NgoSondo, kaNovemba 20, 2022, bekuphela umhlangano we-COP27 United Nations Climate Change Conference. Nanyana kwafikelelwa isiphetho sokuthi kusizwe iinarha ezithintekileko ngebanga leenhlekelele zobujamo bezulu, inengi latjheja bona lokho angeze kulungise into ebangela umonakalo lo.

•   Unobhala-jikelele u-António Guterres we-United Nations, ngoNovemba 19, 2022 wathi “kuyangithabisa ukuthi saqunta ukubekela imali eqadi ukwenzela bona sikghone ukusiza abathinteke ngebanga lobujamo bezulu.” “Nanyana kunjalo siyazi ukuthi lokho akukaneli . . . Iphasi lethu lisebujamweni obumbi.”

•   UMary Robinson obekangumongameli we-Ireland nobekangu-UN High Commissioner for Human Rights, ngoNovemba 20, 2022 uthi “Iphasi kungenzeka liqalane namatjhuguluko amakhulu khulu ebujamweni bezulu obuzokubangela umonakalo kiwo woke umuntu.”

 Abantu abatjha batshwenyeke khulu ngengomuso leplanethethu. Nanyana kunjalo, kghani kungakghonakala na bona iintjhaba zisebenze ndawonye bona zilungise umonakalo wobujamo bezulu? Lithini iBhayibheli?

 IBhayibheli liveza ukuthi nanyana aborhulumende bangasebenza budisi kangangani bafuna ukulungisa iphasi, angeze bakghona ukuwurarulula umraro loyo. Tjheja izinto ezimbili ezenza kube njalo:

•   “Okugobekileko angekhe kwaluleka.”—UMtjhumayeli 1:15.

   Ihlathululo: Aborhulumende balinganiselwe kilokho abakghona ukukwenza, ngebanga lokuthi abantu abakadalelwa ukuzibusa. (Joromiya 10:23) Ngitjho nanyana iintjhaba zingahlangana angekhe zakghona ukusombulula imiraro yephasi nanyana zingalinga kangangani.

•   “Ngombana abantu bazakuba ngabazithandako, abathanda imali, . . . abangafuni isivumelwano.”—2 Thimothi 3:2, 3.

   Ihlathululo: IBhayibheli labikezela kusesengaphambili bona abantu abanengi bazokuba marhamaru begodu bangafuni ukusiza abanye.

 Nanyana kunjalo iplanethethu ayikasami kiborhulumende babantu. UZimu usinikele umBusi ongakghona ukukwenza lokho, uJesu Krestu. Naku iBhayibheli elikutjhoko ngaye:

•   “Ububusi bakhe buzokuhlala emahlombakhe. Igama lakhe kuzokuthiwa nguMeluleki oMuhle, nguZimu onaMandla, nguBaba oHlala ngokungaPheliko, yiKosana yokuThula.”—Isaya 9:6.

 UJesu uyiKosi yomBuso kaZimu namkha umBuso weZulwini. (Matewu 6:10) Unamandla, ukuhlakaniphile begodu uyafisa ukutlhogomela iplanethethu nezinto eziphila kiyo. (IRhubo 72:12, 16) Nakubusa iKosi leyo, umBuso wezulwini lo uzokususa “abatjhabalalisa iphasi” begodu uzokwenza iplanethethu ibe sebujamweni obuhle godu.—IsAmbulo 11:18; Isaya 35:1, 7.

 Ukufunda okungeziweko ngesisombululo sobujamo bezulu obungalawulekiko, funda isihloko esithi “Ukukhuphuka Kwamazinga Wokutjhisa Ngokudluleleko Ephasini Loke—Lithini IBhayibheli?.”