Ko e Tohi Mai he Kau Fakatufono
‘Kia eke a mutolu mo tau faiaoga.’ (Hepe. 5:12) Manamanatu la! Ko Iehova ko e Faiaoga mua ue atu he lagi mo e lalolagi katoatoa ne uiina a tautolu ke fakaako e falu hagaao ki a Ia! Ko e ha kotofaaga ke fakaako e kupu mooli hagaao ki a Iehova he magafaoa, fakapotopotoaga, po ke gahua he fonua ko e lilifu uho lahi mo e ko e matagahua lahi mahaki. Maeke fēfē a tautolu ke kautū?
Ko e tali kua moua he tau kupu ne tohia he aposetolo ko Paulo ki a Timoteo: “Kia hagaaki totou tohi a koe, ti tomatoma atu, ti fakaako atu.” Lafi e Paulo: “Ka eke e koe e mena ia ti fakamoui ai e koe a koe, katoa mo lautolu kua fanogonogo kia koe.” (1 Timo. 4:13, 16) Ha ha ia mutolu e fekau fakamoui ke folafola atu. Ti aoga lahi ke gahua ke fakaholo ki mua e totou mo e fakaako haau. Talaga e porosua nei ke lagomatai a mutolu ke taute pihia. Fakatutala ke he falu vala i loto.
Ko e kupu tohi ne tū he tau lau takitaha ko e matapatu fakaakoaga he Tohi Tapu ne felauaki ke he manatu ne fakaako po ke fakataiaga he manatu ne fakaako kua fakagahua
Nakai fai faiaoga foki ne tuga a Iehova (Iopu 36:22) To lagomatai he porosua nei a koe ke fakamatila e tau puhala haau ke eke mo tagata totou mo e faiaoga, ti ua nimo ko Iehova e Punaaga he fekau ha tautolu ti ko ia kua futia mai e tau tagata. (Ioane 6:44) Ko e mena ia, liogi tumau ma e agaaga tapu. Fakaaoga tumau e Kupu he Atua. Hagaaki tumau ki a Iehova, ka e nakai ki a koe. Eketaha ke atihake e tau loto he tau tagata fanogonogo ke hokulo e fakaalofa ki a Iehova.
Kua uiina a mutolu ke fakaako e fekau ne mua he aoga ne nakaila foaki age ke he tau tagata. Mauokafua a mautolu he falanaki a mutolu ke he “malolo kua foaki mai he Atua,” to kautū a mutolu.—1 Pete. 4:11.
Ha mutolu a tau faiaoga fakahele,
Kau Fakatufono he Tau Fakamoli a Iehova
