OOHAPU ndhika odha li dha popiwa kuDavid gwomuIsraeli shonale sho a li ta pandula omukiintu ngoka a li a tsakaneke. Edhina lyomukiintu ngoka oAbigajil. Oshike sha li sha ningitha David e mu pandule, nongiini tatu vulu okumona uuwanawa moshiholelwa shaAbigajil?

David okwa li a tsakaneke omukiintu nguka omuhokanwa pethimbo a li ta fadhuka po omukwaniilwa Saul. Abigajil okwa li a hokanwa kuNabal, omulumentu omuyamba ngoka ha litha oonzi dhe odhindji moshitopolwa shoondundu shokuumbugantu waJuda. David naalumentu ye, oya kala ‘aapopili’ yaasita noyoonzi dhaNabal. Konima yethimbo David okwa li a tumu aapiya ye kuNabal ye mu indile e ya pe iikulya mbyoka ‘ta vulu oku ya pa.’ (1 Sam. 25:8, 15, 16) Kasha li ando oshinima oshiwinayi okupula ngawo, molwaashoka David naalumentu ye oya kala nokugamena iimuna yaNabal.

Ihe Nabal “egoya” ngaashi edhina lye tali ti. Okwa li a yamukula nayi David nokwa li e mu tuku nokwe mu tindile shoka e mu pula. Onkee David okwa li i ilongekidha oku ka dhipaga Nabal, omolweihumbato lye ewinayi. Nabal naanegumbo lye oya li taya ka dhipagwa omolwuugoya we. —  1 Sam. 25:2-13, 21, 22.

Sho Abigajil u uvu shoka tashi ka ningwa po omolweihumbato lyomusamane gwe, okwa li a katuka onkantu, opo a ye mo olunyala. Okwi indile David nesimaneko a dhimine po Nabal, omolwekwatathano ewanawa ndyoka David a li e na naJehova. Abigajil okwa li e etele David naalumentu ye iikulya oyindji. David oye a li ta ka ninga omukwaniilwa a landula ko. David okwa li e shi zimine kutya Abigajil okwa li a longithwa kuJehova e mu keelele kaa yone kuye. Okwa li a lombwele Abigajil a ti: “Kalunga na hambelelwe molwoondunge dhoye oombwanawa nomolwashoka wa ningi nena ndjika okugamena ndje kiihuna yedhipago.” —  1 Sam. 25:18, 19, 23-35.

Osha yela kutya inatu hala nando okukala twa fa Nabal, ihaatu pandula uuwanawa mboka twa ningilwa. Uuna twa mona kutya opwa holoka uupyakadhi wontumba, otatu ka ninga ngaashi tatu vulu tu wu kandule po. Otatu vulu okupopya ngaashi omupisalomi ngoka i indile Kalunga a ti: “Pe ndje oondunge nomatseho.” —  Eps. 119:66.

Yalwe otashi vulika ya mone kutya otwa katuka noondunge. Kutya nduno otaye shi popi nenge hasho, otashi vulika ya ka kale yu uvite ngaashi David ngoka a ti: “Kalunga na hambelelwe molwoondunge dhoye oombwanawa.”