Aawe, ihatu shi ningi. Otwe shi popya moshifo shetu shOshungolangelo tatu ti: “Osha puka okuthiminika aantu ye ethe po omalongelokalunga gawo.” a Ohatu yanda okuthiminika aantu, omolwomatompelo taga landula:

•   Jesus ka li nando a thiminike aantu ya taambe ko elongo lye. Ihe okwa li e shi shi kutya konima yethimbo, aashona yomuyo otaya ka taamba ko etumwalaka lye. (Mateus 7:13, 14) Uuna yamwe yomaalongwa ye ya li kaa yu uvite ko shoka a li teya longo, okwa li he etha ya shune pehala lyokuya thiminika ye mu landule. — Johannes 6:60-62, 66-68.

•   Jesus okwa li a lombwele aalanduli ye kutya inaya thiminika nando aantu ye ethe po omaitaalo gawo. Pehala lyokuthiminika aantu ya taambe ko onkundana ombwanawa yUukwaniilwa kaashi li pahalo lyawo, aalongwa yaJesus oya li ye na okupopya naamboka ye na ohokwe. — Mateus 10:7, 11-14.

•   Eitedhululo tali ningwa kethiminiko itali kwatha sha, oshoka Kalunga oha taamba ko owala mboka taye mu longele tashi zi komutima. — Deuteronomium 6:4, 5; Mateus 22:37, 38.

 Odhoshili kutya ohatu uvitha etumwalaka lyOmbiimbeli ‘miilongo ayihe yokombanda yevi,’ nohatu shi ningi “montaneho yaantu ayehe nomomagumbo,” ngaashi Ombiimbeli yetu lombwela. (Iilonga 1:8; 10:42; 20:20) Ngaashi owala Aakriste yopetameko, natse omathimbo gamwe ohatu lundilwa kutya otatu hongolola aantu. (Iilonga 18:12, 13) Nonando ongawo, omapopyo ngoka ogiifundja. Ihatu kambadhala okuthiminikila aantu eitaalo lyetu. Pehala lyaashono, otwi itaala kutya aantu oye na okutseyithilwa etumwalaka, opo ya vule okuninga etokolo lyomondjila.

 Ihatu thiminike aantu ya thige po omalongelokalunga gawo noihatu kutha ombinga miinima yopapolitika. Ihatu pe wo aantu iinima yopamaliko, opo ando ye tu wayimine nenge tu endathane nayo nelalakano ya ze ko kelongelokalunga lyawo. Mepingathano naashono, aantu yamwe mboka hayi iti Aakriste iinima mbyoka oyo haya ningi, nokungawo ohayu ulike kutya kaye shi shili aalanduli yaKristus. b

 Eeno. Ombiimbeli oyu ulika kutya aantu oye na uuthemba wokulundulukila kelongelokalunga lilwe. MOmbiimbeli omu na iiholelwa oyindji yaamboka ya li ya hogolola kaaya landule elongelokalunga lyaapambele yawo noyaamboka ya li ya hogolola yo yene okulongela Kalunga kashili. Pashiholelwa ngaashi Abraham, Rut, aantu yamwe yomuAtena nosho wo omuyapostoli Paulus, okutumbula po owala yamwe. (Josua 24:2; Rut 1:14-16; Iilonga 17:22, 30-34; Aagalati 1:14, 23) Shimwe ishewe, mOmbiimbeli omwa popiwa wo yamwe mboka ya li ya ningi omatokolo kaage li pandunge, pehala lyokuwayimina elongelokalunga ndyoka lya hokiwa kuKalunga. — 1 Johannes 2:19.

 Uuthemba wokulundulukila kelongelokalunga lilwe, otawu ambidhidhwa kOmbelewa yUuthemba wOmuntu, ndjoka yi ithanwa kIigwana ya Hangana kutya oyi li “ekankameno lyompango yuuthemba womuntu muuyuni.” Ompango ndjoka otayi ti kutya kehe omuntu oku na “emanguluko okulundulula elongelokalunga lye nenge eitaalo lye” nosho wo “okukonga, okupewa nokupopya uuyelele nomadhiladhilo” ngoka ga kwatela mo iinima yopalongelokalunga. c Shika osha kwathela aantu ya kale ya simaneka uuthemba wayalwe wokukaleka po omaitaalo gawo nokutinda omadhiladhilo ngoka itaaya tsu kumwe nago.

 Hasho nando. Ombiimbeli otayi tu ladhipike tu simaneke ayehe kutya nduno oye li melongelokalunga lini. (1 Petrus 2:17) Shimwe ishewe, Oonzapo dhaJehova ohadhi vulika koshipango shOmbiimbeli shoku simaneka aakuluntu, nokuli nonando oye li meitaalo lya yooloka ko kulyetu. — Aaefeso 6:2, 3.

 Nonando ongawo, haantu ayehe taya tsu kumwe naashoka Ombiimbeli tayi ti. Omukiintu gwokoZambia okwa popi a ti: “Okulundulukila kelongelokalunga lilwe . . . moshitopolwa shetu osha li sha talika ko okwaanuudhiginini, okukengelela yaandjeni nosho wo aantu momudhingoloko.” Omukiintu nguka okwa li lela a taalelwa kuupyakadhi mboka pethimbo omugundjuka, sho a tameke okukonakona Ombiimbeli nOonzapo dhaJehova nolwanima okwa tokola a lundulule elongelokalunga lye. Okwa popi a ti: “Aavali yandje oya kala nokulombwela ndje lwiikando kutya oyu uvite lelalela nde ya sitha ohoni nayi nonda li nde ya dhenga poomwenyo noonkondo. Osha li oshidhigu lela kungame, molwaashoka okukala inaandi hokiwa we kaavali yandje, oshinima oshinene. . . . Sho nda hogolola okukala omudhiginini kuJehova pehala lyokudhiginina omikalondjigilile dhelongelokalunga, shoka itashi kutya kandi shi omudhiginini kuyaandjetu nenge kaakwanezimo.” d