Michelle: He aho nei, kua tutala au hagaao ke he tuleke nei mo e tau tagata oti he matakavi. Ko e mataulu Manako Nakai a Koe ke Iloa e Kupu Mooli? Hanei e lagaki haau.

Sophia: Ko e tala kia hagaao ke he lotu?

Michelle: Ē. Kikite la ke he ono e hūhū ne tohi i mua. Ha e fe e taha he tau hūhū nei​—

Sophia: Fakatali la a koe. Liga moumou e magaaho haau he tutala ki a au.

Michelle: Ko e ha ne talahau pihia a koe?

Sophia: Ko e tala mooli, ai iloa au na talitonu au ke he Atua.

Michelle: Fakaaue he tala mai e manatu mooli haau. Fakamolemole fia hūhū au, Pihia tumau kia e logonaaga haau?

Sophia: Nakai, he moui hake na fano tapu au. Ka kua leva lahi e ai fano tapu haaku.

Michelle: Ē. Ka e fakamolemole, ko e higoa haaku ko Michelle.

Sophia: Ko au ko Sophia.

Michelle: Mitaki ke feleveia mo koe ma Sophia.

Sophia: Pihia ni.

Michelle: Ai ko e hau au ke fakaohooho e tau taofiaga haaku ki a koe ma Sophia. Ka e fia iloa au. Kua fai mena kia ati fakauaua a koe na fai Atua nakai?

Sophia: Ē. Na putoia e matua fifine haaku he pakia e motoka he 17 e tau kua mole.

Michelle: Fakaalofa ha ke logona ai. Ti pakia nakai a ia?

Sophia: Ē, kua kulikuli a ia tali mai he mogoia.

Michelle: Momoko ha ia. Nakai noa kua tupetupe lahi a koe.

Sophia: Ē mooli. Ti lahi e manamanatu haaku, Ka fai Atua, maeke fēfē a ia ke fakaatā e mena nei ke tupu? Ko e ha e Atua ne fakaatā a tautolu ke matematekelea pihia?

Michelle: Maama e tau logonaaga mo e tau hūhū haau. Ka matematekelea a tautolu, kua fa mahani ke manamanatu ke he kakano. Na manamanatu pihia foki e falu tagata taane mo e fifine tua fakamooli i loto he Tohi Tapu!

Sophia: Pihia kia?

Michelle: Ē. Mitaki nakai ke fakakite atu e au e fakafifitakiaga mai he Tohi Tapu?

Sophia: Mitaki.

Michelle: Mailoga la e hūhū he perofeta tua fakamooli ko Hapakuka he hūhū ke he Atua, ne fakamau he Hapakuka, veveheaga 1, kupu 2 mo e 3: “Iehova na e, ke ui atu au kia koe ato a fe, ka e nakai fanogonogo mai a koe? Kua tagi atu ai au kia koe ha ko e favale, ka e nakai fakamoui mai e koe. Ko e ha kua fakakite mai ai e koe kia au e mahani kelea?” Tatai kia e tau hūhū ia mo e tau hūhū haau?

Sophia: Ē, tatai.

Michelle: Ne nakai vale e Atua ki a Hapakuka he hūhū e tau hūhū ia, po ke tala age a ia kua lata ni a Hapakuka ke fakalahi e tua.

Sophia: Fuluola ha ia.

Michelle: Fakaako he Tohi Tapu na kitia he Atua e matematekelea ha tautolu ti manamanatu a ia ki ai.

Sophia: Ko e heigoa e kakano he tala haau?

Michelle: Fakakite atu e au e fakatai he Esoto 3:7. Fakamolemole totou mai la e kupu ia?

Sophia: Ē. Pehē mai: “Ti pehe mai ai a Iehova, Kua kitekite ni au ke he matematekelea he haku motu ha i Aikupito, kua fanogonogo foki e au ke he tagi ha lautolu ha ko lautolu kua pule favale kia lautolu, ha kua kitia e au ha lautolu a mamahi.”

