Vaiziraeri Vaienda ku Hondo, Ngenyi Itusu Atiendivo?
PAMUKUVO wainga weciitika hondo yocipiri yo pasi pese, mutungamiriri umweni o Nazista wakavhunja kudari Zvapupu zva Jehovha: “Kudari umwe wenyu akaramba kwenda kuhondo, kohwisa Fransa no Ingratera, mwese munopera kufa.” Masoca o Nazista ainga akanasiririka. Asi hama jedu jakaenderera mberi jakagondeka. Ivona vakakhombija cicunge kamare. Muezaniso uu, unovonesa mavonero o Zvapupu zva Jehovha ngo pamusoro po hondo. Itusu atiendi kuhondo. Pikija vacitithisijira kuti vanotiuraya kudari tikatama kwenda, itusu atinghwiniri mu hondo jinoitwa ngo nyika ino.
Asi asipi vese vanotenderana nazvo. Vazinji vanonanga kuti mundhu wese anodikana kuita ciricese kuti ajivirire nyika yake. Vamweni vangarangarira kudari: ‘Vaiziraeri vainga vandhu vakasanwa va Mwari, asi ivona vaienda kuhondo. Ngenyi itusu atiendivo?’ Maizodavirisa kudini? Munodikana kusanangura kuti mugariro wo Vaiziraeri no wedu wakasiana maningi kamare. Ngatende tivone zviro zvishanu zvinotisiyanisa na ivona.
1. VANDHU VESE VA MWARI VAINGA VO JINJA RIMWE BASI
Mu nguva yokare, Jehovha wakaunganija vandhu vake kuvha ku jinja rimwe basi, jinja ro Vaiziraeri. Iyena wakananga kuti Vaiziraeri ‘vaizoita vake kamare pakati po majinja ese.’ (Exodo 19:5) Mwari wakavapavo ndau yo vaidikana kugara. Ngo kudaro, Mwari paaivhunja Vaiziraeri kuti vaende kohwisa majinja amweni, ivona avacaienda kohwa kana koparaja hama javo. Kana kuti vandhu vainamatavo Jehovha. *
Nyamasi uno, vandhu vanonamata Jehovha vanovha “ku majinja ese, ku mavhumbo ese, ku vandhu vese no ku ndimi jese.” (Apokaripsi 7:9) Kudari vandhu va Mwari vaienda ku hondo, ivona vaizohwisana no hama javo kana kutovauraya kamare.
2. JEHOVHA WAKANANGA KUTI VAIZIRAERI VAIDIKANA KWENDA KU HONDO
Mu nguva yokare, Jehovha ndiyena wainanga kuti ngenyi Vaiziraeri vaidikana kwenda ku hondo no njiku yovaidikana kwenda. Inga muezaniso, Mwari ndiyena wakavhunja Vaiziraeri kuti vaiende kohwa no Vakanani. Jinja iri raizivika maningi ngo kunamata kwaro madhimoni, kuita zvo uhure, no kupisa vana vadoko inga mupiro. Kusiyapo zvondhozvo, Vakanani vaigara mu ndau yaida kupuwa vandhu va Mwari. Izvo ndizvona zvakaita kuti Jehovha avhunje Vaiziraeri kuti vaende koparaja vandhu ava, kuti ivona vatame kuitavo zviro zvakashata zvovaiita. (VaLevi 18:24, 25) Pikija Vaiziraeri povakapera kutora Nyika Yakagondeswa, Mwari waitendera kuti vandhu vake vahwisane no majinja amweni aivenga Vaiziraeri. (2 Samueli 5:17-25) Asi Jehovha aazivi kumbosiya kuti Vaiziraeri vateme vega civaringo co kwenda kohwisana no majinja amweni. Povaizviita, muviyo jakona jainga jakashata maningi.—Bziverengo 14:41-45; 2 Kronike 35:20-24.
