“To fakatu ai he Atua he lagi e kautu nakai fakaoti tukulagi; ko e kautu foki ia nakai tuku atu ai ke he taha motu, to tuki malipilipi mo e fakaotioti e tau kautu oti ia, ka ko ia to tumau tukulagi a ia.”​​—Tanielu 2:44.

Ko e Kautu he Atua ko e fakatufono he lagi. Ko e Patuiki ne fifili, ko Iesu Keriso ka pule ke he tau tagata oti mo e to mauokafua ai ko e finagalo he Atua to fakahoko ke he lagi mo e lalolagi nei foki. (Mataio 6:9, 10) Ko e fakatufono nei to nakai hukui aki ha fakatufono he tagata ha ko e “kautu tukulagi he Iki ha tautolu ko e Fakamoui ia ko Iesu Keriso.” Ko e mafola tukulagi to hoko mai ai.​​—2 Peteru 1:11.

“Ko Satani ni kua faliu e ia a ia mo agelu he maama. Haia ni, nakai ko e mena lahi kaeke ke faliu hana tau fekafekau ke tuga e tau fekafekau he tututonu; ko e ha lautolu a fakahikuaga, tuga e tau gahua ha lautolu haia.”​​—2 Korinito 11:14, 15.

To fakatapakupaku e tau lotu fakavai ko e gahua haia he Tiapolo mo e to utakehe mai he lalolagi. To galo tukulagi e feveheveheaki he tau lotu mo e fakamaligi toto. To fakaatā he mena nei a lautolu ne fakaalofa “ke he Atua kua moui” ke tapuaki ki a ia he “taha e tua” mo e “agaga mo e fakamoli.” Ko e mafola mo e kau fakalataha haia!​​—1 Tesalonia 1:9; Efeso 4:5; Ioane 4:23.

“To ha ia lautolu e Atua ni, ko e ha lautolu a Atua haia. To holoholo kehe he Atua e tau hihina mata oti mai he tau mata ha lautolu; ti nakai tuai fai mate, po ke fakatutuku, po ke tagi, ti nakai tuai fai matematekelea; ha kua mole atu e tau mena fakamua.”​​—Fakakiteaga 21:3, 4.

 To fakamooli e Iehova ko e Atua e mena nei puhala mai he haana Tama ko Iesu, ne foaki haana moui ke lata mo e tau tagata he lalolagi. (Ioane 3:16) I lalo hifo he takitakiaga ha Iesu, to mitaki katoatoa e tagata. To nakai liu ke matematekelea “to ha ia lautolu e Atua ni” mo e to utakehe “e tau hihina mata oti ha lautolu.” Ko e nakai mitaki katoatoa he tagata mo e matematekelea to eke ia mo mena kua mole atu; “to eke ni e motu ma e tau tagata tututonu, to nonofo muatua ai a lautolu.”​​—Salamo 37:29.

“Ti tapaki e [Iesu Keriso] e tarako, ko e gata tuai, ko e tiapolo ia mo Satani, ti lili e ia a ia ke he tau tau ne taha e afe. Kua liti foki a ia ke he pahua kua nakai gata mai kua puipui foki a ia, mo e tuku atu e fakamau fakamailoga ki luga hana, kia nakai tuai fakahehe e ia e tau motu.”​​—Fakakiteaga 20:2, 3.

Ko e tau fakaohoohoaga faka-Satani to galo ia he mogo ka līlī a Satani mo e tau temoni mo e tolo ke he “pahua,” ko e tuaga nakai gahuahua. To nakai liu a lautolu ke fakagahuahua ha lautolu a tau mahani kelea ki luga he tau tagata. To fakatotoka mooli ke nofo he lalolagi kua atāina mai he tau fakaohoohoaga ha Satani mo e tau agaaga kelea!

“Ko e tau aho fakamui” to fakaoti ai tuga he talahau e Iesu ko e “matematekelea lahi.” Pehē a ia: “Ko e vaha ia ke lahi ai e matematekelea, nakai pihia taha mena tali mai he kamataaga he lalolagi, kua hoko ni ke he vaha nai; ti nakai tuai pihia foki.”​​—Mataio 24:21.

To lahi mahaki e matematekelea ia kakano ko e mena laia kua tupu. To hoko e moumouaga lahi mahaki he “tau ke he aho lahi he Atua mana,” ne iloa lahi ai ko “Amaketo.”​​—Fakakiteaga 16:14, 16.

Ko e tau tagata he tau matakavi oti ne fiafia ke he tututonu kua amanaki lahi ke he fakaotiaga he fakatokaaga kelea nei. Manamanatu la ke he falu monuina ne fakatoka ma lautolu i lalo hifo he Kautu he Atua.

“Ko e moto tagata tokologa” to fakahao ke he lalolagi foou mo e mafola: Ne talahau mai he Kupu he Atua ko e “moto tagata tokologa” ne nakai maeke ke totou “kua o mai mai he matematekelea lahi” mo e kua fakahao ai ke he lalolagi tututonu foou. (Fakakiteaga 7:9, 10, 14; 2 Peteru 3:13) Ko e fakamouiaga ha lautolu ha ko Iesu Keriso “ko e Punua mamoe he Atua, ko ia ke uta kehe e hala he lalolagi.”​​—Ioane 1:29.

To loga e tau monuina ha ko e fakaakoaga faka-Atua: He lalolagi foou, “to puke e lalolagi ke he maama kia Iehova.” (Isaia 11:9) Ko e fakaakoaga faka-Atua nei to putoia ai e fakaako ke nonofo mafola mo e tau tagata oti mo e fakalautatai mo e takatakaiaga. Ne mavehe he Atua: “Ko au ko Iehova, ko e hau a Atua, kua fakaako atu kia koe ke he tau mena ke aoga ai, kua takitaki e ia a koe ke he puhala ke fano ai a koe.”​​—Isaia 48:17.

Tau fakahelehele kua mamate to fakaliu tutū mai he tukuaga: He nofo he lalolagi, ne fakaliu tumai e Iesu haana kapitiga ko Lasalo mai he mate. (Ioane 11:1, 5, 38-44) Ne fakatātā e ia e mena ka taute fakalaulahi e ia i lalo hifo he fakatokatokaaga he Kautu he Atua.​​—Ioane 5:28, 29.

To tumau tukulagi e mafola mo e tututonu: I lalo hifo he pule he Keriso, ko e tau matahavala to mole ia. Iloa fēfē e tautolu e mena ia? Kakano na maeke a Iesu ke totou e tau loto, mo e to fakaaoga e ia e lotomatala ia ke fakafili a lautolu ne tututonu mo lautolu ne mahani kelea. Ko lautolu ne nakai manako ke hiki ha lautolu a tau puhala to nakai fakaatā ke nonofo he lalolagi foou he Atua.​​—Salamo 37:9, 10; Isaia 11:3, 4; 65:20; Mataio 9:4.

Ne tutala a tautolu ke he falu ni he tau perofetaaga loga he Tohi Tapu ne hagaao ke he magaaho fulufuluola ka hoko mai. Ka fakagahuahua he Kautu he Atua e pule ke he lalolagi katoa, to tumau tukulagi e “monuina kua lahi.” (Salamo 37:11, 29) Ko e tau mena ne fakamamahi mo e fakamatematekelea e tagata to utakehe ia. Ne mavehe mai e tau kupu he Atua: “Kitiala, kua fakafou tuai e au e tau mena oti . . . ko e tau kupu nai kua moli mo e fakamoli ia.”​​—Fakakiteaga 21:5.