CIJIJO 26
Ngenyi Kuno Ushati no Matambujiko?
Kudari kukaitika ngozi, vandhu vanovhunjisa kudari: Ngenyi zviro zvakashata zviri kuitika? Zvakanaka maningi kuziva mupinguro wo Bhaibheri!
1. Matambujiko akatangisa kudini mu nyika?
Sathana Dhiyabhu wakapandukira Jehovha. Iyena waida kutonga vamweni. Ngo kudaro, iyena wakacengeja vandhu vokutanga, Adhamu na Evha kuti vatame kuzwira Mwari. Sathana wakakwanisa kuita izvi, ngo kunanga manyepo kuna Evha. (Genesi 3:1-5) Sathana wakaita kuti Evha arangarire kuti Jehovha ari kumuvigira zviro zvakanaka. Iyena wakaita kuti vandhu varangarire kuti vaizodakara kudari vakatama kuzwira Mwari. Ngo kudaro, Sathana wakananga manyepo okutanga kuna Evha. Iyena wakavhunja Evha kuti amuzofi. Ndiyo ndava Bhaibheri rinodanija Sathana kuti “ndiyena munyepi. Ndiyenazve baba wo kunyepa.”—Johani 8:44.
2. Adhamu na Evha vakasana kuitenyi?
Jehovha wainga akapa Adhamu na Evha zvese zvavaida. Iyena wainga akavavhunja kuti vaidikana kuha mushovo yo muti yese yainga mu munda wo Edheni, kusiyapo umwe wainga wakarambiswa. (Genesi 2:15-17) Asi ivona vakasana kuha muti wondhowo. Evha “wakatora mucero wawo, woha.” Tevere, Adhamu ‘wakatangavo kuhavo.’ (Genesi 3:6) Adhamu na Evha vainga vakakwana, ngo kudaro, azvicainesa kuita zviro zvakanaka. Asi pikija zvakadaro vakasana kutama kuzwira Jehovha. Pavakaita kudaro, ivona vakashaisha no kuramba utongi hwa Mwari. Cisungo cavakaitari cakavaviisira matambujiko akawanda.—Genesi 3:16-19.
3. Zvakakheta kuita Adhamu na Evha zvinotipsasisa kudini?
Kushaisha kwakaita Adhamu na Evha, kwakaita kuti vave no cishaishi. Izvi zvakaita kuti vana vavakazobara vavevo no cishaishi. Bhaibheri recinanga ngo pamusoro pa Adhamu rakati: “Cishaishi cakanghwina mu nyika ngo ndava yo mundhu umwe basi, rufu hwonghwinavo ngo ndava yo cishaishi. Ngo maitiro ondhowo, rufu hwakagumira vandhu vese.”—Varoma 5:12.
Waro, ngenyi tiri kutambujika? Nguva jimweni tinotambujika ngo zviro zvakashata zvatinokheta kuita. Nguva jimweni tinotambujika ngo zviro zvakashata zvinoithwa ngo vamweni. Nguva jimweni tinotambujika ngokuti tiri pa ndau yakashata no nguva yakashata.—Verenganyi Mucumaeri 9:11.
NASANYI KUPSAKISISA
Vonanyi kuti ngenyi Mwari andiyepi anoitisa ushati no matambujiko atiri kuvona mu nyika. Vonanyizve kuti iyena anojizwa kudini ngo pamusoro po matambujiko edu.
4. Ndiyani anoitisa matambujiko?
Vandhu vakawanda vanotenda kuti Mwari ndiyena ari kutonga nyika. Asi kureva kuti ndizvonadi? Rijanyi VHIDHIYO.
Verenganyi Jakobo 1:13, na 1 Johani 5:19. perapo bhuisananyi ngo muvhunjo unotevera:
-
Kureva kuti Mwari ndiyena ari kuitisa matambujiko no ushati?