Nyamasi uno, Jehovha aatenderi kuti vandhu vaende ku hondo. Majinja anohwisana kuti awane zvaanoda, kuciripi zvinoda Mwari. Ivona vanoita izvi, ngokuti vanoda kuva no ndau yakakura, kuwana maningi mare kana kuda kukwanirisa zviro zvavapera kuronga inga zvouporitika. Asi tingati kudini ngo vaya vanonanga kuti vari kuita hondo ngo zina ra Mwari kuti vajivirire gerejha ravo kana kuti vauraye vavengi va Mwari? Jehovha anozojivirira vandhu vake no kuparaja vavengi vake kumbejiyo, pa hondo yo Armagedhoni. (Apokaripsi 16:14, 16) Pa hondo iyi, masoca a Mwari anozoumbwa ngo zvisikwa zvokumujimu, kuciripi ngo vanamati vake.—Apokaripsi 19:11-15.
3. VAIZIRAERI AVACAIURAYA VANDHU VAIKHOMBIJA RUTENDO KUNA JEHOVHA
Kunanga kuti vandhu vanoita hondo nyamasi uno, vanoponesa vaya vanokhombija rutendo kuna Mwari inga manera Jehovha wakaponesa Rahabhi no ukama hwake pakuparajwa ko Jeriko?
Mu nguva yokare, masoca o Vaiziraeri kazinji aikhombija usizi kuno vaya vaivonesa rutendo kuna Mwari. Ivona vaiparaja vandhu vainga vatongehwa kufa ndi Jehovha. Vonanyi muezaniso muviri basi. Jehovha wakananga kuti dhorobha ro Jeriko raidikana kuparajwa, asi Vaiziraeri avazivi kuuraya Rahabhi no ukama hwake ngo ndava yo rutendo hwaakakhombija. (Joxwa 2:9-16; 6:16, 17) Pa kufamba ko nguva, dhorobha rese ro Vagibhiyoni arizivi kuparajwa ngokuti Vagibhiyoni vakakhombija kuti vaireremeja Mwari.—Joxwa 9:3-9, 17-19.
Nyamasi uno, majinja anoenda ku hondo aaponesi vandhu vanokhombija rutendo kuna Mwari. Nguva jimweni, vandhu vacina ndava vanouraiwa majinja paanonga ecihwisana.
4. VAIZIRAERI VAIDIKANA KUZWIRA NDHUNGAMIRIRO JA MWARI NGO PAMUSORO PO HONDO
Mu nguva yokare, Jehovha waida kuti masoca o Vaiziraeri vateveje ndhungamiriro jake povaienda ku hondo. Inga muezaniso, Mwari wakananga kuti povaida kuparaja dhorobha riri rese vaidikana kuvhunjisa dangani irona raida ‘kujikhonja no kuita runyararo.’ (Deuteronòmio 20:10) Jehovha waidazve kuti masoca o Vaiziraeri vave no mufambiro wakacena. Zvoita kuti ivona pamwepo no mucaca wavo zvive zvakacena. (Deuteronòmio 23:9-14) Inga muezaniso, masoca o majinja amweni aijipa vanakaji vo jinja rovaidaro kuhwisa. Asi Jehovha wakarambija Vaiziraeri pa kuita zvondhozvo. Kunasa kunanga, ivona vaizodikana kucadha no mwanakaji wo dhorobha rovakanyisa, nopapera mweji wese novanyisa dhorobhero.—Deuteronòmio 21:10-13.
Nyamasi uno, nyika jakawanda jakasaina zvitenderano pa manera avanodikana kuhwisana ngocao. Cinangwa cikuru co mutemo jinonangwari pa zvitenderano izvi ngo co kujivirira vaya vacina ndava. Asi kazinji mutemo iji ajibasi kuzwihwa.
5. MWARI WAKAITA HONDO KUTI ABESERE VANDHU VAKE
Kunanga kuti Jehovha anoita hondo kuti abesere vandhu vake inga zvaakabesera Vaiziraeri kuti vanyise Jeriko?
