YOOTHATANO ntoko pophoro aavahiwe mmiravo awiichaniwa Jordan, yakhala ntoko wi hiyaari echu. Nyenya vano, eyo ti yoochuneyaxa wa yoowo. Jordan onnaloca: “Kaavahiwe ni nthamwene a asitiithi aka awiichaniwa Russel, elukuluku kaaryaaka mwaana.” Russel amanle okhwa, Jordan aaleeliwa wi Russel aatepa waakhaviherya avovo awe vamoha ni asitiithi awe, variyari va elukuluku yookacamiha. Jordan Onnaloca: “Vano kisuwenlaaka sincipale vooloca sa Russel yoothatano aakivanheiye ti yoochuneya vancipale wa miyaano opwaha khalai.”

Ntoko yooniheryiwaaya va yaweereya ya Jordan, yoovaha enanwerya okhala ya esisapo vakhaani naari etokweene mmoonelo wa achu. Wa yaale anathamalela, yoovaha enamukhala yasisapo, naari yoochuneya. Piipiliya onnaloca yoovaha erino esisapo yoohaalakhanyeya moorweela wa masu ala: “Muluku òtepa wakhwela atxhu a mwelaponi, ophiyerya onvaha Mwana awe mmoharu, wi mutxhu onamwemererye yowo, ahirimele, nto akhaleno ekumi yohimala.”—Yohani 3:16.

Ela yoovaha eni oruuha ekumi yoohimala! Apwanne yookhalavo yoovaha ekina enapwaha yeela? Naamwi achu akina ehiiwexexaka esisapo aya, Akristu eeparipari anoona okhala yoochuneya ni ‘yowalamela.’ (Salumu 49:8; 1 Pedro 1:18, 19) Mano, ntakhara heeni Muluku aaveleela ekumi ya mwanawe wa achu ntoko yamahala?

Murummwa Paulo onnaakhula ni masu ala: “Nthowa na mutxhu mmoha pahi yòvolowa mwelaponi yotxheka, navetho ni yotxheka wòvolowa mwelaponi okhwa, hiha okhwa wòhaphwanya atxhu othene.” (Aroma 5:12) Mulopwana oopacerya, Atamu, aacheka moorweela wa ohimwiiwelela Muluku mwaayiini, nave athoriheriwa soohooxa ni okhwa. Moorweela wa Atamu, okhwa waahaavolowela anamwane awe oothene—achu ari mweelaponi.

 “Nlivelo na yotxheka ti okhwa, nto mahala Muluku onanivaheiye, ti ekumi yohimala mwa Yesu Kristu Pwiya ahu.” (Aroma 6:23) Wi awoopole achu mu okapuro wa okhwa, Muluku aamurumiha Mwanawe, Yesu Kristu, veelaponi yavathi wi avahe ekumi awe yoophaameya ntakhara achu. Moorweela wa mathipelo a mukucho yoowo, osuweliwe ntoko “nivuluso” naari woopola, oothene anamuroromela Yesu anamukhalano ekumi yoohimala.—Aroma 3:24.

Alocaka sa mareeliho oothene alapeli a Muluku anahaalaaya waakhela moorweela wa Yesu, Paulo aahi: “Muluku atxitximihiwe wa nthowa na mahala awe òhilotxheya.” (2 Korinto 9:15) Chiryene, woopola yoovaha etokweenexa nihinaweryaahu othariha ni masu. Nyenya variyari va soovaha sa Muluku wa achu, ntakhara heeni yawoopola eryaaya yoochuneyaxa? Mmukhalelo taani yoovaha ela enapwahaaya soothene? * Nave nnaphwanela waakhulela hai? Ninnoowopaani wi mphwanye maakhulo a Piipiliya mu miyaha inacharela.