1, 2. (a) Ombili yini tatu vulu okunyanyukilwa ngashingeyi? (b) Oshike tashi tu imbi tu kale nombili ya gwana po methimbo ndika? (Tala kethano lyopetameko.)

ATUHENI otwa hala onkalamwenyo yi na ombili, kaayi na iimpwiyu yasha. Inatu pandula tuu sho Jehova e tu pa ‘ombili ye,’ ndjoka yi li uukwatya mboka hawu tu gamene komadhiladhilo ngoka tage tu piyaganeke. (Fil. 4:6, 7) Molwaashoka otwi iyapulila Jehova, ohatu nyanyukilwa “ombili naKalunga,” ano ekwatathano ewanawa naye. — Rom. 5:1.

² Nonando ongawo, ethimbo lyaKalunga lyokweeta ombili ya gwana po, inali ya natango. Momasiku ngaka omadhigu gahugunina, omaipumomumwe ito mana, naantu oyendji oye hole oontamanana. (2 Tim. 3:1-4) Tu li Aakriste, otwa pumbwa okukondjitha Satana nosho wo omalongo giifundja ngoka ta humitha komeho. (2 Kor. 10:4, 5) Ihe mboka tashi vulika unene ya yone po ombili yetu, aakwanezimo yetu mboka kaaye shi ooitaali. Yamwe otashi vulika ya sheke shoka twi itaala, ye tu lundile kutya otwa topola uukwanegumbo noye tu ningile omatilitho kutya otaye ke tu ekelahi, ngele inatu hala okweetha po eitaalo lyetu. Omapataneko ngoka tage tu ziilile kaanegumbo lyetu, otu na oku ga tala ko ngiini? Ongiini tatu vulu okupondola mokuungaunga nago?

3, 4. (a) Omalongo gaKristus otaga vulu okweetitha shike? (b) Uunake tashi vulika shi kale eshongo unene okulandula Jesus?

³ Jesus okwa li e shi tseya kutya omalongo ge otaga ka topola aantu. Okwa li wo e shi kutya mboka taya ningi aalanduli ye, oya pumbwa omukumo, opo ya pondole, uuna ya taalela omapataneko. Omapataneko ngoka otaga vulu okuguma ombili yaanegumbo. Jesus okwa ti: “Inamu dhiladhila, ngame onde ya okweeta ombili kombanda yevi. Inandi ya okweeta ombili, ihe egongamwele. Ongame nde ya okuhongakanitha omumati nahe, nomukadhona nayina, noshitenya shomukiintu nayinamweno. Aanegumbo yomuntu ngoka otaa ningi aatondi ye.” — Mat. 10:34-36.

⁴ Sho Jesus a ti kutya “inamu dhiladhila, ngame onde ya okweeta ombili,” okwa li ta ti ngiini? Okwa li ta ti kutya yamwe yomaapulakeni ye, oya li ya pumbwa okudhiladhila kombinga yiilanduliko mbyoka taya ka mona, ngele oye mu landula. Etumwalaka lye olya li tali vulu okutopola aantu. Odhoshili kutya elalakano lyaJesus olya li okuuvitha etumwalaka lyaKalunga lyoshili, ihe haku topola aantu. (Joh. 18:37) Niishewe, okukala omudhiginini komalongo gaKristus otashi ka kala eshongo enene, ngele kuume koye kopothingo nenge aanegumbo lyoye oya tindi okutaamba ko oshili.

5. Aalongwa yaJesus oya li ya taalela oonkalo dhini?

⁵ Jesus okwa li wo a popi kombinga yuuwehame mboka omuntu ha kala u uvite, uuna ta patanekwa kaanegumbo lye. Okwa ti owu li oshinima shoka aalanduli ye, ye na okwiidhidhimikila. (Mat. 10:38) Opo aalongwa yaJesus yu ulike kutya aadhiginini kuKristus, oya li yi idhidhimikile omasheko nosho wo okukala kaaye niwe nayo kaanegumbo lyawo. Nonando ongawo, oya li ya mono oshindji shi vulithe pwaashoka ya kanitha. — Lesha Markus 10:29, 30.

6. Oshike tu na okudhimbulukwa, ngele aanegumbo lyetu otaye tu pataneke, sho tatu longele Jehova?

⁶ Aakwanezimo yetu nonando oye tu pataneke sho tatu longele Jehova, otu na okukala tu ya hole. Ihe otu na okudhimbulukwa kutya ohole yetu yokuhola Kalunga naKristus oyo tayi ya tango. (Mat. 10:37) Otu na wo okudhimbulukwa kutya Satana ota vulu oku tu ningitha tu kale tu hole aanegumbo lyetu, opo a teye po uudhiginini wetu. Natu taleni koonkalo dhimwe ndhoka dha kwatela mo omapataneko okuza kaanegumbo lyetu nankene tatu vulu okupondola mokuungaunga nago.

