Ngazalelwa eSanto Domingo, idolobho eliseDominican Republic. Ngakithi kulabantwana abane futhi mina ngilicinathunjana. Abazali bami babefundile futhi babefuna sikhulele endaweni elabantu abalungileyo labathembekileyo. Kusasele iminyaka emine ukuthi ngizalwe, abazali bami bahlangana labanali ababengena isonto yamaMormon. Abazali bami bakuthanda ukuthi amajaha la angamaMormon ayegqoka kuhle futhi ehlonipha, yikho bakhetha ukuthi imuli yethu yayizakuba ngeyinye yezimuli zokuqala endaweni yakithi ezazizangena isonto yamaMormon okuthiwa yiChurch of Jesus Christ of Latter-day Saints.

Ngisakhula ngangizikholisa izinto esasizenza nxa sihlangene labanye abesontweni futhi ngangiyihlonipha indlela amaMormon ayeqakathekisa ngayo ukuphilisana kuhle emulini lokuba ngabantu abaziphethe kuhle. Ngangiziqhenya ngokuthi ngangingena isonto le okokuthi ngahlela ukuthi ngangizaba ngumnali ngingakhula.

Sengileminyaka engu-18 imuli yethu yathuthela e-United States ukuze ngenelise ukuya eyunivesithi engcono. Ngemva komnyaka sithuthile, umamncane lobamncane abangoFakazi bakaJehova babuya bazosivakatshela eFlorida. Bacela ukuthi sihambe labo emhlanganweni omkhulu lapho okwakuzabe kufundiswa okuseBhayibhilini. Ngamangala ngibona wonke umuntu owayelapho evula iBhayibhili nxa kwakubalwa amavesi futhi ebhala lamanothi yikho ngacela ukuthi banginike iphepha lepheni ukuze lami ngibhale amanothi.

Ngemva komhlangano umamncane lobamncane bathi bangangincedisa ukuthi ngilazi ngcono iBhayibhili njengoba ngangifuna ukuba ngumnali. Ngakubona kulicebo elihle ngoba ngalesosikhathi ngangijayele ukubala iBhuku lamaMormon ukwedlula iBhayibhili.

Ubamncane lomamncane babengifonela besesixoxa ngeBhayibhili futhi babehlala bengikhuthaza ukuthi ngiqathanise lokho engangikukholwa lalokho okufundiswa liBhayibhili. Lokho babekwenzela ukuthi ngizibonele lokho okufundiswa liBhayibhili.

Zazizinengi imfundiso zamaMormon engangizikholwa kodwa ngangingelaqiniso lokuthi zazivumelana yini lalokho okufundiswa liBhayibhili. Umamncane wangithumela i-Vukani! kaNovember 8, 1995 yaboFakazi bakaJehova eyayilezinye izihloko ezazikhuluma ngemfundiso zamaMormon. Ngamangala kakhulu ngibona ukuthi imfundiso ezinengi zamaMormon ngangingazazi. Lokhu kwenza ukuthi ngidingisise kuwebhusayithi yamaMormon ukuze ngibone ukuthi okwakukhulunywa ku-Vukani! le kwakuliqiniso yini. Ngathola ukuthi kwakuliqiniso sibili futhi obunye ubufakazi ngabuthola ngize ngivakatshele ama-museum amaMormon ase-Utah.

Mina ngangicabanga ukuthi imfundiso ezisebhukwini lamaMormon leziseBhayibhilini ziyahambelana, kodwa ngathi sengizinika isikhathi sokulibala sibili iBhayibhili ngananzelela ukuthi ezinye imfundiso zamaMormon zaziphikisana lalokho okuseBhayibhilini. Ngokwesibonelo, kuHezekheli 18:4 iBhayibhili lithi umphefumulo uyafa. Kodwa iBhuku lamaMormon, ku-Alma 42:9 lithi: “Umphefumulo kawufi.”

Phezu kokuthi amaMormon ayefundisa ezinye izinto ezingahambelani lokuseBhayibhilini, okunye okwakungihlupha yikuthi babelezinye imfundiso ezikhuthaza ukungenela kwezombusazwe. Ngokwesibonelo, amaMormon afundiswa ukuthi insimu ye-Edeni yayisesabelweni seJackson esiseMissouri, e-United States. Kanti njalo abafundisi besonto yamaMormon bathi kwelinye ilanga uNkulunkulu uzabusa umhlaba wonke esebenzisa uhulumende we-United States.”

Ngangizibuza ukuthi kwakuzakwenzakalani ngamanye amazwe okuhlanganisa lelizwe lakithi nxa uNkulunkulu wayezasebenzisa i-United States ukuthi abuse umhlaba. Ngayivusa indaba le kwelinye ilanga ngize ngifonelwe ngelinye ijaha elingumMormon elaselifundela ukuba ngumnali. Ngambuza ukuthi wayezimisele yini ukulwa lamanye amaMormon nxa kuyikuthi amazwe abo ayengalwa. Wavuma ukuthi wayezimisele ukwenza njalo futhi lokhu kwangimangalisa. Ngaqalisa ukudingisisa ukuthi isonto yami ifundisani ngaphinda ngabuza labanye abafundisi bamaMormon ngendaba le. Bangitshela bathi impendulo zemibuzo yami zazingazwisiseki kodwa ngokuya kwesikhathi zazizazwisiseka njengoba ukukhanya kwakuzabe kulokhu kukhula.

Okwakhulunywa ngabafundisi laba kwangidanisa kakhulu futhi kwenza ngacabangisisa ngokuthi kuyini okwakusenza ngifise ukuba ngumnali wamaMormon. Ngananzelela ukuthi okwakungenza ngifise ukuba ngumnali yikuthi ngangifuna ukunceda abantu. Esinye isizatho yikuthi ngangifuna abantu emphakathini bangihloniphe. Lanxa kunjalo kuncane kakhulu engangikwazi ngoNkulunkulu. Kusukela kudala ngangike ngilibale iBhayibhili kodwa ngangingaliqakathekisi kangako. Ngangingakwazi ukuthi uNkulunkulu wayehloseni ngesikhathi edala umhlaba labantu.

Ngesikhathi ngifunda iBhayibhili laboFakazi bakaJehova, okunye engakufundayo yikuthi ibizo likaNkulunkulu ngubani, ukuthi kwenzakalani umuntu angafa lokuthi kungani uJesu eqakathekile ukuze injongo kaNkulunkulu igcwaliseke. Kancane kancane ngasengisibalazi sibili iBhayibhili futhi kwakungithokozisa ukuxoxela abanye lokho engangikufunda kulo. Ngangivele ngikwazi ukuthi uNkulunkulu ukhona kodwa khathesi ngasengisenelisa ukukhuluma laye ngomthandazo njengomngane wami omkhulu. Mhlaka 12 July 2004 ngabhabhathizwa, ngaba ngomunye waboFakazi bakaJehova futhi ngemva kwenyanga eziyisithupha ngaba liphayona lesikhathi sonke.

Ngasebenza emawofisini amakhulu aboFakazi bakaJehova aseBrooklyn, eNew York oweminyaka engu-5. Kwangithokozisa kakhulu ukuncedisa lapho okwenziwa khona amaBhayibhili lamanye amabhuku akhuluma ngeBhayibhili anceda amamiliyoni abantu emhlabeni. Lakhathesi kulokhu kungithokozisa ukuncedisa abanye ukuthi bafunde ngoNkulunkulu.