5. Muviyo wo utongi hwa Sathana
Verenganyi Genesi 3:1-6, perapo bhuisananyi ngo muvhunjo jinotevera:
-
Sathana wakananga manyepo api?—Vonanyi mavhesi 4 no 5.
-
Sathana wakanangisa kudini kuti Jehovha ari kunyima vandhu zviro zvakanaka?
-
Ngo zvapi zvinotiita kuti tidakare, kutungamirihwa ndi Mwari kana kutungamirihwa ndi Sathana?
Verenganyi Mucumaeri 8:9, perapo bhuisananyi ngo muvhunjo unotevera:
-
Tavona kuti Jehovha andiyepi ari kutonga nyika. Waro zvicinyi zviri kuitika ngo kutama kutongwa ndiyena?
-
Adhamu na Evha vainga vacina cishaishi, vecipona Muparadhiso. Asi ivona vakazwira Sathana vopandukira Jehovha
-
Pasure po kupera kupandukira, cishaishi, matambujiko no rufu zvakaparaira mu nyika yese
-
Jehovha anozopeja cishaishi, matambujiko no rufu. Vandhu vanozovazve vakakwana, vozopona Muparadhiso
6. Jehovha anoneseka ngo matambujiko edu
Kureva kuti Mwari anoneseka ngo matambujiko edu? Ngatende tivone zvakatara Mambo Dhavhidhi na mupostori Pedhru. Verenganyi Nduyo 31:8 na 1 Pedhru 5:7, perapo bhuisananyi ngo muvhunjo unotevera:
-
Mavhesi aya anokhombija kuti Jehovha anovona matambujiko edu no kuda kutibesera. Imwimwi munojizwa kudini ngo kuziva izvi?
7. Mwari anozopeja matambujiko edu ese
Verenganyi Isaia 65:17 na Apokaripsi 21:3, 4, perapo bhuisananyi ngo muvhunjo unotevera:
-
Ngenyi zvinodakajisa kuziva kuti Jehovha anozopeja matambujiko o vandhu?
Imwimwi maizviziva?
Sathana paakananga manyepo okutanga, iyena wakasvipisa zina ra Jehovha. Iyena wakaita izvo ngo kunanga kuti Jehovha asipi Mutongi wakanaka no anorudo. Ngo kukasika, Jehovha anozopeja matambujiko no kuvonesa kuti utongi hwake ndihwona hwakanaka. Mukuengejera, iyena anozocenesa zina rake kumanyepo ese. Kuceneswa ko zina ra Jehovha ishwiro inosisira maningi, mudenga no pasi.—Mateu 6:9, 10.
VANDHU VAMWENI VANOTI: “Matambujiko atinosongana nawo ikuda ka Mwari.”
-
Imwimwi maizodavirisa kudini?
ZVOTAJIJA
Sathana Dhiyabhu, Adhamu na Evha ndivona vakaita kuti vandhu pa nyika vatambujike. Jehovha anoneseka ndisu, ngo kukasika iyena anozopeja matambujiko edu ese.
Kuhwirijira
-
Sathana wakananga manyepo api kuna Evha?
-
Zvakakheta Adhamu na Evha zviri kutipsasisa kudini?
-
Tinozvizivisa kudini kuti Jehovha ari kuneseka ngo matambujiko edu?
ZIVANYI ZVIMWENI
Vonanyi zvinonanga Bhaibheri ngo pamusoro pokuti, cishaishi icinyi.
Verenganyi ngo pamusoro po shwiro imweni yakamusa Sathana mu munda wo Edheni.
“Nei Mwari Achibvumira Kutambura?” (Murindiri, No. 1 wa Janeiro wo 2014, Cishona)
Vonanyi mupinguro yo muvhunjo inonesa maningi.
“Sei vaJudha Vakaurayiwa Nehurumende yevaNazi? Sei Mwari Asina Kupindira?” (Mu interneti)
Vonanyi kuti mwanarume umweni wakajijenyi ngo pamusoro po matambujiko aakasongana nawo kare.