7. Mboka ye na ookuume kopandjokana kaaye shi ooitaali, oye na okutala ko onkalo yawo ngiini?

⁷ Ombiimbeli otayi ti kutya mboka taya hokana otaya ka kala ye na ‘uudhigu monkalamwenyo yawo.’ (1 Kor. 7:28) Ngele owu na kuume kopandjokana kee shi omwiitaali, otashi vulika shi gwedhe ko kuupyakadhi nokiimpwiyu mondjokana yeni. Nonando ongaaka, osha simana wu tale ko onkalo yoye ngaashi Jehova e yi tala ko. Ngele kuume koye kopandjokana ina hala okutaamba ko oshili, shono hasho etompelo lya simana lyokutopoka nenge lyokuhengana. (1 Kor. 7:12-16) Nonando omusamane ngoka kee shi omwiitaali ita vulu okukwatela komeho iinima yopambepo, oku na okusimanekwa, molwaashono oku li omutse gwuukwanegumbo. Sha faathana, omukulukadhi ngoka kee shi omwiitaali, oku na okuulukilwa ohole komusamane gwe ngoka Omukriste. — Ef. 5:22, 23, 28, 29.

8. Omapulo geni to vulu okwiipula, ngele kuume koye kopandjokana ota kambadhala okungambeka omaipyakidhilo goye gokulongela Kalunga?

⁸ Ongiini ngele kuume koye kopandjokana ota kambadhala okungambeka omaipyakidhilo goye gokulongela Kalunga? Pashiholelwa, omumwameme gumwe okwa li a lombwelwa komusamane gwe ngoka kee shi omwiitaali, a kale owala ha kutha ombinga muukalele omasiku gamwe moshiwike. Ngele owa taalela onkalo ya faathana, ipula  to ti: ‘Mbela kuume kandje kopandjokana okwa hala ndi ethe po okulongela Kalunga? Ngele hasho, mbela itandi vulu okutaamba ko shono ta lombwele ndje?’ Okukala tu na ondjele, otaku ke tu kwathela tu yande omaipumomumwe inaaga pumbiwa. — Fil. 4:5.

9. Ongiini omuvali Omukriste ta vulu okulonga oyana ya kale ya simaneka omuvali ngoka kee shi omwiitaali?

⁹ Ngele kuume koye kopandjokana ke shi omwiitaali, otashi vulika shi kale oshidhigu okudheula aanona yeni. Pashiholelwa, owa pumbwa okulonga aamwoye ya vulike koshipango shOmbiimbeli shoka tashi ti: “Simaneka ho nanyoko.” (Ef. 6:1-3) Ihe mbela ongiini ngele kuume koye kopandjokana iha landula omithikampango dhOmbiimbeli dhopamikalo? Tula po oshiholelwa oshiwanawa mokukala we mu simaneka. Gandja eitulomo komaukwatya ge omawanawa noku mu pandula. Yanda oku mu ula nayi komeho gaanona. Shoka wu na okuninga, oku ya yelithila kutya kehe gumwe oku na okuhogolola kutya ota longele Jehova nenge hasho. Eihumbato ewanawa lyaanona, otashi vulika li nanene omuvali ngoka kee shi omwiitaali kelongelokalunga lyashili.

10. Ongiini aavali Aakriste taya vulu okulonga oyana oshili yOmbiimbeli muukwanegumbo wa topoka palongelokalunga?

¹⁰ Omathimbo gamwe, kuume kopandjokana ngoka kee shi omwiitaali, otashi vulika a kale a hala aanona ya kuthe ombinga miituthi yoshipagani nenge ya longwe omalongo gomalongelokalunga giifundja. Omusamane gumwe otashi vulika i indike omukulukadhi gwe ngoka Omukriste, kaa longe aanona okuza mOmbiimbeli. Nonando ongawo, omukulukadhi Omukriste ota vulu okuninga ngaashi ta vulu, a longe aanona oshili yOmbiimbeli. (Iil. 16:1; 2 Tim. 3:14, 15) Pashiholelwa, omusamane ngoka kee shi Omukriste, otashi vulika i indike omukulukadhi gwe a konakone  Ombiimbeli naanona nenge a ye nayo kokugongala. Sho ta simaneke omatokolo gomusamane gwe, ota vulu natango okupopya naanona kombinga yeitaalo lye mpoka tashi opalele. Kungawo, ote ya kwathele ya tseye kombinga yaJehova nokukala ye shi shoka sha puka naashoka shi li mondjila. (Iil. 4:19, 20) Hugunina, aanona oyo ye na okutokola yo yene ngele oya hala okulongela Jehova nenge hasho. — Deut. 30:19, 20. *

11. Oshike tashi vulika shi etithe uupyakadhi pokati koye naakwanezimo yoye mboka kaaye shi Oonzapo?

¹¹ Petameko, otashi vulika tu kale inaatu lombwela aanegumbo lyetu kombinga yokweendathana kwetu nOonzapo dhaJehova. Sho eitaalo lyetu tali ende tali koko, otatu ka kala twa hala oku ya lombwela kombinga yaashoka twi itaala. (Mark. 8:38) Uudhiginini woye kuJehova otashi vulika wu etithe uupyakadhi pokati koye naakwanezimo yoye. Natu konakoneni iinima yimwe mbyoka to vulu okuninga, opo wu ungaunge nawo nowu kale omudhiginini kuJehova.

