Kulindeleke bona abantu abangaba silinganiso esimabhiliyoni amahlanu babukele i-FIFA World Cup ezokuba khona kusukela ngoNovemba 20 bekube ngoDisemba 18, 2022. Abantu abanengi bacabanga ukuthi imibuthwano yemidlalo enjengale ingakghona ukwenza okungaphezu kokubumbanisa abantu bona babe babukeli.

•   “Zemidlalo zinamandla wokutjhugulula iphasi. Zinamandla wokukhuthaza abantu. Wokuhlanganisa abantu ngendlela ephuma phambili.”—UNelson Mandela, obekangumongameli weSewula Afrika.

•   “Ibholo erarhwako . . . yenza abantu babe nethemba, yenza abantu bathabe, yenza abantu babe netjiseko, yenza abantu babe nethando, begodu ihlanganisa abantu beenhlanga ezihlukahlukeneko.”—UGianni Infantino, umongameli weFIFA. a

 Inga-kghani iBhegere yePhasi namkha ezinye zemidlalo zingenza kube nebumbano elinjalo? Likhona na ithemba lokuthi kuzokuba nokuthula nebumbano?

 IBhegere yePhasi yomnyaka lo beyibandakanya okungaphezu kwebholo erarhwako. Imidlalo yenza abantu baphikisane ngemiraro ebandakanya zehlalo, zepolotiki, amalungelo wabantu, ukubandlululana kuhlanganise nokungalingani kwezomnotho.

 Nanyana kunjalo, abantu abanengi bayakuthabela ukubukela zemidlalo ebandakanya iphasi loke, ezinjengeBhegere yePhasi. Kodwana nanyana abantu bangafisa kangangani, imidlalo enjengale angeze yenza bona kube nebumbano elihlala unomphela. Kunalokho, yenza abantu baziphathe ngendlela engakafaneli, iBhayibheli eyakhuluma ngayo nayikhuluma ‘ngemihla yokuphela.’—2 Thimothi 3:1-5.

 IBhayibheli linethemba lamambala lephasi elibumbeneko. Lithembisa bona boke abantu bazokubumbana ngaphasi kombuso wezulwini obizwa ngokuthi “mBuso kaZimu .”—Lukasi 4:43; Matewu 6:10.

 IKosi yomBuso loyo, uJesu Krestu, izokuqinisekisa bona kuba nokuthula ephasini loke. IBhayibheli lithi:

•   “Abalungileko bazokutlhurha, nokuthula kuzokuba kukhulu.”—IRhubo 72:7.

•   “Uzokuhlangula abatlhagako abalilela isizo . . . Uzobahlangula ekugandelelweni nenturhwini.”—IRhubo 72:12, 14.

 Iimfundiso zakaJesu sele zibumbanise iingidigidi zabantu abavela eenarheni ezima-239 namhlanjesi. Zifunde ukungasabi nehloyo. Bona ufunde okungeziweko, funda iinhloko ezimilandelande ezithi “Indlela Yokuhlula Ihloyo.”