Phakathi kwaboFakazi bakaJehova abangu-35 000 ababehlala eGermany lakwamanye amazwe ayengaphansi kombuso wamaNazi, kwabulawa abangu-1 500 ngesikhathi seMpi Yomhlaba Yesibili. Abanye babo akwaziwa ukuthi bafa njani. Kungenzeka kutholakale ukuthi ngobani abanye abafayo njengoba kulokhu kudingisiswa ngendaba le.

•  Bafa njani?

•  Babehlukuluzelwani?

•  Bafela ngaphi?

•  Abanye ababulawayo

•   Ukubulawa: OFakazi abangaba ngu-400 babulawa eGermany lakwamanye amazwe ayengaphansi kombuso wamaNazi. Abanengi babo babethonisiswa emithethwandaba, bagwetshelwe ukufa, besebequnywa amakhanda. Abanye babedutshulwa kumbe balengiswe bengathonisiswanga.

•   Ukuhlukuluzwa kabuhlungu: OFakazi bakaJehova abedlula 1 000 bafa ezinkambeni zokuhlutshwa lasemajele. Babulawa yikusetshenziswa kabuhlungu, indlala, umqando, ukugula lokungelatshwa. Abanye bafa kusanda kuphela iMpi Yomhlaba Yesibili ngenxa yezinyalo zokutshaywa.

•   Ezinye imbangela: Abanye oFakazi babevalelwa ezindaweni ezile-gas, abanye babehlatshwa amajekiseni abulalayo ikanti abanye babebulawa yikuthi odokotela babefundela kubo izindlela zokwelapha.

 OFakazi bakaJehova babehlukuluzwa ngenxa yokuthi babelandela okufundiswa liBhayibhili. Babengavumi ukwenza izinto ezazifunwa nguhulumende wamaNazi ngoba zazingavumelani lalokho okuseBhayibhilini. Babezimisele ‘ukulalela uNkulunkulu kulokulalela abantu.’ (ImiSebenzi 5:29) Nanzi izindlela ezimbili abakutshengisa ngazo lokhu.

1.   Ukungangeni kwezombusazwe. OFakazi bakaJehova abaphila ngesikhathi sombuso wamaNazi babengangeni kwezombusazwe njengabo bonke oFakazi. (UJohane 18:36) Yikho babengavumi:

   •   Ukuba ngamasotsha kumbe ukuncedisa ngezinye indlela empini.—U-Isaya 2:4; UMathewu 26:52.

   •   Ukuvota ngesikhathi sokhetho kumbe ukujoyina inhlanganiso zamaNazi.—UJohane 17:16.

   •   Ukusalutha uphawu lombuso wamaNazi kumbe ukuthi “Heil Hitler!”—UMathewu 23:10; 1 KwabaseKhorinte 10:14.

2.   Ukwenza izinto eziphathelane lokukhonza. Lanxa babevinjelwa ukwenza izinto eziphathelane lokukhonza, oFakazi bakaJehova baqhubeka:

   •   Behlangana ukuze bakhonze uNkulunkulu.—KumaHebheru 10:24, 25.

   •   Betshumayela futhi benika abantu amabhuku asekelwe eBhayibhilini.—UMathewu 28:19, 20.

   •   Bencedisa omakhelwane babo okugoqela lamaJuda.—UMakho 12:31.

   •   Belandela abakukholwayo lanxa babethwaliswe nzima yiziphathamandla.—UMakho 12:30.

 Isikhwicamfundo okuthiwa nguRobert Gerwarth sithi: “Ngesikhathi samaNazi oFakazi bakaJehova yibo bodwa ababehlukuluzwa ngenxa yalokho abakukholwayo.” a Ezinye izibotshwa zaqalisa ukubathanda oFakazi bakaJehova ngenxa yokuba qotho kwabo. Ngokwesibonelo esinye isibotshwa e-Austria sathi: “Abahambi empini. Kungangcono babulawe kulokuthi babulale.”

•   Ezinkambeni zokuhlutshwa: Inengi laboFakazi bakaJehova lafela ezinkambeni zokuhlutshwa. Nanzi ezinye inkamba zakhona: I-Auschwitz, iBuchenwald, iDachau, iFlossenbürg, iMauthausen, iNeuengamme, iNiederhagen, iRavensbrück, leSachsenhausen. ESachsenhausen kwafa oFakazi abangu-200.

•   Emajele: Abanye oFakazi babehlukuluzwa emajele baze bafe. Abanye babetshaywa kabuhlungu ngesikhathi bethonisiswa.

•   Lapho ababebulawelwa khona: OFakazi bakaJehova abanengi babulawelwa emajele aseBerlin-Plötzensee, eBrandenburg laseHalle/Saale. Kulezinye futhi izindawo ezingu-70 esezitholakele lapho oFakazi ababulawelwa khona.

•  Ibizo: UHelene Gotthold

   Lapho abulawelwa khona: EPlötzensee (eBerlin)

   UHelene owayelabantwana ababili wabotshwa izikhathi ezinengi. Ngesikhathi ethonisiswa ngo-1937 wayezithwele futhi wahlukuluzwa kabuhlungu waze wacina eswela. Mhlaka 8 December ngo-1944 waqunywa ikhanda ejele okuthiwa yiPlötzensee eseBerlin.

•  Ibizo: UGerhard Liebold

   Lapho abulawelwa khona: EBrandenburg

   Ijaha elalileminyaka engu-20 okuthiwa nguGerhard laqunywa ikhanda ejele yeBrandenburg ngemva kweminyaka emibili uyise ebulewe ngendlela efananayo. Wabhalela abangakibo incwadi ebavalelisa wathi: “Bengingeke ngenelise ukudlula ebunzimeni obunje kungasimandla eNkosi.”

•  Ibizo:URudolf Auschner

   Lapho abulawelwa khona: EHalle/Saale

   URudolph wayeleminyaka engu-17 ngesikhathi equnywa ikhanda mhlaka 22 September ngo-1944. Yena ke wavalelisa unina ngencwadi eyayisithi: “Abafowethu abanengi sebeyihambile indlela le, lami ngizimisele ukuyihamba.”