Upenyu wo Mbhuri pomwe no Ushamwari
Kuno vazinji, kubungaija no shamwari pomwe no mbhuri i cineso cikuru. Vonanyi zviambi zvinganani zvingamubesera kuti muve no ushamwari hwakanaka no vamweni.
MUCAPSAKA ZVINOMUDAKAJISA
CIAMBI CO MU BHAIBHERI: “Mucapsaka bzinomudakarisa basi, kaveta psakanyi bzinodakarisa vamweni.”— VaFilipi 2:4.
ZVINODA KUREVENYI: Shamwari yakanaka inobatikana ngo zvaingaita kuti ibesere vemweni, kuciripi kuimira kuashira basi. Kudari mukajidakajisa basi, munozokhuvaza ushamwari hwenyu. Akuna anodakarira kugara no mundhu anodakarira kubhuya ngo zvaanazvo no zvaanokwanisa kuita basi. Inga muezaniso, kudari mukapsaka kujidakajisa basi pa mucadho wenyu, zvingaita kuti pave no upombo. Rimwe bhuku rinozwi, O Caminho para o Caráter rinoti, “vandhu vanorangarira ngo zvavo basi zve vacikaneseki ngo vamweni vanojikhuvaza vega.”
NGOZVAPI ZVAMUNGAITA:
-
Beseranyi vandhu. Shamwari jaushoni jinothembana umwe no umweni zve jakanasiririka kubesera. Kupsakisisa kumweni kunonanga kuti, kubesera vamweni zvinotibesera kuti titame kuvora mwoyo zve zvinoengejera kujithemba kwatinozviita.
-
Zwiranyi usizi. Gama rokuti usizi rinoreva kujidira pa ndau yo vamweni. Mundhu ano usizi kana anozwira pena aiti jee no cido co kukhugunya umweni.
Kudari mukakwanisa kujidira pa ndau yo mundhu umweni, zvinoreruka kukanganwa kuposa ko vamweni. Ngokudaro, kuzwira usizi kungamubesera kunyisa mukheto no kuita ushamwari no vandhu vo zvirovejeso zvakasiana pomwe no majija akasiana.
-
Izwanyi vamweni. Pamunopurukira vamweni, munonasa kuvaziva. Kuti muve no shamwari yokadi, munodikana kubhuisana nayo ngo pamusoro po zviro zvainodakarira zvinosisira maningi kwaari. Ivanyi mundhu anopurukira zve tatijanyi kuti munoneseka ndiyena. Jijo imweni ya wari yakati, “mabhuyo o mushovo wakadakaro anoita kuti vandhu vadakare maningi.”
SANANYI USHONI SHAMWARI JENYU
CIAMBI CO MU BHAIBHERI: “Vadoni vakaxata vanovoja maitiro akanaka.”—1 VaKorinto 15:33.
ZVINODA KUREVENYI: Vandhu vamunopeja nguva yakawanda navo vangamukwevejera kuti muite—zvakanaka kana zvakashata. Vandhu vanojija ngo magariro wo mu ndharaundha vanotendera kuti kukwevejehwa uku kuno simba kamare. Inga muezaniso, ivona vanonanga kuti ukapeja mukuvo wakareba no vandhu vanobhema kana vandhu vari kuda kurambana, mungatovavo no cido co kuda kutanga kubhema kana kurambana.
ZVICINYI ZVAMUNGAITA: Ivanyi no ushamwari no vandhu vano mugariro jaushoni jamunodakarira kuva najo. Inga muezaniso, psakanyi kubungaija no vaya vanotaja vamweni, vano nderemejo, vanokova zve vanoashirana.
ZVIAMBI ZVIMWENI
Vonanyi vhidhio jakacijikira mu Bhaibheri kuitira kubesera varovorani, majaha pomwe no vana kuti vave no upenyu hwo mbhuri unodakajisa
MUCASHANDISA MAGAMA ANOKHUGUNYA.
“Variyo vano rurimi hunoceka inga banga.”—MAZWI AKANGWARA 12:18.
IVAI ANOKOVA.
‘Mundhu anokova anozokuriswa’— MAZWI AKANGWARA 11:25, Baiberi Mazwi Akacena aMwari.
TAJANYI VAMWENI INGA ZVAMUNODA KUTAJWA.
“Bzo munoda kuti vandhu vamuitire, vaitirenyivo.”— MATEU 7:12.