Mu nguva yokare, Jehovha wakaita hondo kuti abesere Vaiziraeri. Kazinji wakabesera kuti vawine mu njira inoshamaisa maningi. Inga muezaniso, Jehovha wakabesera kudini Vaiziraeri kuti vaparaje dhorobha ro Jeriko? Inga zvakanangwa ndi Jehovha, Vaiziraeri ‘povakakhuwa ngo simba, mufimbiji yakawa,’ zvoita kuti vakwanise kuparaja dhorobha iri. (Joxwa 6:20) Vakaitisa kudini kuti vakwanise kunyisa Vaamoni? “Tenji wakakhandira panyezuru pavo mapuwe akakura . . . Vakaurawa ngo mapuwe vainga vakawanda kupinda vaya vakaurawa ngo mapanga o vaIsraeli.”—Joxwa 10:6-11.
Nyamasi uno, Jehovha aaiti hondo kuti abesere jinja riri rese pa nyika pano. Umambo hwa Mwari, unotongwa ndi Jesu Kristu, auiti “divi ro nyika ino.” (Johani 18:36) Mukusiyana, Sathana ndiyena ari kutungamirira utongi hwese. Manera jiri kuitwa hondo nyamasi uno, zviri kuvonesa kuti Sathana wakashata maningi.—Ruka 4:5, 6; 1 Johani 5:19.
MAKRISTU OKADI ANOEJA KUVA NO RUNYARARO NO VAMWENI
Inga zvatapera kuvona, mugariro wedu nyamasi uno wakasiyana maningi no mugariro wo Vaiziraeri. Asi kusiyana uku, andikopi basi kunotiita kuti titame kwenda ku hondo. Kuno mathangwe amweni. Inga muezaniso, Jehovha wakananga kuti mu njiku jo kupejisira, vaya vaaizojijisa “avazojijibze kuita hondo,” nee avacaizoendeyo. (Isaia 2:2-4) Kusiyapo zvondhozvo, Jesu wakananga kuti vajiji vake avacaizoita “divi ro nyika, “ kana kuti avacaizonghwinira mu shwiro jo nyika ino.—Johani 15:19.
Jesu wakajijisazve vajiji vake kuti vaite zvizinji kupinda izvi basi. Iyena wakavajijisa kuti avacaidikana kuva no mugariro jaizovaita kuti vave no bundu, ushungu no mugariro jaizovaita kuti vaite hondo. (Mateu 5:21, 22) Wakavajijisazve kuti vave vandhu “vanopsaka kuita runyararo” no kuda vavengi vavo.—Mateu 5:9, 44.
Tingativo kudini nga umwe na umwe wedu? Zvingaita kuti itusu atitodi kwenda ku hondo. Asi kureva kuti muno ciri cese mu mwoyo mwedu caizotiita kuti tinyenyane kana kutoparajana mu ungano? Tinodikana kwenderera mberi tecishanda ngo simba kuti titame kuva no mazwiro akadaro.—Jakobo 4:1, 11.
Itusu atinghwiniri mu hondo jinoitwari ngo majinja. Asi tinovangisira kuti tive no runyararo no kukhombija kuti tinodisana ngocedu. (Johani 13:34, 35) Tatema civaringo co kwenderera mberi ticina kwatakapeamira, patinonga tecivetera njiku yokuti Jehovha anozopeja hondo mbhera narini.—Nduyo 46:10.
^ Nguva jimweni majinja o Vaiziraeri aihwisana ngocao, asi zvondhozvo zvainyangajisa Jehovha. (1 Majimambo 12:24) Pa vhaza jimweni Jehovha wakatendera kuti ivona vahwisane ngocavo. Izvi zvaaitika ngokuti ivona kangaije vainga vakhombija kutama kugondeka kana vainga vakaita cishaishi cikuru.—Vatongi 20:3-35; 2 Kronike 13:3-18; 25:14-22; 28:1-8.