12. Omolwashike aakwanezimo yetu mboka kaaye shi ooitaali tashi vulika ye tu pataneke, ihe ongiini tatu vulu oku ya ulukila olukeno?

¹² Kala wu na olukeno naakwanezimo yoye mboka kaaye shi ooitaali. Sho tatu nyanyukilwa oshili yOmbiimbeli ndjoka twi ilonga, aakwanezimo yetu otashi vulika ye shi kuthe ko papuko kutya otwa pukithwa nenge kutya otwa ya miiveva. Otashi vulika ya dhiladhile kutya katu ya hole we, molwaashono ihatu dhana nayo omasiku gomafudho. Otashi vulika wo ya kale ya tila kutya oshike tashi ke tu ningilwa konima ngele twa si. Onkee ano, otwa pumbwa oku yu ulukila olukeno, mokukambadhala okuuva ko nkene yo yu uvite nosho wo moku ya pulakena neitulomo, tu mone lela shoka tayi ipula nasho. (Omayel. 20:5) Omuyapostoli Paulus okwa li a kambadhala okuuva ko ‘aantu ayehe,’ opo e ya uvithile onkundana ombwanawa. Natse ngele osho twa ningi, otashi ke tu kwathela wo. — 1 Kor. 9:19-23.

13. Otu na okupopya ngiini naakwanezimo yetu mboka kaaye shi ooitaali?

¹³ Popya nombili. Ombiimbeli otayi ti: “Oohapu dheni nadhi kale aluhe oombwanawa.” (Kol. 4:6) Otatu vulu okugalikana Jehova e tu pe ombepo ye ondjapuki, opo tu ulike iiyimati yombepo, uuna tatu popi naakwanezimo yetu. Inatu pumbwa okukala tatu nyenyeta kombinga yomalongo gomalongelokalunga gawo giifundja. Ngele oya ningi sha nenge ya popi sha shoka she tu ehameka, otatu vulu okuholela oshiholelwa shaayapostoli. Paulus okwa nyola a ti: “Otatu yambeke mboka taye tu thingi. Ngele tatu tidhaganwa, otatu idhidhimike. Ngele tatu popiwa nayi, otatu yamukula noohapu oombwanawa.” — 1 Kor. 4:12, 13.

14. Uuwanawa wuni hawu zi mokukala neihumbato ewanawa?

¹⁴ Kala wu na eihumbato ewanawa. Nonando okupopya nombili oku li ekwatho uuna tatu ungaunga naakwanezimo yetu mboka taye tu pataneke, uushili owo kutya eihumbato lyetu olyo lya simana unene. (Lesha 1 Petrus 3:1, 2, 16.) Oshiholelwa shoye, otashi ka kwathela aakwanezimo lyoye ya mone kutya Oonzapo dhaJehova odha nyanyukwa moondjokana dhawo, ohadhi sile oyana oshimpwiyu, nodhi na onkalamwenyo ya yogoka noyi na eityo.Onkee ano, nonando aakwanezimo yetu inaya taamba ko oshili, otatu vulu okukala twa nyanyukwa, sho tatu longele Jehova nuudhiginini.

15. Ongiini tatu vulu okwiilongekidhila oonkalo ndhoka tashi vulika dhi e te oontamanana?

¹⁵ Ilongekidha komeho yethimbo. Dhiladhila koonkalo ndhoka tadhi vulu okweeta uupyakadhi, e to tala kutya oto ku ungaunga nadho ngiini. (Omayel. 12:16, 23) Omumwameme gumwe a za koAustralia okwa ti: “Tatemweno okwa li ha pataneke oshili noonkondo. Manga inaatu mu dhengela tu mu popithe, ngame nomusamane gwandje otwa li hatu galikana kuJehova, e tu kwathele  kaatu mu yamukule momukalo omwiinayi, nonando ye okwa geya. Otwa li hatu longekidha iikundathanwa tayi opalele, opo tu kaleke oonkundathana dhetu pambili. Opo tu yande oonkundathana oonde ndhoka tadhi e ta oontamanana kombinga yomalongelokalunga, otwa li hatu ngambeke ethimbo lyetu lyoku mu dhengela.”

