusebenza Gadalala?
Khangela okunye iBhayibhiili elithi ungakwenza ukuze uthokoze njalo usuthiseke emsebenzini wakho.
VUKANI!
Wenza Izinto Ezinengi Kakhulu Yini?
Abantu abanengi bakuthola kunzima ukuthi benelise ukwenza konke abakhangelelwe ukuthi bakwenze emsebenzini lasemakhaya abo. Kuyini okubangela lolo hlupho? Kuyini okungenziwa ukuze luphele?
VUKANI!
Okungenza Uthokoze—Ukusuthiseka Lokupha
Abantu abanengi bacabanga ukuthi inotho yiyo engenza uthokoze. Imali kanye lempahla kungenza umuntu athole intokozo engapheliyo yini? Ubufakazi buthini?