 Michelle: Fakaaue lahi. He fakavē ke he kupu tohi nei, kitia nakai he Atua e tau tagata haana ka matematekelea?

Sophia: Ē, liga kitia e ia.

Michelle: Ti iloa lahi e ia e mena ne tupu. Liu la onoono ke he vala fakahiku he kupu ia. Pehē e Atua: “Kua kitia e au ha lautolu a mamahi.” Liga pihia nakai e tau kupu he Atua pāpā maō po ke onoono fakateaga?

Sophia: Nakai, ai pihia.

Michelle: Ka e mooli, ko e taha mena ke mailoga e tuaga, ka e ke aamotia e loto​—ke fai logonaaga ke he tuaga​—​ko e taha mena foki a ia.

Sophia: Mooli.

Michelle: He tokaloto e manatu ia, hau la ke totou foki ke he taha tuaga he mogo ne matematekelea e tau tagata he Atua. Ne fakamau ai he Tau Fakafili 10:16. Pehē e vala fakahiku he kupu ia: “Ti hukia ai hana finagalo ha ko e mamahi a Isaraela.” Ti manatu nakai a koe, kua lauia e Atua ha kua matematekelea e tau tagata haana?

Sophia: Ē, hihiga pihia.

Michelle: Ko e tala mooli ma Sophia, kua manamanatu lahi e Atua ki a tautolu, ti nakai fiafia a ia ke kitia a tautolu kua matematekelea. Ka mamahi a tautolu, ti mamahi foki a ia mo tautolu.

Michelle: Ato fano au, taha foki e manatu kua manako au ke tala atu ki a koe.

Sophia: Ē, mitaki.

Michelle: Manamanatu la ke he fakaakoaga he Tohi Tapu ki a tautolu hagaao ke he malolō he Atua. Ko e kupu ne manatu e au ko e Ieremia 10:12. Fakamolemole totou mai la e koe?

Sophia: Ē. Pehē mai: “Ne eke ai e ia e lalolagi he hana malolo, ne fakatumau e ia e atu motu ke he hana iloilo, ne fofola foki e ia e lagi ke he hana pulotu.”

Michelle: Fakaaue lahi. Hau la ke manamanatu fakakū ke he kupu nei. Ha ha nakai he Atua e malolō lahi mahaki ke tufugatia e lagi mo e lalolagi katoatoa mo e tau mena oti kana i ai?

Sophia: Ē.

Michelle: Ka ha ha he Atua e malolō ke tufugatia e tau mena oti ne agaagai ia tautolu, nakai kia amanaki a tautolu ke ha ha foki ia ia e malolō ke leveki e tau mena ne tufugatia e ia?

Sophia: Ē.

Michelle: Liu ke manamanatu ke he matua fifine haau. Lauia he ha a koe he kitia a ia he matematekelea?

Sophia: Ha kua fakaalofa au ki a ia. Ko ia ko e matua fifine haaku.

Michelle: Ti ka ha ha ia koe e malolō ke fakamaulu a ia mogonei, to taute nakai e koe?

Sophia: Ē, to taute.

Michelle: Manamanatu la ke he kakano he mena ia. Kua fakaako he Tohi Tapu na mailoga he Atua e tau matematekelea ha tautolu, ti fakaalofa a ia ki a tautolu, ti lahi ue atu e malolō haana. Maeke nakai a koe ke manamanatu ke he malolō he fakamanavalahi he Atua he nakaila utakehe agataha ai e tau matematekelea ha tautolu?

Sophia: Ai manamanatu pihia au he mogo fakamua.

Michelle: Fai kakano mitaki kia ati nakaila utakehe e ia e tau lekua ha tautolu? a

Sophia: Ē, fai fakalata.

Michelle: Kua tagi mai e telefoni haau, fēfē ke liu mai au he taha magaaho, ti maeke ia taua ke tutala fakalaulahi atu ke he matakupu nei.

Sophia: Fakaaue lahi. Toka pihia. b