OKUNCEDA IMULI
Ungamncedisa Njani Umntanakho Ukuthi Apase?
Umntanakho kasiqakathekisi isikolo, kakukhuthalelanga ukubala futhi kawenzi lomsebenzi wesikolo okumele ayewenzela ngekhaya. Ubona angani kuzaphetha ngani? Umntanakho uzafeyila futhi lendlela aziphatha ngayo izantshintsha. Pho ungamncedisa njani ukuthi apase esikolo?
Okumele ukwazi
Ukumlandelela akusoze kumncede. Ukulandelela umntanakho kuzamenza ahlale esesaba ukuya esikolo lokuphenduka ngekhaya. Lokhu kungenza ukuthi acine eseqamba amanga esithi upasile, afihle iripoti yakhe kumbe ayisayine ukuze ababalisi bacabange ukuthi umzali uyibonile. Konke lokhu kwenza izinto zibe nzima kakhulu.
Ukumnika izipho akusoze kumncede kangako. Ubaba okuthiwa ngu-Andrew uthi: “Indodakazi yethu sasiyithengela izipho nxa ipasile ngoba sasicabanga ukuthi lokho kwakuzayinceda ukuthi isebenze nzima ezifundweni. Kodwa yayisithi ingafeyila ikhathazeke ngokuthi kayisoze isathola isipho, yayisikhathazeka ngesipho ukwedlula ukufeyila kwayo.”
Ukusola ababalisi akuncedi. Umntanakho engabe ecabanga ukuthi uzapasa lanxa engasebenzanga nzima. Engacina esola abanye kumbe agoqe izandla efuna abanye bamncedise ukulungisa inhlupho zakhe. Akukuhle ukuthi acatshe ngomunwe kodwa kumele afunde ukuzimela ngoba kuzamnceda nxa esekhulile.
Ongakwenza
Zibambe. Ungakhulumi lomntanakho usazondile kodwa qala ubhodle. Ubaba okuthiwa nguBrett uthi: “Mina lomkami sananzelela ukuthi kuyanceda kakhulu ukukhuluma labantwabethu singazondanga futhi sitshengisa lokuthi siyabazwisisa.”
Isimiso esiseBhayibhilini: “Wonke umuntu kumele aphangise ukulalela, aphuze ukukhuluma, aphuze lokuzonda.”—UJakhobe 1:19.
Dingisisa ukuthi uhlutshwa yini. Okwenza abanye abantwana bafeyile yikuntshintsha izikolo, ukuhlutshwa ngabanye esikolo, ukungabali, inhlupho emulini, ukuswela isikhathi eseneleyo sokulala, ukukhathazeka ngemihloliso kumbe ukungagxilisi ingqondo ezifundweni zabo. Yikho ungaphongucabangela ukuthi umntanakho ulivila.
Isimiso esiseBhayibhilini: “Ophatha udaba ngenhlakanipho uzathola okuhle.”—IZaga 16:20, TBS.
Mdingele indawo azabalela kuyo. Menzele uhlelo lokubala lolokubhala umsebenzi wesikolo. Dinga indawo lapho umntanakho azayenzela khona umsebenzi wesikolo kungelalutho olumphambanisayo (kungaba yi-T.V loba ifoni). Mehlukanisele umsebenzi wakhe wesikolo ube zingxenye ezimfitshane ukuze enelise ukugxilisa ingqondo kulokho akubalayo. Ubaba odabuka eGermany okuthiwa nguHector uthi: “Sihle siqale kuseselesikhathi ukulungiselela kancane kancane nxa kulomhloliso obuyayo.”
Isimiso esiseBhayibhilini: “Zonke izinto zilesikhathi sazo.”—UmTshumayeli 3:1.
Mtshele ngokuqakatheka kwemfundo. Umntanakho uzakuthanda ukufunda nxa engakunanzelela ukuthi akufunda esikolo kumnceda kangakanani khathesi. Ngokwesibonelo isamu zizamnceda enelise ukusebenzisa kuhle imali ayiphiwayo.
Isimiso esiseBhayibhilini: “Zuza ukuhlakanipha, zuza ukuqedisisa. . . . Kugogose.”—IZaga 4:5, 8.
Icebo: Ncedisa umntanakho ngomsebenzi wesikolo kodwa ungamenzeli. U-Andrew uthi: “Indodakazi yethu yayisivilapha ukucabanga isithembe ukwenzelwa yithi.” Fundisa umntanakho ukuthi angazenzela njani umsebenzi wesikolo eyedwa.