Elapi ndyoka inali popiwa mo mOmbiimbeli. Aantu oyendji ohaya dhiladhila kutya Jesus Kristus okwa li a dhingilwa nelapi lya tya ngaaka sho a fumvikwa. Molwaashoka yamwe osho yi itaala ngawo, elapi ndika yamwe oya li ye li tala ko li li oshinima oshiyapuki moongeleka dhUukwakriste. Ngashingeyi elapi ndyoka otali adhika metungo lyongeleka yimwe yi li moshilando shaTurin muItalia, noli li mo lya siikilwa nesipili lya kola lyoku li gamena.

Mbela Ombiimbeli otayi ti kutya elapi lyokuTurin olyoshili? Hasho nando.

Natu taleni kiinima itatu kombinga yelapi ndyoka, mbyoka ya yooloka ko kwaashoka Ombiimbeli tayi ti.

1. Elapi lyokuTurin olyo oshilapi shimwe owala shuule wometa 4 lwaampono noshi na okangodhi ka hondjelwa ko ke na uule woosentimeta 8.

   Shoka Ombiimbeli tayi ti: Omudhimba gwaJesus kagwa li gwa dhingilwa nelapi limwe lyoliina, ihe oniilapi oyindjiyindji. Omutse gwe ogwa li gwa dhingilwa nelapi lyi ili. Konima sho Jesus a yumudhwa, omulongwa gwe gumwe okwe ya kombila nokwa “mono mo omalapi omatokele ge li mo.” Ombiimbeli oya ti ishewe kutya ‘elapi ndyoka lya li lya manga omutse gwaJesus, olya li lya gonywa li ikalela pehala lyalyo.’ — Johannes 20:6, 7

2. Elapi lyokuTurin olya li li na omandhindhiliko ngoka taku dhiladhilwa kutya ombinzi ya ndondela ko, ya za komudhimba inaagu opalekwa.

   Shoka Ombiimbeli tayi ti: Sho Jesus a si, aalongwa ye oya li ya longekidha omudhimba gwe ‘pamukalo gwAajuda gwokulongekidhila omudhimba efumviko.’ (Johannes 19:39-42) Omukalo nguka ogwa li gwa kwatela mo okuyoga omudhimba noku gu tila omugwayo niizimba omanga inaagu fumvikwa. (Mateus 26:12; Iilonga 9:37) Onkee ano, aalongwa yaJesus oye na okukala ya opaleke tango omudhimba gwaJesus manga inaaye gu dhingila momalapi.

3. Elapi olya popiwa membo Encyclopædia Britannica taku ti kutya oku na ethano lyomulumentu “a dhingilwa ombinga yimwe nelapi omanga ombinga yilwe ya dhingilwa sigo okomutse, elapi e tali siikile oshitopolwa ashihe shokomeho.”

   Shoka Ombiimbeli tayi ti: Aalongwa yaJesus oya li ya kundathana kombinga yeso lye, yombila ye yi li owala nokombinga yaashoka sha popiwa kaakiintu mboka ya li ya “mono emoniko lyaayengeli mboka ye ya lombwele kutya Jesus oku na omwenyo.” (Lukas 24:15-24) Ngele ando elapi ndyoka omo lya li mombila, kapu na omalimbililo kutya ando aalongwa ye oya kundathana kombinga yalyo nosho wo yomathano ngoka ge li ko. Ihe Ombiimbeli inayi shi popya nando.

Hasho nando. Nando ando olya li lyoshili, osha puka oku li tala ko eyapuki. Natu tale komakotampango gOmbiimbeli ngoka taga yelitha kutya omolwashike kaatu na oku li tala ko eyapuki.

1. Inashi pumbiwa. Jesus okwa yelitha a ti: “Kalunga oye Ombepo, onkee naamboka taye mu galikana, oye na okugalikana mOmbepo nomoshili.” (Johannes 4:24) Aalongelikalunga yashili kaye na okulongitha iinima iiyapuki nenge iihongwathano yopalongelokalunga.

2. Oshi indikwa. Iipango omulongo oyi indika okulongela iikalunga. (Deuteronomium 5:6-10) Ombiimbeli otayi lombwele wo Aakriste tayi ti: “Yandeni iikalunga.” (1 Johannes 5:21) Yamwe otashi vulika ya popye kutya elapi lyokuTurin inaye li tala ko li li oshikalunga, ihe oli li owala endhindhiliko lyelongelokalunga nenge lyeitaalo lyawo. Ihe endhindhiliko lyoshinima otali vulu okukala oshikalunga komuntu ngoka e li tala ko eyapuki. * Onkee ano, omuntu ngoka a hala okuhokiwa kuKalunga ke na okulongela nenge okugandja esimano koshinima shontumba mwa kwatelwa elapi ndyoka lyokuTurin.