16. Ongiini to vulu okusinda eiyuvo lyokukala wu uvite wa yemateka aakwanezimo yoye?

¹⁶ Odhoshili kutya inatu tegelela tu yande okwaauvathana akuhe, hoka taku holoka pokati ketu naakwanezimo yetu mboka kaaye shi ooitaali. Uuna pwa holoka okwaauvathana, otashi vulika wu kale wu uvite ondjo, molwaashono owu hole noonkondo aakwanezimo yoye noho kambadhala aluhe oku ya nyanyudha. Ngele osho wu uvite ngawo, kambadhala okupititha uudhiginini woye wokuhola Jehova komeho gaakwanezimo yoye. Ngele owa ningi ngawo, otashi vulika ya mone kutya okulongela Kalunga okwa simana. Ihe owu na okudhimbulukwa kutya ku na oku ya thiminika ya taambe ko oshili. Pehala lyaashono, ye etha ya mone kutya uuwanawa wuni wa mona, sho to longele Jehova. Kalunga ketu omunahole ote ya pe ompito ya hogolole ondjila ndjoka ye na okulandula, ngaashi e shi ku ningile. — Jes. 48:17, 18.

17, 18. Oshike tashi vulu oku ku kwathela wi idhidhimike, ngele oshilyo shuukwanegumbo sha thigi po Jehova?

¹⁷ Uuna oshilyo shuukwanegumbo sha kondwa nenge shi iteta ko kegongalo, omuntu oho kala wa fa wa tsuwa negonga. Ongiini to vulu okuungaunga nonkalo ondhigu ya tya ngawo?

¹⁸ Kala aluhe wi ipyakidhila niinima yopambepo. Itunga pambepo mokukala ho lesha Ombiimbeli esiku kehe, ho ilongekidhile okugongala, ho kutha ombinga muukalele noho galikana Jehova e ku nkondopaleke wu idhidhimike. (Jud. 20, 21) Ihe ongiini ngele oto ningi iinima ayihe mbyono, ndele kashi ivule? Ino teka omukumo! Omukalondjigilile gwokuninga iinima yopambepo, otagu vulu oku ku kwathela wu pangele omadhiladhilo nomaiyuvo goye. Tala koshiholelwa shomunyoli gwEpisalomi 73. Okwa li e na etaloko lya puka, e ta kala e shi uvitile nayi. Ihe sho e ya mehala lyokulongela Kalunga, okwa lundulula omadhiladhilo ge. (Eps. 73:16, 17) Okulongela Jehova nuudhiginini, otaku ke ku kwathela wu ninge sha faathana.

19. Ongiini to vulu okuulika kutya owa simaneka elongekidho lyaJehova lyokuputudha?

¹⁹ Kala wa simaneka eputudho lyaJehova. Eputudho lyaJehova otali vulu okweetela kehe gumwe uuwanawa, mwa kwatelwa naamboka ya kondwa. (Lesha Aahebeli 12:11.) Pashiholelwa, Jehova ote tu lombwele kutya ‘inatu kwatathana’ nomuntu ngoka ini iyela ombedhi. (1 Kor. 5:11-13) Nonando otu kale tu uvite nayi, otu na okuyanda okukwatathana noshilyo shuukwanegumbo shoka sha kondwa. Katu na okukwatathana nasho mongodhi, oku shi tumina omatumwalaka, oontumwafo, oo-email nenge tu kwatathane nasho momukalo gulwe.

20. Otatu vulu okukala netegameno lini?

²⁰ Kala wu na etegameno. Ohole ohayi “tegamene.” Otatu vulu okukala netegameno kutya mboka ya thiga po Jehova otaya ka galuka. (1 Kor. 13:7) Ngele owu wete kutya oshilyo shuukwanegumbo shoka sha kondwa otashi ningi omalunduluko, galikana shi kwathelwe kOmanyolo noshi taambe ko ehiyo lyaJehova ndyoka tali ti: “Galukila kungame.” — Jes. 44:22.

21. Oto ka ninga po shike, ngele owa patanekwa kaanegumbo lyoye, molwaashono wa landula Jesus?

²¹ Jesus okwa ti kutya itatu ke mu opalela, ngele otwa pititha omuntu gwontumba komeho ye. Okwa li e na einekelo kutya aalongwa ye otaya ka kala ye na omukumo gwokukala aadhiginini kuye, nonando oya patanekwe kaanegumbo lyawo. Ngele okulandula Jesus okwe e ta “egongamwele” muukwanegumbo weni, inekela muJehova e ku kwathele wu ungaunge nomashongo nomupondo. (Jes. 41:10, 13) Kala wa nyanyukwa mokutseya kutya Jehova naJesus oye ku hokwa notaye ke ku yambeka, omolwuudhiginini woye.